ഗ്യാസ്, അസിഡിറ്റി എന്നിവ മാത്രമല്ല; വയറുവേദനയിൽ തുടങ്ങുന്ന 5 അപകടകരമായ ആരോഗ്യ പ്രശ്നങ്ങള്‍

സാധാരണയായി വയറുവേദനയിൽ നിന്ന് ആരംഭിച്ച് ഉടനടി വൈദ്യസഹായം ആവശ്യമുള്ള അഞ്ച് അപകടകരമായ ആരോഗ്യ അവസ്ഥകൾ എന്തൊക്കെയാണെന്ന് നോക്കാം.

വയറുവേദനയെ ദഹനക്കേടുമായി ബന്ധപ്പെട്ടാണ് എല്ലാവരും കാണുന്നത്. എന്നാൽ മറ്റു ചിലപ്പോൾ, വയറുവേദന ഗുരുതരമായ ആരോഗ്യസ്ഥിതിയുടെ സൂചകമായിരിക്കാം. വേദനയുടെ തീവ്രത, ദൈർഘ്യം, വേദനയ്‌ക്കൊപ്പം ഉണ്ടാകാവുന്ന മറ്റ് ലക്ഷണങ്ങൾ എന്നിവ ശ്രദ്ധിക്കേണ്ടത് പ്രധാനമാണ്. സാധാരണയായി വയറുവേദനയിൽ നിന്ന് ആരംഭിച്ച് ഉടനടി വൈദ്യസഹായം ആവശ്യമുള്ള അഞ്ച് അപകടകരമായ ആരോഗ്യ അവസ്ഥകൾ എന്തൊക്കെയാണെന്ന് നോക്കാം.

1. പെപ്റ്റിക് അൾസർ (Peptic ulcers)

ആമാശയത്തിലെ പാളികളിലോ ചെറുകുടലിന്റെ മുകൾ ഭാഗത്തോ ഉണ്ടാകുന്ന വ്രണങ്ങളാണ് പെപ്റ്റിക് അൾസർ എന്ന് പറയുന്നത്. ഭക്ഷണത്തിനിടയിലോ രാത്രിയിലോ വയറിന്റെ മുകൾ ഭാഗത്ത് കത്തുന്ന വേദനയോ അസ്വസ്ഥതയോ ഉണ്ടാകുന്നത് ഇവ മൂലമാണ്. അനിയന്ത്രിതമായ വയറുവേദന, ഓക്കാനം, നെഞ്ചെരിച്ചിൽ എന്നിവയാണ് രോഗ ലക്ഷണങ്ങളാണ്.

2. പിത്താശയക്കല്ല് (Gallstones)

പിത്താശയത്തിൽ ഉണ്ടാകുന്ന ചെറിയ ക്രിസ്റ്റലുകള്‍ പോലുള്ള കല്ലുകളാണ് പിത്താശയ കല്ല്. ഇവ സാധാരണ പിത്തരസം സ്രവണം തടസ്സപ്പെടുത്താൻ കാരണമായേക്കാം. ഇത് സാധാരണയായി കൊഴുപ്പുള്ളതോ സംസ്കരിച്ചതോ ആയ ഭക്ഷണങ്ങൾ കഴിച്ചതിനുശേഷം വയറിൽ, പ്രത്യേകിച്ച് വയറിന്‍റെ മുകൾ ഭാഗത്ത്, കഠിനമായ വേദനയ്ക്ക് കാരണമാകും. ഈ വേദന സാധാരണയായി കഠിനവും കുറച്ച് മിനിറ്റ് മുതൽ മണിക്കൂറുകൾ വരെ നീണ്ടുനിൽക്കുന്നതുമാണ്. കൂടാതെ ഓക്കാനം, ഛർദ്ദി, മഞ്ഞപ്പിത്തം തുടങ്ങിയ മറ്റ് ലക്ഷണങ്ങളും ഉണ്ടാകാം.

3. ഡൈവേർട്ടിക്യുലൈറ്റിസ് (Diverticulitis)

വൻകുടലിന്റെ ഭിത്തിയിലെ ചെറിയ സഞ്ചികളെ ഡൈവേർട്ടിക്യുല എന്ന് വിളിക്കുന്നു. ഇവയിൽ അണുബാധയോ വീക്കമോ ഉണ്ടാകുമ്പോൾ അത് ഡൈവേർട്ടിക്യുലൈറ്റിസ് എന്ന ആരോഗ്യ പ്രശ്നത്തിലേയ്ക്ക് നയിക്കുന്നു. ഇത് ഇടതുവശത്തെ അടിവയറ്റിൽ കടുത്ത വേദനയ്ക്ക് കാരണമാകും. അതോടൊപ്പം പനി, ഓക്കാനം, മലവിസർജ്ജന ശീലത്തിലെ മാറ്റം എന്നിവയും ലക്ഷണങ്ങളായി കാണപ്പെടാം.

4. പെൽവിക് ഇൻഫ്ലമേറ്ററി ഡിസീസ് (PID)

പെൽവിക് ഇൻഫ്ലമേറ്ററി ഡിസീസ് എന്നത് സ്ത്രീകളുടെ പ്രത്യുത്പാദന അവയവങ്ങളെ ബാധിക്കുന്ന ഒരു രോഗമാണ്, ഇത് സാധാരണയായി ലൈംഗികമായി പകരുന്ന ബാക്ടീരിയകൾ മൂലമാണ് ഉണ്ടാകുന്നത്. ഇത് സാധാരണയായി അടിവയറ്റിലെ വേദന, പനി, അസാധാരണമായ യോനി സ്രവങ്ങൾ, ലൈംഗിക ബന്ധത്തിലോ മൂത്രമൊഴിക്കുമ്പോഴോ വേദന എന്നിവയ്ക്ക് കാരണമാകുന്നു. ചികിത്സിക്കാത്ത PID വന്ധ്യത, വിട്ടുമാറാത്ത പെൽവിക് വേദന തുടങ്ങിയ ഗുരുതരമായ പ്രത്യാഘാതങ്ങൾക്ക് കാരണമാകും.

5. പാൻക്രിയാറ്റിസ് (Pancreatitis)

ആമാശയത്തിന് പിന്നിൽ സ്ഥിതി ചെയ്യുന്ന, ശരീരത്തിലുടനീളം നീണ്ടുനിൽക്കുന്ന ഒരു അവയവമായ പാൻക്രിയാസിന്റെ വീക്കം ആണ് പാൻക്രിയാറ്റിസ്. ഇത് വയറിന്റെ മുകൾ ഭാഗത്തുള്ള തീവ്രമായ വേദനയ്ക്ക് കാരണമാകുന്നു. സാധാരണയായി ഭക്ഷണം കഴിച്ചതിനുശേഷം വേദന കുറയുകയോ വഷളാകുകയോ ചെയ്യുന്നു. തുടർന്ന് ഓക്കാനം, ഛർദ്ദി, പുറംവേദന എന്നിവയും ഉണ്ടാകുന്നു.

ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ 'കൺസൾട്ട്' ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.