രക്തസമ്മർദ്ദം കുറയ്ക്കണോ? ഈ 3 ദിനചര്യകൾ ശീലമാക്കൂ; വിദഗ്ധർ പറയുന്നു

രക്തസമ്മർദ്ദം ഉയരുമ്പോൾ വലിയ പ്രയാസങ്ങളൊന്നും തോന്നാറില്ലെങ്കിലും, ദീർഘകാലാടിസ്ഥാനത്തിൽ ഇത് ഗുരുതര ആരോഗ്യപ്രശ്നങ്ങൾക്ക് കാരണമാകും.

നിശബ്ദ ഘാതകൻ എന്നാണ് ഉയർന്ന രക്തസമ്മർദ്ദം അഥവാ ഹൈപ്പർടെൻഷൻ അറിയപ്പെടുന്നത്. രക്തസമ്മർദ്ദം ഉയരുമ്പോൾ വലിയ പ്രയാസങ്ങളൊന്നും തോന്നാറില്ലെങ്കിലും, ദീർഘകാലാടിസ്ഥാനത്തിൽ ഇത് ഗുരുതര ആരോഗ്യപ്രശ്നങ്ങൾക്ക് കാരണമാകും. സ്‌ട്രോക്ക്, ഹൃദയരോഗങ്ങൾ, വൃക്കരോഗങ്ങൾ എന്നിവയ്ക്ക് പിന്നിലെ പ്രധാന വില്ലൻ ഉയർന്ന രക്തസമ്മർദ്ദമാണെന്ന് വിദഗ്ധർ ചൂണ്ടിക്കാട്ടുന്നു. രക്തസമ്മർദ്ദം നിയന്ത്രിക്കാൻ എന്നും നടക്കുന്നത് ഗുണകരമാണ്. എന്നാൽ നടപ്പ് മാത്രമല്ല ഇതിനുള്ള ഏക മാർഗ്ഗം. ഭക്ഷണത്തിലോ വ്യായാമത്തിലോ വലിയ മാറ്റങ്ങൾ വരുത്താതെ തന്നെ രക്തസമ്മർദ്ദം നിയന്ത്രണവിധേയമാക്കാൻ സഹായിക്കുന്ന ചില ലളിതമായ ദിനചര്യകൾ കൂടിയുണ്ട്. അവ എന്തൊക്കെയാണെന്ന് അറിയാം.

1. ഉപ്പിന്റെ അളവ് കുറയ്ക്കുക

ഭക്ഷണത്തിൽ ഉപ്പിന്റെ അളവ് കുറയ്ക്കുന്നത് രക്തസമ്മർദ്ദം ഗണ്യമായി കുറയ്ക്കുമെന്ന് പഠനങ്ങൾ വ്യക്തമാക്കുന്നു. ശരീരത്തിൽ അധികമായി എത്തുന്ന സോഡിയം, കോശങ്ങളിൽ ജലാംശം നിലനിർത്താനും ഇത് രക്തക്കുഴലുകളിൽ സമ്മർദ്ദം കൂട്ടാനും കാരണമാകുന്നു.

2. ആവശ്യത്തിന് വെള്ളം കുടിക്കുക

ശരീരത്തിൽ കൃത്യമായി ജലാംശം നിലനിർത്തുന്നത് രക്തസമ്മർദ്ദം കുറയ്ക്കാൻ നേരിട്ട് സഹായിക്കും. ദിവസവും 6 മുതൽ 8 ഗ്ലാസ് വെള്ളം കുടിക്കുന്നത് ഉയർന്ന രക്തസമ്മർദ്ദത്തിനുള്ള സാധ്യത ഗണ്യമായി കുറയ്ക്കുമെന്ന് പഠനങ്ങൾ വ്യക്തമാക്കുന്നു.

3. കൃത്യമായ ഉറക്കം

നല്ല ഉറക്കവും രക്തസമ്മർദ്ദവും തമ്മിൽ അടുത്ത ബന്ധമുണ്ട്. ഉറങ്ങുമ്പോൾ ശരീരത്തിലെ രക്തക്കുഴലുകൾ അയയുകയും സ്ട്രെസ് ഹോർമോണുകളുടെ അളവ് കുറയുകയും ചെയ്യുന്നതിനാൽ രക്തസമ്മർദ്ദം സ്വാഭാവികമായി താഴുന്നു.

ഉറക്കമില്ലായ്മയുടെ ആഘാതം: ഉറക്കമില്ലായ്മയോ കൃത്യമല്ലാത്ത ഉറക്ക ശീലങ്ങളോ ഉള്ളവർക്ക് ഉയർന്ന രക്തസമ്മർദ്ദം ഉണ്ടാകാനുള്ള സാധ്യത 20 മുതൽ 30 ശതമാനം വരെ കൂടുതലാണെന്ന് സമീപകാല ഗവേഷണങ്ങൾ ചൂണ്ടിക്കാണിക്കുന്നു.

4. ശ്രദ്ധിക്കേണ്ടത്

ശരിയായ വ്യായാമത്തോടൊപ്പം ഉപ്പിന്റെ അളവ് കുറയ്ക്കുക, കൃത്യമായ ജലപാനം, കൃത്യസമയത്തുള്ള ഉറക്കം എന്നീ ശീലങ്ങൾ പിന്തുടരുന്നത് രക്തസമ്മർദ്ദം നിയന്ത്രിച്ച് ഹൃദയാരോഗ്യം സംരക്ഷിക്കാൻ സഹായിക്കും.