കൊവിഡ് ചെറിയ തോതിലാണെങ്കിൽ 9‌ ദിവസത്തിനു ശേഷം ഡിസ്ചാർജ് ചെയ്യാനാകും: പഠനം

ഹോങ്കോങ്ങിൽ കൊവിഡ് പോസിറ്റീവായ 35 രോഗികളുടെ  സാംപിളുകളിലാണ് ഗവേഷകര്‍ പഠനം നടത്തിയത്. 

ലോകത്ത് ആശങ്ക ഉയര്‍ത്തി കൊവിഡ് കണക്ക് ഉയരുകയാണ്. അതിനിടെ ചെറിയ തോതില്‍ കൊവിഡ് രോഗം വന്നവരിൽ എട്ട് ദിവസത്തിനുശേഷം കൊറോണ വൈറസ് അപ്രത്യക്ഷമാകാനുള്ള സാധ്യതയുണ്ടെന്ന് ഗവേഷകർ പറയുന്നു. യൂണിവേഴ്സിറ്റി ഓഫ് ഹോങ്കോങ് ആണ് പഠനം നടത്തിയത്. ഹോങ്കോങ്ങിൽ കൊവിഡ് പോസിറ്റീവായ 35 രോഗികളുടെ സാംപിളുകളിലാണ് ഗവേഷകര്‍ പഠനം നടത്തിയത്. 

ഇവരെ ഒന്‍പത്‌ ദിവസം കഴിഞ്ഞാല്‍ പരിശോധനകള്‍ക്ക് ശേഷം ഡിസ്ചാർജ് ചെയ്യാനാകുമെന്നും പഠനം പറയുന്നു. എമേർജിങ് ഇൻഫെക്‌ഷ്യസ് ഡിസീസസ് ജേണലിൽ പഠനം പ്രസിദ്ധീകരിച്ചിട്ടുമുണ്ട്. പഠനവിധേയമാക്കിയ 35ൽ 32 പേര്‍ക്കും ചെറിയതോതിലാണ് രോഗമുണ്ടായിരുന്നത്.  ഇവരിൽ 8 ദിവസങ്ങൾക്ക് ശേഷം വൈറസ് തിരിച്ചറിയാനാവാത്ത നിലയിലെത്തിയെന്നും പഠനത്തില്‍ പറയുന്നു. 

എന്നാൽ ആർടി - പിസിആർ പരിശോധനയിൽ വൈറസ് സാന്നിധ്യം ആഴ്ചകളോളം കണ്ടെത്താനാകുമെന്നും ഗവേഷകര്‍ പറയുന്നു. അത് അപകടകാരിയാവണമെന്നില്ല. അതീവ ഗുരുതര നിലയിലായവരോ രോഗപ്രതിരോധശേഷി കുറഞ്ഞവരോ ആണെങ്കിൽ കുറച്ചുനാൾകൂടി വൈറസ് സാന്നിധ്യം കണ്ടെത്തിയേക്കാം. ചെറിയ തോതിൽ രോഗം ബാധിച്ചവര്‍ക്ക് നല്ല രോഗപ്രതിരോധ ശേഷിയുണ്ടെങ്കിൽ ഒൻപത്  ദിവസങ്ങള്‍ക്ക് ശേഷം ഡിസ്ചാർജ് ചെയ്യാനാകുമെന്നും പഠനത്തിൽ പറയുന്നു.