നിരന്തരമായി ഏമ്പക്കം വിടുന്നത് ഈ ക്യാന്സറിന്റെ ലക്ഷണമാകാം...
Synopsis
ഉത്കണ്ഠ കൊണ്ടാകാമെന്നായിരുന്നു ഡോക്ടറുടെ പ്രതികരണം. എന്നാല് ഏതാനും മാസങ്ങള്ക്ക് ശേഷം ഏമ്പക്കത്തിനു പുറമേ ഛര്ദ്ദിയും ഓക്കാനവും കൂടി വന്നതോടെയാണ് ഇവര്ക്ക് സംശയം തോന്നിയത്.
നിരന്തരമായ ഏമ്പക്കം വിടുന്നത് ഒരു ക്യാന്സറിന്റെ ലക്ഷണമാണെന്ന് പറഞ്ഞാല് നിങ്ങള് വിശ്വസിക്കുമോ? എന്നാല് യുകെയിലെ 24കാരിയായ നഴ്സിനാണ് നിരന്തരമായ ഏമ്പക്കം ഉണ്ടായത്. ആദ്യം ഇതിനെ നിസാരമായാണ് അവര് കണ്ടത്. പ്രതിശ്രുത വരനുമായി ഒരു വിനോദയാത്രയ്ക്ക് പോയപ്പോഴാണ് ആദ്യമായി ഇങ്ങനെ ഇടയ്ക്കിടെ ഏമ്പക്കം വരുന്നതായി തോന്നിയത്. ഇത് തുടര്ന്നപ്പോള് ഇവര് ഡോക്ടറെ കാണിക്കുകയായിരുന്നു. ഉത്കണ്ഠ കൊണ്ടാകാമെന്നായിരുന്നു ഡോക്ടറുടെ പ്രതികരണം.
എന്നാല് ഏതാനും മാസങ്ങള്ക്ക് ശേഷം ഏമ്പക്കത്തിനു പുറമേ ഛര്ദ്ദിയും ഓക്കാനവും കൂടി വന്നതോടെയാണ് ഇവര്ക്ക് സംശയം തോന്നിയത്. രണ്ട് ദിവസത്തിലേറയായ മലബന്ധം കൂടിയായപ്പോള് ഇവര് ആശുപത്രിയില് വീണ്ടും പോയി. ഇവിടെ നടത്തിയ സിടി സ്കാന് പരിശോധനയെയും ബയോപ്സിയെയും തുടര്ന്നാണ് കോളന് അര്ബുദം നിര്ണയിക്കപ്പെട്ടത്. മൂന്നാം ഘട്ട കോളന് അര്ബുദത്തിലായിരുന്നു രോഗിയെന്നും ഡെയ്ലിമെയിൽ റിപ്പോർട്ട് ചെയ്യുന്നു.
വൻകുടലിൽ വളരുന്ന അർബുദമാണ് കോളൻ ക്യാൻസർ. മനുഷ്യ ശരീരത്തിൽ ഏകദേശം രണ്ട് മീറ്റർ നീളമുള്ള വൻകുടലിൽ മലദ്വാരത്തോടു ചേർന്ന ഭാഗത്താണ് കോളൻ ക്യാന്സര് കൂടുതലായി കണ്ടുവരുന്നത്. അടുത്ത കാലത്തായി ചെറുപ്പക്കാർക്കിടയിൽ വൻകുടൽ ക്യാൻസര് വർധിച്ചുവരുന്നതായാണ് പഠനങ്ങള് പറയുന്നത്. ജീവിത ശൈലിയിലെ മാറ്റങ്ങള്, മാറിയ ഭക്ഷണരീതി, അമിത വണ്ണം, മദ്യപാനം, വ്യായാമക്കുറവ് തുടങ്ങിയ പല ഘടകങ്ങളിലും ഇതിനെ സ്വാധീനിക്കുന്നു. മറ്റു പല ക്യാൻസറുകളെയും പോലെ കുടൽ ക്യാൻസർ ആദ്യഘട്ടത്തിൽ ലക്ഷണങ്ങളൊന്നും കാണിക്കാറില്ല. പലപ്പോഴും രോഗം മൂർച്ഛിച്ച ശേഷമായിരിക്കും രോഗലക്ഷണങ്ങൾ കാണുന്നത്.വയറ്റില് നിന്ന് പോകുന്നതിലെ വ്യത്യാസം, മലം രക്തം കലർന്ന് പോകുന്നത്, മലം കറുത്ത് പോകുന്നത്, മലദ്വാരത്തില് നിന്ന് രക്തമൊഴുക്ക്, രക്തക്കുറവ് മൂലമുള്ള ക്ഷീണം, വയറുവേദന, മലബന്ധം, വയറിളക്കം, ക്ഷീണം, വിശപ്പിലായ്മ, ഗ്യാസ്, ഇടയ്ക്കിടെ വയര് ഒഴിയണമെന്ന തോന്നല്,ഭാരം കുറയുക തുടങ്ങിയവയാണ് വൻകുടൽ ക്യാൻസറിന്റെ രോഗലക്ഷണങ്ങൾ.
ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ 'കൺസൾട്ട്' ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.
Also Read: വയറിലെ കൊഴുപ്പ് കുറയ്ക്കാന് ഉച്ചയ്ക്ക് ചോറിന് പകരം കഴിക്കാം ഈ ആറ് ഭക്ഷണങ്ങള്...