ബംഗാൾ തെരഞ്ഞെടുപ്പിന് കനത്ത സുരക്ഷ; പോളിംഗ് ബൂത്തുകൾ കാക്കാൻ 480 കമ്പനി കേന്ദ്ര സേന, അതീവ ജാഗ്രത

ആദ്യ ഘട്ടത്തിൽ എത്തിയ 240 കമ്പനി സേനയിൽ വിവിധ വിഭാഗങ്ങളിൽ നിന്നുള്ള ഉദ്യോഗസ്ഥർ ഉൾപ്പെടുന്നുണ്ട്. ഇതിൽ ഏറ്റവും കൂടുതൽ പ്രാധാന്യം നൽകിയിരിക്കുന്നത് സിആർപിഎഫിനാണ് (CRPF).

ദില്ലി: നിയമസഭാ തെരഞ്ഞെടുപ്പിന് മുന്നോടിയായി ബംഗാളില്‍ വന്‍ സുരക്ഷാ സന്നാഹങ്ങളുമായി കേന്ദ്ര ആഭ്യന്തര മന്ത്രാലയം. തെരഞ്ഞെടുപ്പ് മുന്നില്‍ക്കണ്ട് 480 കമ്പനി അർദ്ധസൈനിക വിഭാഗത്തെയാണ് ബംഗാളിൽ വിന്യസിച്ചിരിക്കുന്നത്. തെരഞ്ഞെടുപ്പ് കാലത്ത് ഉണ്ടാകാൻ സാധ്യതയുള്ള അക്രമസംഭവങ്ങൾ തടയാനും സമാധാനപരമായ വോട്ടിംഗ് ഉറപ്പുവരുത്തുന്നതിനും വേണ്ടിയാണ് ഇത്രയും വിശാലമായ സേനാവിഭാഗത്തെ കേന്ദ്രം നിയോഗിച്ചിരിക്കുന്നത്. 

ഈ സുരക്ഷാ വിന്യാസം പ്രധാനമായും രണ്ട് ഘട്ടങ്ങളിലായാണ് നടപ്പിലാക്കിയിരിക്കുന്നത്. ആദ്യ ഘട്ടമെന്ന നിലയിൽ 240 കമ്പനി അർദ്ധസൈനികരെ മാര്‍ച്ച് ഒന്ന് മുതൽ വിന്യസിച്ചു. ബാക്കിയുള്ള 240 കമ്പനികളെ മാര്‍ച്ച് 10-ഓടെ സംസ്ഥാനത്തിന്റെ വിവിധ ഭാഗങ്ങളിൽ എത്തിച്ചു. ഇത് സംബന്ധിച്ച ഔദ്യോഗിക വിവരം കേന്ദ്ര ആഭ്യന്തര മന്ത്രാലയം പശ്ചിമ ബംഗാൾ ചീഫ് സെക്രട്ടറിക്കും ഡിജിപിക്കും കത്തിലൂടെ കൈമാറിയിട്ടുണ്ട്.

ആദ്യ ഘട്ടത്തിൽ എത്തിയ 240 കമ്പനി സേനയിൽ വിവിധ വിഭാഗങ്ങളിൽ നിന്നുള്ള ഉദ്യോഗസ്ഥർ ഉൾപ്പെടുന്നുണ്ട്. ഇതിൽ ഏറ്റവും കൂടുതൽ പ്രാധാന്യം നൽകിയിരിക്കുന്നത് സിആർപിഎഫിനാണ് (CRPF). 110 കമ്പനി സിആർപിഎഫ് ജവാന്മാരെയാണ് ഈ ഘട്ടത്തിൽ നിയോഗിച്ചിരിക്കുന്നത്. കൂടാതെ അതിർത്തി രക്ഷാസേനയായ ബിഎസ്എഫിന്റെ (BSF) 55 കമ്പനികളും സിഐഎസ്എഫിന്റെ (CISF) 21 കമ്പനികളും ഇതിലുണ്ടാകും. ഇൻഡോ-ടിബറ്റൻ ബോർഡർ പോലീസിന്റെയും (ITBP) സശസ്ത്ര സീമ ബല്ലിന്റെയും (SSB) 27 കമ്പനികൾ വീതം സുരക്ഷാ ചുമതലകൾക്കായി ബംഗാളിലെത്തി.

വടക്കൻ ബംഗാളിലെ എട്ട് ജില്ലകളിലും അതീവ ജാഗ്രത പുലർത്താനാണ് തീരുമാനം. തന്ത്രപ്രധാനമായ ഡാർജിലിംഗ്, കലിംപോങ് മലയോര മേഖലകളിൽ പ്രത്യേക സുരക്ഷാ ക്രമീകരണങ്ങൾ ഏർപ്പെടുത്തും. തെരഞ്ഞെടുപ്പ് പ്രചാരണ വേളയിലും വോട്ടെടുപ്പ് ദിവസവും വോട്ടർമാരിലുണ്ടാകാൻ സാധ്യതയുള്ള ഭീതി അകറ്റുന്നതിനും നിഷ്പക്ഷമായ പോളിംഗ് ഉറപ്പാക്കുന്നതിനും കേന്ദ്ര സേനയുടെ സാന്നിധ്യം സഹായിക്കുമെന്നാണ് കേന്ദ്ര സർക്കാർ കണക്കുകൂട്ടുന്നത്.