'ശരിക്കും വിറച്ചു പോയി'; മെട്രോ യാത്രയ്ക്കിടെ ഉണ്ടായ ദുരനുഭവം വിവരിച്ച് യുവതി; കേസെടുത്ത് അന്വേഷണം ആരംഭിച്ച് പൊലീസ്

ബെംഗളൂരുവിൽ മെട്രോ യാത്രയ്ക്കിടെ ഉണ്ടായ ദുരനുഭവം വിവരിക്കുന്ന യുവതിയുടെ വീഡിയോ വൈറലാകുന്നു. ഇക്കഴിഞ്ഞ ചൊവ്വാഴ്ച വൈകുന്നേരം നാലരയ്ക്കാണ് സംഭവം. പൊലീസ് കേസെടുത്ത് അന്വേഷണം ആരംഭിച്ചു.

ബെംഗളൂരു: ബെംഗളൂരുവിൽ മെട്രോയിൽ വെച്ച് യാത്രക്കാരൻ രഹസ്യമായി തൻ്റെ വീഡിയോ പക‍ർത്തിയെന്ന ആരോപണവുമായി യുവതി രം​ഗത്ത്. സൗപിക എന്ന യുവതി ആണ് താൻ നേരിട്ട ദുരനുഭവം സമൂഹമാധ്യമമായ ഇൻസ്റ്റ​ഗ്രാമിലൂടെ വെളിപ്പെടുത്തി രം​ഗത്തെത്തിയത്. മെട്രോയിൽ വെച്ച് യാത്രക്കാരൻ തൻ്റെ വീഡിയോ പകർത്തിയെന്നും ഇയാളിൽ നിന്ന് ഫോൺ പിടിച്ചുവാങ്ങിയെന്നും യുവതി പറയുന്നു. സെക്യൂരിറ്റിയുടെ കൈവശം ഏൽപ്പിച്ച ഫോൺ യാത്രക്കാരൻ തട്ടിപ്പറിച്ച് രക്ഷപ്പെടുകയായിരുന്നുവെന്നും യുവതി ദൃശ്യങ്ങൾ സഹിതം പങ്കുവെച്ച് വ്യക്തമാക്കി. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു.

ഇക്കഴിഞ്ഞ ചൊവ്വാഴ്ച വൈകുന്നേരം നാലരയ്ക്ക് വൈറ്റ്ഫീൽഡ് സ്റ്റേഷനിൽ മെട്രോ എത്തിയപ്പോഴാണ് സംഭവം നടന്നതെന്നാണ് യുവതി പറയുന്നത്. ശരിക്കും താൻ വിറച്ചുപോയെന്നും മെട്രോയിൽ വെച്ച് തൻ്റെ വീഡിയോ പക‍ർത്തിയ യാത്രക്കാരനെ കൈയോടെ പിടികൂടിയെന്നും യുവതി വീ‍ഡിയോയിൽ പറഞ്ഞു. യാത്രക്കാരനെ തടഞ്ഞ് എന്തിനാണ് തൻ്റെ വീഡിയോ പക‍ർത്തിയതെന്ന് യുവതി ചോദിക്കുന്നതും ഫോൺ പിടിച്ചുവാങ്ങി അൺലോക്ക് ചെയ്യാൻ ആവശ്യപ്പെടുന്നതും ദൃശ്യങ്ങളിലുണ്ട്. ലിഫ്റ്റിൽവെച്ച് ഇയാളോട് ഇക്കാര്യങ്ങൾ സോഷ്യൽ മീഡിയയിൽ പോസ്റ്റ് ചെയ്യുമെന്ന് യുവതി പറയുന്നതും യാത്രക്കാരൻ ക്ഷമ ചോദിക്കുന്നതും ദൃശ്യങ്ങളിൽ കാണാം.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

Someone was recording a female passenger on the Bengaluru Metro. She recorded him back, he escaped, but his face is clearly captured.

@BlrCityPolice, find him. Protect Bengaluru’s pride and safety. Zero tolerance. 🚨

@CPBlr @DgpKarnataka

#NammaBengaluru #NammaMetro https://t.co/7SGvb20KGY

— ಸನಾತನ (सनातन) (@sanatan_kannada) October 27, 2026

സെക്യൂരിറ്റി ഏൽപ്പിച്ച ഫോൺ തട്ടിപ്പറിച്ച് യാത്രക്കാരൻ രക്ഷപ്പെട്ടുവെന്നാണ് യുവതി വീഡിയോയിൽ പറയുന്നത്. "ഞാൻ അയാളുടെ ഫോൺ പിടിച്ചുവാങ്ങി സെക്യൂരിറ്റിക്ക് കൊടുത്തു, പക്ഷേ അയാൾ അത് തട്ടിയെടുത്ത് ഓടിപ്പോയി. ബെംഗളൂരുവിൽ ഉള്ളവരോട് അപേക്ഷിക്കുകയാണ്, ഈ മനുഷ്യനെ കണ്ടെത്തുക, അയാളുടെ കമ്പനിയും കുടുംബവും കണ്ടെത്തുക. ഞാൻ മെട്രോ സ്റ്റേഷനിൽ ഔദ്യോഗികമായി പരാതി നൽകിയിട്ടുണ്ട്. ഏഴ് ദിവസത്തിനകം നടപടിയുണ്ടാകുമെന്ന് അവർ പറഞ്ഞു"- യുവതി വീഡിയോയിൽ പറഞ്ഞു.

തൊലി പോലും പുറത്തു കാണാത്ത രീതിയിലുള്ള വസ്ത്രമാണ് താൻ ധരിച്ചിരുന്നതെന്നും യുവതി വീഡിയോയിൽ നിസ്സഹായതോടെ പറയുന്നുണ്ട്. വീഡിയോ സോഷ്യൽ മീഡിയയിൽ പ്രചരിച്ചതിന് പിന്നാലെ ബെംഗളൂരു സിറ്റി പൊലീസ് വിഷയത്തിൽ ഇടപെട്ടു. സംഭവത്തിൻ്റെ വിവരങ്ങൾ നൽകാൻ ഇൻസ്റ്റഗ്രാം പോസ്റ്റിൻ്റെ കമൻ്റ് ബോക്സിൽ പൊലീസ് യുവതിയോട് ആവശ്യപ്പെട്ടു. പിന്നീട്, സംഭവത്തിൽ എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചതായും പൊലീസ് അറിയിച്ചു.