ഖുഷി കപൂറിനെ ബാധിച്ച ആ രോ​ഗത്തെ കുറിച്ചറിയാം, എന്താണ് ഇറിറ്റബിൾ ബവൽ സിൻഡ്രോം?

ഐബിഎസ് സാധാരണമാണെങ്കിലും ഇത് കുടലുകളെ ഗുരുതരമായി ബാധിക്കുന്ന ഒരു അസ്വസ്ഥമായ ദഹനനാള രോഗമാണ്.

ഇറിറ്റബിൾ ബവൽ സിൻഡ്രോം ബാധിച്ചതായി നടി ഖുഷി കപൂർ അടുത്തിടെ തുറന്ന് പറഞ്ഞിരുന്നു. ബോളിവുഡ് താരം ശ്രീദേവിയുടെ ഇളയ മകളാണ് ഖുഷി കപൂർ. സോയ അക്തറിന്റെ ദി ആർച്ചീസ് എന്ന ചിത്രത്തിലൂടെയാണ് ഖുഷി അഭിനയരംഗത്തേക്ക് എത്തിയത്.

ഇറിറ്റബിൾ ബവൽ സിൻഡ്രോം അഥവാ ഐബിഎസ് എന്നത് ദഹനവ്യവസ്ഥയെ ബാധിക്കുന്ന ഒരു വിട്ടുമാറാത്ത അവസ്ഥയാണ്. ഐബിഎസ് സാധാരണമാണെങ്കിലും ഇത് കുടലുകളെ ഗുരുതരമായി ബാധിക്കുന്ന ഒരു അസ്വസ്ഥമായ ദഹനനാള രോഗമാണ്. 

ഐബിഎസിന്റെ ലക്ഷണങ്ങൾ ദഹനനാളത്തിന്റെ ഭിത്തിയിൽ കാണപ്പെടുന്ന നാഡികളുടെ ഹൈപ്പർസെൻസിറ്റിവിറ്റിയുമായി ബന്ധപ്പെട്ടിരിക്കുന്നു എന്നാണ് സമീപകാല പഠനങ്ങൾ കണ്ടെത്തിയത്.

ഇറിറ്റബിൾ ബവൽ സിൻഡ്രോമിന്റെ ലക്ഷണങ്ങൾ എന്തൊക്കെയാണ്?

വയറുവേദന അല്ലെങ്കിൽ മലബന്ധം

നെഞ്ചെരിച്ചിൽ

വയറിളക്കം

മലത്തിൽ കഫം കാണുക.

ചില ആളുകൾക്ക് ദഹനവ്യവസ്ഥയുമായി ബന്ധമില്ലാത്ത ലക്ഷണങ്ങൾ അനുഭവപ്പെടാം.

മൈഗ്രേൻ തലവേദന

ഉറക്ക അസ്വസ്ഥതകൾ

ഉത്കണ്ഠ അല്ലെങ്കിൽ വിഷാദം

ഫൈബ്രോമയാൾജിയ

പെൽവിക് ഭാ​ഗത്ത് വേദന

ഇറിറ്റബിൾ ബവൽ സിൻഡ്രോമിന്റെ കാരണങ്ങൾ എന്തൊക്കെയാണ്?

ദഹനനാളത്തിലൂടെ ഭക്ഷണം നീക്കുമ്പോൾ കുടൽ ഭിത്തികളിൽ പേശി പാളികൾ ചുരുങ്ങുന്നു. സങ്കോചങ്ങൾ ശക്തവും പതിവിലും കൂടുതൽ നേരം നീണ്ടുനിൽക്കുന്നതുമാകുമ്പോൾ, അത് വ വയറുവേദന, വയറിളക്കം എന്നിവയ്ക്ക് കാരണമാകും. ദഹനവ്യവസ്ഥയിലെ ഞരമ്പുകൾക്ക് പ്രശ്നങ്ങൾ ഉണ്ടാകുമ്പോൾ അത് അടിവയറ്റിൽ അസ്വസ്ഥത ഉണ്ടാക്കാം. 

ഗ്യാസ് അല്ലെങ്കിൽ മലം കാരണം നീർവീക്കം ഉണ്ടാകാം. കൂടാതെ, തലച്ചോറും കുടലും തമ്മിലുള്ള മോശം ഏകോപനം ദഹന പ്രക്രിയയിൽ സാധാരണയായി സംഭവിക്കുന്ന മാറ്റങ്ങളോട് ശരീരം അമിതമായി പ്രതികരിക്കാൻ കാരണമാകും. ഇത് വേദന, വയറിളക്കം അല്ലെങ്കിൽ മലബന്ധം എന്നിവയ്ക്ക് കാരണമാകും. ബാക്ടീരിയ അല്ലെങ്കിൽ വൈറസ് മൂലമുണ്ടാകുന്ന കഠിനമായ വയറിളക്കത്തിന് ശേഷം ഒരാൾക്ക് ഐ.ബി.എസ് ഉണ്ടാകാം. ഇതിനെ ഗ്യാസ്ട്രോഎന്റൈറ്റിസ് എന്ന് പറയുന്നു. ചില ആളുകൾക്ക് സമ്മർദ്ദം മൂലവും ഐബിഎസ് ബാധിച്ചേക്കാം.

ഇറിറ്റബിൾ ബവൽ സിൻഡ്രോം എങ്ങനെ പ്രതിരോധിക്കാം?

ഐബിഎസ് നിയന്ത്രിക്കുന്നതിന് ഭക്ഷണക്രമത്തിലെ മാറ്റങ്ങൾ, ജീവിതശൈലിയിലെ മാറ്റങ്ങൾ, സമ്മർദ്ദം കുറയ്ക്കൽ എന്നിവ ആവശ്യമാണ്. ഇവ വയറു വീർക്കൽ, വേദന, ക്രമരഹിതമായ മലവിസർജ്ജനം തുടങ്ങിയ ലക്ഷണങ്ങളെ ലഘൂകരിക്കാൻ സഹായിക്കും. ഭക്ഷണക്രമത്തിലെ മാറ്റങ്ങൾ ഇറിറ്റബിൾ ബവൽ സിൻഡ്രോമിന്റെ സാധ്യത കുറയ്ക്കുന്നു. കഫീൻ, മദ്യം, ശീതളപാനീയങ്ങൾ, കാബേജ് അല്ലെങ്കിൽ ബീൻസ് പോലുള്ള ഗ്യാസ് ഉൽപ്പാദിപ്പിക്കുന്ന ഭക്ഷണങ്ങൾ ഒഴിവാക്കുക. ദിവസവും കുറഞ്ഞത് 8-10 ഗ്ലാസ് വെള്ളം കുടിക്കുക. ദഹനം മെച്ചപ്പെടുത്തുന്നതിനും മലബന്ധം തടയുന്നതിനും വെള്ളം, ഹെർബൽ ടീ അല്ലെങ്കിൽ പഞ്ചസാര രഹിത പാനീയങ്ങൾ നല്ലതാണ്.

​ദിവസവും 30 മിനിറ്റ് നേരം മിതമായ വ്യായാമം ശീലമാക്കുക. ഉദാഹരണത്തിന് വേഗത്തിലുള്ള നടത്തം, സൈക്ലിംഗ് അല്ലെങ്കിൽ നീന്തൽ എന്നിവ. ഇവ കുടൽ സങ്കോചങ്ങളെ ഉത്തേജിപ്പിക്കാനും, മാനസികാവസ്ഥ മെച്ചപ്പെടുത്താനും, കുടലുകളെ നിയന്ത്രിക്കാനും സഹായിക്കുന്നു. സ്ട്രെസ് നിയന്ത്രിക്കാൻ മെഡിറ്റേഷൻ, ആഴത്തിലുള്ള ശ്വസനം, അല്ലെങ്കിൽ യോഗ പോലുള്ള റിലാക്സേഷൻ ടെക്നിക്കുകൾ പരിശീലിക്കുക.