പാൻക്രിയാറ്റിക് ക്യാൻസർ; ഈ പത്ത് ലക്ഷണങ്ങളെ അവഗണിക്കരുത്...
Synopsis
ദഹനത്തെ സഹായിക്കുന്ന എൻസൈമുകളും പഞ്ചസാരയുടെ മെറ്റബോളിസത്തെ നിയന്ത്രിക്കാൻ സഹായിക്കുന്ന ഹോർമോണുകളും ഉത്പാദിപ്പിക്കുകയാണ് പാൻക്രിയാസ് ചെയുന്നത്. പാൻക്രിയാസിന് ചുറ്റും അനിയന്ത്രിതമായി കോശങ്ങൾ വളരുകയും ഒരു ട്യൂമർ രൂപപ്പെടുകയും ചെയ്യുന്നതാണ് പാൻക്രിയാറ്റിക് ക്യാൻസർ.
ഇന്ന് നവംബര് 16- ലോക പാൻക്രിയാറ്റിക് ക്യാൻസർ ദിനം. അടിവയറ്റിൽ ആഴത്തിൽ കിടക്കുന്ന ഒരു ദീർഘവൃത്താകൃതിയിലുള്ള അവയവമാണ് പാൻക്രിയാസ്. ദഹനത്തെ സഹായിക്കുന്ന എൻസൈമുകളും പഞ്ചസാരയുടെ മെറ്റബോളിസത്തെ നിയന്ത്രിക്കാൻ സഹായിക്കുന്ന ഹോർമോണുകളും ഉത്പാദിപ്പിക്കുകയാണ് പാൻക്രിയാസ് ചെയുന്നത്. പാൻക്രിയാസിന് ചുറ്റും അനിയന്ത്രിതമായി കോശങ്ങൾ വളരുകയും ഒരു ട്യൂമർ രൂപപ്പെടുകയും ചെയ്യുന്നതാണ് പാൻക്രിയാറ്റിക് ക്യാൻസർ.
അമിതമായ മദ്യപാനം, പുകവലി, അനാരോഗ്യകരമായ ഭക്ഷണശീലങ്ങൾ തുടങ്ങിയ പലപ്പോഴും പാൻക്രിയാറ്റിക് ക്യാൻസറിന്റെ സാധ്യത വർധിപ്പിക്കുന്നു. പാൻക്രിയാറ്റിക് ക്യാൻസറിന്റെ ലക്ഷണങ്ങള് എന്തൊക്കെയാണെന്ന് നോക്കാം...
ഒന്ന്...
സ്ഥിരമായുള്ള ദഹനക്കേട്, ഭക്ഷണം കഴിച്ചതിന് ശേഷം വയറിനുള്ളില് അസ്വസ്ഥത തുടങ്ങിയവ പാൻക്രിയാറ്റിക് ക്യാൻസറിന്റെ ലക്ഷണമാകാം.
രണ്ട്...
ഭക്ഷണം കഴിച്ചയുടൻ ഓക്കാനവും ഛർദിയും അനുഭവപ്പെടുന്നതും ഒരു ലക്ഷണമാകാം. ചിലരില് ഗ്യാസിന്റെ പ്രശ്നവും വയര് വീര്ത്തിരിക്കാനും സാധ്യതയുണ്ട്.
മൂന്ന്...
അടിവയറ്റിലെ വേദനയാണ് പാൻക്രിയാറ്റിക് ക്യാൻസറിന്റെ മറ്റൊരു പ്രധാന ലക്ഷണം. പല കാരണങ്ങള് കൊണ്ടും അടിവയറ്റിൽ വേദന ഉണ്ടാകാം. എന്നാല് അടിവയറ്റില് ഒരു അസ്വസ്ഥത തോന്നുകയും പിന്നീട് വേദന കഠിനമാവുകയും അത് പുറകിലേയ്ക്ക് വ്യാപിക്കുകയും ചെയ്താല് നിസാരമായി കാണേണ്ട.
നാല്...
നടുവേദനയാണ് മറ്റൊരു ലക്ഷണം. പാൻക്രിയാറ്റിക് ക്യാന്സറിന്റെ പ്രധാന ലക്ഷണങ്ങളിലൊന്നാണിത്. ക്യാൻസർ സമീപത്തുള്ള ഞരമ്പുകളിലേക്ക് വ്യാപിക്കുമ്പോഴാണ് നടുവേദന വരുന്നത്.
അഞ്ച്...
അകാരണമായി ശരീരഭാരം കുറയുന്നതും പാൻക്രിയാറ്റിക് ക്യാന്സറിന്റെ സൂചനയാകാം.
ആറ്...
ചര്മ്മത്തില് ഉണ്ടാകുന്ന ചൊറിച്ചില്, ചർമ്മത്തിന് മഞ്ഞനിറം, കണ്ണുകളിൽ വെളുത്ത നിറം തുടങ്ങിയവയും പാൻക്രിയാറ്റിക് ക്യാന്സറിന്റെ ലക്ഷണങ്ങളാണ്.
ഏഴ്...
മലവിസർജ്ജനത്തിൽ ഉണ്ടാകുന്ന മാറ്റങ്ങളും ഒരു ലക്ഷണമാണ്. മലത്തില് നിറം മാറ്റം ഉണ്ടെങ്കില് അതും നിസാരമായി കാണരുത്.
എട്ട്...
മൂത്രത്തിലെ നിറ വ്യത്യാസവും ചിലപ്പോള് സൂചനയാകാം.
ഒമ്പത്...
പെട്ടെന്നുണ്ടാകുന്ന പ്രമേഹവും അത് നിയന്ത്രിക്കാന് കഴിയാത്തതും പാൻക്രിയാറ്റിക് ക്യാൻസറുമായി ബന്ധപ്പെട്ടിരിക്കുന്നു. എന്നുകരുതി പ്രമേഹമുള്ള എല്ലാവർക്കും പാൻക്രിയാറ്റിക് ക്യാൻസർ വരാനുള്ള സാധ്യത ഇല്ല.
പത്ത്...
പല കാരണങ്ങള് കൊണ്ടും ക്ഷീണം തോന്നാമെങ്കിലും, ഈ ക്യാന്സറിന്റെ ലക്ഷണമായും അമിത ക്ഷീണം, ബലഹീനത തുടങ്ങിയവ ഉണ്ടാകാം.
ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ 'കൺസൾട്ട്' ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.
Also read: ഈ അഞ്ച് പോഷകങ്ങളുടെ കുറവ് നിങ്ങളുടെ ഹൃദയാരോഗ്യത്തെ ബാധിക്കാം...