മുംബൈയിൽ സിജെപി പ്രതിഷേധത്തിനിടെ കുഴഞ്ഞുവീണ് മലയാളി വയോധികൻ മരിച്ചു

മുംബൈ ശിവാജി പാർക്കിൽ നടന്ന പ്രതിഷേധ പരിപാടിക്കിടെ തിരുവനന്തപുരം സ്വദേശിയായ വയോധികൻ കുഴഞ്ഞുവീണ് മരിച്ചു. മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് നടന്ന റാലിയിൽ പങ്കെടുക്കവെയാണ് ഗോപാലകൃഷ്ണ സുബ്ബയ്യ പിള്ളയ്ക്ക് നെഞ്ചുവേദന അനുഭവപ്പെട്ടത്. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

മുംബൈ: മുംബൈയിലെ ശിവാജി പാർക്കിൽ കോക്രോച് ജനത പാർടി സംഘടിപ്പിച്ച പ്രതിഷേധ പരിപാടിക്കിടെ മലയാളി വയോധികൻ കുഴഞ്ഞുവീണ് മരിച്ചു. താനെയിൽ താമസിക്കുന്ന തിരുവനന്തപുരം സ്വദേശി ഗോപാലകൃഷ്ണ സുബ്ബയ്യ പിള്ള (75) ആണ് മരിച്ചത്. ഇന്നലെ വൈകുന്നേരമായിരുന്നു സംഭവം.

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ടുള്ള പ്രതിഷേധ റാലിയിൽ പങ്കെടുക്കുന്നതിനായി താനെയിൽ നിന്ന് ദാദറിലെ ശിവാജി പാർക്കിൽ ഇന്നലെ വൈകിട്ട് 4:30 ഓടെയാണ് അദ്ദേഹം എത്തിയത്. വൈകുന്നേരം 5 മണിയോടെ ഇദ്ദേഹത്തിന് കടുത്ത നെഞ്ചുവേദന അനുഭവപ്പെട്ടു. കൂടെയുണ്ടായിരുന്ന സുഹൃത്തുക്കളുടെയും സ്ഥലത്തുണ്ടായിരുന്ന പൊലീസിന്റെയും സഹായത്തോടെ ഇദ്ദേഹത്തെ ഉടൻ തന്നെ സമീപത്തുള്ള ശുശ്രൂഷ ആശുപത്രിയിൽ എത്തിച്ചു. ആശുപത്രിയിൽ എത്തിക്കുന്നതിന് മുൻപ് സംഭവസ്ഥലത്തുവെച്ച് ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥർ ഇദ്ദേഹത്തിന് പ്രാഥമിക ശുശ്രൂഷയുടെ ഭാഗമായി സി.പി.ആർ നൽകാൻ ശ്രമിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ ചികിത്സയിലിരിക്കെയാണ് മരണം സ്ഥിരീകരിച്ചത്. സംഭവത്തിൽ പോലീസ് കേസെടുത്തു.