100ൽ 100, 600ൽ 600; ഒരു ഉത്തരം പോലും തെറ്റിക്കാതെ 10-ാം ക്ലാസ് പരീക്ഷയിൽ മിന്നിച്ച് അര്‍ഷ, വിജയത്തിന് പിന്നിലെ കാരണങ്ങൾ

ഗുരുഗ്രാം മൗര്യ സ്കൂളിലെ വിദ്യാർത്ഥിനിയായ അർഷ സൈറ ജോഷി, സിബിഎസ്ഇ പത്താം ക്ലാസ് ബോർഡ് പരീക്ഷയിൽ 600-ൽ 600 മാർക്കും നേടി ചരിത്ര വിജയം കരസ്ഥമാക്കി. മനപ്പാഠമാക്കാതെ ആശയങ്ങൾ ഉൾക്കൊണ്ട് പഠിച്ചതും മാതാപിതാക്കളുടെയും അധ്യാപകരുടെയും പിന്തുണയുമാണ് തന്‍റെ വിജയത്തിന് പിന്നിലെന്ന് അർഷ പറയുന്നു.

ഗുരുഗ്രാം: സിബിഎസ്ഇ പത്താം ക്ലാസ് ബോർഡ് പരീക്ഷയിൽ അവിശ്വസനീയമായ നേട്ടം കൈവരിച്ച് ഗുരുഗ്രാം മൗര്യ സ്കൂളിലെ വിദ്യാർത്ഥിനി അർഷ സൈറ ജോഷി. പരീക്ഷ എഴുതിയ എല്ലാ വിഷയങ്ങളിലും നൂറിൽ നൂറ് മാർക്ക് നേടി 600-ൽ 600 എന്ന തിളക്കമാർന്ന സ്കോറോടെയാണ് അർഷ ഈ ചരിത്രനേട്ടം സ്വന്തമാക്കിയത്. അച്ചടക്കവും കഠിനാധ്വാനവും കൃത്യമായ ആസൂത്രണവും ഉണ്ടെങ്കിൽ ഏത് വലിയ ലക്ഷ്യവും കീഴടക്കാമെന്ന് ഈ കൊച്ചു മിടുക്കി തെളിയിച്ചിരിക്കുകയാണ്.

ഹൃദയസ്പർശിയായ ഈ വിജയനിമിഷത്തെ ഒരു സ്വപ്നസാക്ഷാത്കാരം എന്നാണ് അർഷ വിശേഷിപ്പിച്ചത്. തന്‍റെ വിജയത്തിന് പിന്നിൽ മാതാപിതാക്കളായ റിയ പോളിന്‍റെയും ആരോമൽ അമൽ ജോഷിയുടെയും സ്നേഹപൂർണ്ണമായ പിന്തുണയും അധ്യാപകരുടെ കൃത്യമായ മാർഗനിർദ്ദേശങ്ങളുമാണെന്ന് അർഷ നന്ദിയോടെ ഓർക്കുന്നു. പഠിക്കാൻ ഒരിക്കലും തന്നെ സമ്മർദ്ദത്തിലാക്കാത്ത മാതാപിതാക്കൾ നൽകിയ ആത്മവിശ്വാസമാണ് തന്‍റെ കരുത്തായതെന്ന് അർഷ പറഞ്ഞു. മനപ്പാഠം പഠിക്കുന്ന രീതിക്ക് പകരം ഓരോ പാഠഭാഗത്തിന്‍റെയും അടിസ്ഥാന തത്വങ്ങൾ മനസിലാക്കി പഠിക്കുന്ന ശൈലിയാണ് അർഷ സ്വീകരിച്ചത്. കൃത്യമായ നോട്ടുകൾ തയ്യാറാക്കിയും പാഠഭാഗങ്ങൾ ആവർത്തിച്ച് പഠിച്ചും നടത്തിയ തയ്യാറെടുപ്പുകൾ പരീക്ഷയിൽ വലിയ സഹായമായി.

സ്കൂളിലെ ചിട്ടയായ പഠനരീതിയും അധ്യാപകരുടെ വ്യക്തിപരമായ ശ്രദ്ധയും വിജയത്തിൽ നിർണ്ണായക പങ്കുവഹിച്ചു. പതിവായുള്ള മോഡൽ പരീക്ഷകളും കൃത്യമായ ഉത്തരസൂചികകൾ പിന്തുടർന്നുള്ള പരിശീലനവുമാണ് സ്പീഡും കൃത്യതയും വർദ്ധിപ്പിക്കാൻ സഹായിച്ചത്. പഠനത്തിനിടയിൽ മനസിന് ഉന്മേഷം നൽകാൻ ചെറിയ ഇടവേളകൾ എടുക്കാനും സംഗീതം ആസ്വദിക്കാനും അർഷ സമയം കണ്ടെത്തിയിരുന്നു. ഭാവിയിൽ സമൂഹത്തിന് ഉപകാരപ്രദമായ മികച്ച ഒരു കരിയർ കെട്ടിപ്പടുക്കുക എന്നതാണ് അർഷയുടെ ലക്ഷ്യം. നിരന്തരമായ പരിശ്രമവും ആത്മവിശ്വാസവും ഉണ്ടെങ്കിൽ വിജയം ഉറപ്പാണെന്ന് ഈ കൊച്ചു പ്രതിഭ തന്‍റെ ജൂനിയർ സുഹൃത്തുക്കളെ ഉപദേശിക്കുന്നു.