ഇനി കുറഞ്ഞ ചെലവിൽ സാധാരണക്കാർക്കും ആകാശ യാത്ര, പോക്കറ്റിലൊതുങ്ങും ടിക്കറ്റ് ; പുതിയ 'ബേസിക്' ഫെയർ പ്രഖ്യാപിച്ച് എയർ ഇന്ത്യ

എയർ ഇന്ത്യ ആഭ്യന്തര റൂട്ടുകളിൽ യാത്രക്കാർക്കായി 'ബേസിക്' എന്ന പേരിൽ കുറഞ്ഞ നിരക്കിലുള്ള പുതിയ ടിക്കറ്റ് അവതരിപ്പിച്ചു. ഈ ടിക്കറ്റിൽ 15 കിലോ ചെക്ക്-ഇൻ ബാഗേജാണ് അനുവദിക്കുക. സൗജന്യ ചായയോ കാപ്പിയോ യാത്രാ മധ്യേ ലഭിക്കും. കുറഞ്ഞ ചിലവിൽ യാത്ര ചെയ്യാൻ ആഗ്രഹിക്കുന്നവരെ ലക്ഷ്യമിട്ടാണ് ഈ പുതിയ നിരക്ക് പരീക്ഷണാടിസ്ഥാനത്തിൽ നടപ്പിലാക്കുന്നത്.

ആഭ്യന്തര റൂട്ടുകളിൽ യാത്രക്കാർക്കായി കുറഞ്ഞ നിരക്കിലുള്ള പുതിയ 'ബേസിക്' (Basic) ടിക്കറ്റ് നിരക്കുകൾ പ്രഖ്യാപിച്ച് എയർ ഇന്ത്യ. വിമാന ടിക്കറ്റിനൊപ്പം ലഭിക്കുന്ന ചില അധിക സേവനങ്ങൾ ഒഴിവാക്കിക്കൊണ്ട്, ടിക്കറ്റ് നിരക്ക് പരമാവധി കുറച്ച് യാത്രക്കാർക്ക് കൂടുതൽ ലാഭകരമായ യാത്രയൊരുക്കുകയാണ് എയർ ഇന്ത്യ ഇതിലൂടെ ലക്ഷ്യമിടുന്നത്. പരീക്ഷണാടിസ്ഥാനത്തിൽ തിരഞ്ഞെടുത്ത ചില ആഭ്യന്തര റൂട്ടുകളിലെ ഇക്കോണമി ക്ലാസുകളിലാണ് ഈ പുതിയ നിരക്ക് നിലവിൽ വരുന്നത്. കുറഞ്ഞ ചിലവിൽ യാത്ര ചെയ്യാൻ ആഗ്രഹിക്കുന്നവർക്കും വിമാനത്തിലെ മറ്റ് ആനുകൂല്യങ്ങൾ ആവശ്യമില്ലാത്തവർക്കും വേണ്ടിയാണ് കമ്പനി ഈ പുതിയ പാക്കേജ് അവതരിപ്പിച്ചിരിക്കുന്നത്.

പുതിയ മാറ്റങ്ങൾ എന്തൊക്കെ?

ബാഗേജ് പരിധി: 'ബേസിക്' നിരക്കിൽ ടിക്കറ്റ് എടുക്കുന്ന യാത്രക്കാർക്ക് 15 കിലോഗ്രാം ചെക്ക്-ഇൻ ബാഗേജും 7 കിലോഗ്രാം ക്യാബിൻ ബാഗേജും സൗജന്യമായി കൊണ്ടുപോകാം.

ഭക്ഷണം ഉണ്ടാകില്ല: ഈ ടിക്കറ്റുകളിൽ വിമാനത്തിനുള്ളിൽ വെച്ചുള്ള സൗജന്യ ഭക്ഷണം ഉൾപ്പെടുത്തിയിട്ടില്ല. എന്നാൽ യാത്രക്കാർക്ക് സൗജന്യമായി ചായയോ കാപ്പിയോ ലഭിക്കും.

ഭക്ഷണം മുൻകൂട്ടി ബുക്ക് ചെയ്യാം: ഭക്ഷണം ആവശ്യമുള്ളവർക്ക് വിമാനം പുറപ്പെടുന്നതിന് 24 മണിക്കൂർ മുമ്പ് വരെ അധിക തുക നൽകി വെജിറ്റേറിയൻ, നോൺ-വെജിറ്റേറിയൻ, ജെയിൻ, ഡയബറ്റിക് തുടങ്ങിയ ഭക്ഷണങ്ങൾ പ്രീ-ബുക്ക് ചെയ്യാവുന്നതാണ്.

വിമാനത്തിന്റെ സമയം മാറിയാൽ ?

ഏതെങ്കിലും കാരണവശാൽ വിമാനത്തിന്റെ സമയം മാറുകയോ യാത്രക്കാരെ മറ്റ് വിമാനങ്ങളിലേക്ക് മാറ്റുകയോ ചെയ്താൽ, അവർ ഓർഡർ ചെയ്ത ഭക്ഷണം പുതിയ വിമാനത്തിലേക്ക് ഓട്ടോമാറ്റിക്കായി മാറ്റും. ഭക്ഷണം ലഭ്യമാക്കാൻ സാധിക്കാത്ത സാഹചര്യത്തിൽ തുക പൂർണമായി റീഫണ്ട് ചെയ്യും.

നിലവിലെ നിരക്കുകളിൽ നിന്നുള്ള വ്യത്യാസം

എയർ ഇന്ത്യയിൽ നിലവിലുള്ള Value, Classic, Flex എന്നീ മൂന്ന് കാറ്റഗറികൾക്ക് പുറമെ നാലാമതായാണ് 'Basic' ഫെയർ എത്തുന്നത്. പഴയ മൂന്ന് കാറ്റഗറികളിലും സൗജന്യ ഭക്ഷണവും മറ്റ് ആനുകൂല്യങ്ങളും തുടർന്നും ലഭിക്കും. പുതിയ 'ബേസിക്' നിരക്ക് തികച്ചും ഓപ്ഷണൽ മാത്രമാണെന്നും ഇത് നിലവിലെ നിരക്കുകളെ ബാധിക്കില്ലെന്നും എയർ ഇന്ത്യ വ്യക്തമാക്കി.

നിലവിൽ എയർ ഇന്ത്യയുടെ നേരിട്ടുള്ള ബുക്കിംഗ് ചാനലുകൾ വഴി മാത്രമേ 'ബേസിക്' ടിക്കറ്റുകൾ ലഭ്യമാകൂ. എയർ ഇന്ത്യ വെബ്‌സൈറ്റ്, എയർ ഇന്ത്യ മൊബൈൽ ആപ്പ്, കസ്റ്റമർ കോൺടാക്റ്റ് സെന്റർ, എയർപോർട്ട് ടിക്കറ്റിംഗ് ഓഫീസുകൾ എന്നിവ വഴി ബുക്കിംഗ് നടത്താം. യാത്രക്കാരുടെ പ്രതികരണങ്ങളും ഫീഡ്‌ബാക്കും വിലയിരുത്തിയ ശേഷമായിരിക്കും ഈ സേവനം മറ്റ് റൂട്ടുകളിലേക്ക് വ്യാപിപ്പിക്കുന്ന കാര്യത്തിൽ എയർ ഇന്ത്യ അന്തിമ തീരുമാനമെടുക്കുക. ലഗേജ് കുറവുള്ളവർക്കും വിമാനത്തിൽ നിന്ന് ഭക്ഷണം കഴിക്കാൻ താല്പര്യമില്ലാത്തവർക്കും വളരെ കുറഞ്ഞ ചിലവിൽ യാത്ര ചെയ്യാൻ പുതിയ മാറ്റം സഹായിക്കും. എന്നാൽ ടിക്കറ്റ് ബുക്ക് ചെയ്യുമ്പോൾ ബാഗേജ് പരിധിയും മറ്റ് ചാർജുകളും കൃത്യമായി പരിശോധിച്ച് ഉറപ്പുവരുത്തണമെന്ന് അധികൃതർ അറിയിക്കുന്നു.