Lung Cancer : ശ്വാസകോശ അര്‍ബുദം; നഖങ്ങളിൽ കാണുന്ന ഈ മാറ്റങ്ങൾ അവ​ഗണിക്കരുത്

ശ്വാസകോശാർബുദത്തിന്റെ പ്രധാന കാരണങ്ങളിൽ ഒന്നായി ചൂണ്ടിക്കാണിക്കപ്പെടുന്നത് അനിയന്ത്രിതമായ പുകവലിയാണ്. പ്രത്യക്ഷമായും പരോക്ഷമായും ഉണ്ടാകുന്ന പുകവലിയുടെ ഫലങ്ങൾ ഈ രോഗത്തിന് കാരണമാകുന്നു.

ശ്വാസകോശ അർബുദം (Lung Cancer) ബാധിക്കുന്നവരുടെ എണ്ണം കൂടി വരികയാണ്. ശ്വാസകോശാർബുദത്തിന്റെ പ്രധാന കാരണങ്ങളിൽ ഒന്നായി ചൂണ്ടിക്കാണിക്കപ്പെടുന്നത് അനിയന്ത്രിതമായ പുകവലിയാണ്. പ്രത്യക്ഷമായും പരോക്ഷമായും ഉണ്ടാകുന്ന പുകവലിയുടെ ഫലങ്ങൾ ഈ രോഗത്തിന് കാരണമാകുന്നു. ഇത് വളരെ വേഗത്തിൽ മറ്റ് അവയവങ്ങളിലേക്ക് പടരുന്നു. 

യുകെയിൽ ആളുകളിൽ പിടിപെടുന്ന മൂന്നാമത്തെ അർബുദമാണ് ശ്വാസകോശ ക്യാൻസർ. ഓരോ വർഷവും ഏകദേശം 47,000 പേർക്ക് ഇത് കണ്ടെത്തുന്നു. അസാധാരണമായ ശാരീരിക മാറ്റങ്ങൾ മാരകമായ രോഗത്തെ സൂചിപ്പിക്കാം.  ഡോ. അമീർ ഖാൻ ശ്വാസകോശ അർബുദത്തിന്റെ ചില ലക്ഷണങ്ങളെ കുറിച്ച് ഐടിവിയുടെ ഗുഡ് മോർണിംഗ് ബ്രിട്ടൻ പ്രോ​ഗ്രാമിൽ പറഞ്ഞു.

നഖങ്ങളുടെ ആകൃതിയിലുള്ള മാറ്റങ്ങളാണ് ശ്വാസകോശ ക്യാൻസറിന്റെ പ്രധാന ലക്ഷണമായി ചൂണ്ടിക്കാട്ടുന്നത്. 
വിരലുകളുടെയും നഖങ്ങളുടെയും ആകൃതിയിലുള്ള ചില മാറ്റങ്ങളെ ഫിംഗർ ക്ലബിംഗ്, ഡിജിറ്റൽ ക്ലബിംഗ് അല്ലെങ്കിൽ ഹിപ്പോക്രാറ്റിക് ഫിംഗർ എന്നും അറിയപ്പെടുന്നു. ഇത് ശ്വാസകോശ ക്യാൻസറിന്റെ പ്രധാപ്പെട്ട ചില ലക്ഷണമാണെന്നും ഡോ. അമീർ പറഞ്ഞു.

'ഫിംഗർ ക്ലബിംഗ്' സാധാരണയായി രണ്ട് കൈകളിലെയും വിരലുകളുടെ മുകൾ ഭാഗത്തെ ബാധിക്കുന്നു. കൂടാതെ കാൽവിരലുകളെ ബാധിക്കാമെന്ന് ക്യാൻസർ റിസർച്ച് യുകെ വ്യക്തമാക്കുന്നു. പലപ്പോഴും ഹൃദയത്തിലോ ശ്വാസകോശത്തിലോ ഉണ്ടാകുന്ന ഓക്‌സിജന്റെ അളവ് ക്രമാതീതമായി കുറയുന്നതിന് കാരണമാകുന്ന രോഗത്തിന്റെ ലക്ഷണമാണ് കൈവിരലുളിൽ കാണുന്നത്. 

'ഫിംഗർ ക്ലബിംഗ്' വികസിപ്പിക്കുന്നതിന് സാധാരണയായി വർഷങ്ങളെടുക്കും. എന്നാൽ ശ്വാസകോശത്തിലെ കുരു പോലുള്ള ചില അവസ്ഥകളിൽ ഇത് വേഗത്തിൽ സംഭവിക്കാം..- കാൻസർ റിസർച്ച് യുകെ വ്യക്തമാക്കി. മൂന്നാഴ്ച കൂടി നീണ്ടുനിൽക്കുന്ന അകാരണമായ ചുമ  ഉണ്ടായാൽ ഒരു ഡോക്ടറെ കാണണമെന്നും ഡോ. അമീർ പറയുന്നു.

നഖം താഴേക്ക് വളയുകയും അത് തലകീഴായി നിൽക്കുന്ന സ്പൂണിന്റെ വൃത്താകൃതിയിലുള്ള ഭാഗം പോലെ കാണപ്പെടുന്നു. വിരലിന്റെ അവസാനഭാഗം വലുതോ വീർത്തതോ ആയതായി കാണപ്പെടാം. ഇത് ചുവപ്പ് നിറങ്ങളിൽ കാണുന്നു. ശ്വാസംമുട്ടൽ, ചുമയ്ക്കുമ്പോൾ രക്തം വരിക, വിട്ടുമാറാത്തതോ ആയ ചുമ, എല്ലാ സമയത്തും വളരെ ക്ഷീണം തോന്നുക, പെട്ടെന്ന് ഭാരം കുറയുക ഇതെല്ലാം ശ്വാസകോശ അർബുദത്തിന്റെ ചില പ്രധാനപ്പെട്ട ലക്ഷണങ്ങളായി സെന്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ ചൂണ്ടിക്കാട്ടുന്നു.

ശ്വാസകോശ അർബുദം പിടിപെടാതിരിക്കാൻ ശ്രദ്ധിക്കാം ഇക്കാര്യങ്ങൾ...

അർബുദ രോഗം വരാതിരിക്കാൻ ഏറ്റവും ഒഴിവാക്കപ്പെടെണ്ട ഒന്നാണ് പുകവലിയെന്നാണ് ലോകാരോഗ്യ സംഘടന സഹിതം വ്യക്തമാക്കിയിട്ടുളളത്. പുകവലിക്കുന്നതിലൂടെ ശ്വാസകോശാർബുദം വരാനുളള സാദ്ധ്യത കൂടുതലാണ്.

പുകവലിക്കുന്നതിനേക്കാൾ അപകടമാണ് മറ്റൊരാൾ വലിച്ച പുക ശ്വസിക്കുകയെന്നത്. ഇത്തരത്തിൽ ശ്വസിച്ചാൽ ഗുരുതരമായ ഹൃദയ, ശ്വാസകോശ സംബന്ധമായ രോഗങ്ങൾക്ക് അത് കാരണമാകും.

അന്തരീക്ഷത്തിൽ ഉളള പൊടിയും പുകയും ശ്വസിച്ച് അസുഖങ്ങൾ വരാതിരിക്കാൻ ശ്രദ്ധിക്കണം. ഇതിനായി പുറത്ത് പോകുമ്പോൾ ഫേസ്മാസ്ക് ധരിക്കണം. വീട്ടിൽ ആരോഗ്യകരമായ അന്തരീക്ഷവും നിങ്ങൾ ഉറപ്പാക്കണം.

ആരോഗ്യകരമായ ഭക്ഷണക്രമം മൊത്തത്തിലുള്ള ആരോഗ്യത്തിന് തന്നെ വലിയ മാറ്റം വരുത്തും. കൃത്യമായ സമയത്ത് ആഹാരം കഴിക്കുക, അതോടൊപ്പം ഭക്ഷണത്തിൽ പഴങ്ങളും പച്ചക്കറികളും പരമാവധി ഉൾപ്പെടുത്തണം.

ഭക്ഷണത്തിനൊപ്പം തന്നെ കൃത്യമായി വ്യായാമവും ചെയ്യേണ്ടതും വളരെ അത്യാവശ്യമാണ്. ഇത് നിങ്ങളുടെ ശാരീരികവും മാനസികവുമായ ആരോഗ്യത്തിന് നല്ലതാണ്.