ഇഷ്ടം പോലെ ചെലവഴിക്കാൻ പതിനായിരം കോടി രൂപയുടെ ബാങ്ക് ബാലന്‍സ്, ചെലവ് കുറവ്; ആശങ്കയില്ലാതെ ബിജെപി അധ്യക്ഷ പദത്തിൽ നിതിൻ നബിന്‍

തെരഞ്ഞെടുപ്പ് കമ്മീഷന് സമർപ്പിച്ച വാർഷിക ഓഡിറ്റ് റിപ്പോർട്ട് പ്രകാരം ബിജെപിക്ക് പതിനായിരം കോടി രൂപയോളം പണവും നിക്ഷേപവുമുണ്ട്. 2024-25ൽ തെരഞ്ഞെടുപ്പ് ചെലവ് ഇരട്ടിയായി 3,335.36 കോടി രൂപയിലെത്തി. 

ദില്ലി: തെരഞ്ഞെടുപ്പ് കമ്മീഷന് സമർപ്പിച്ച വാർഷിക ഓഡിറ്റ് റിപ്പോർട്ട് പ്രകാരം, ബിജെപിക്ക് ഏകദേശം 10,000 കോടി രൂപയുടെ പണവും നിക്ഷേപവും ഉണ്ടെന്ന് റിപ്പോർട്ട്. 2024-25 ൽ ബിജെപിയുടെ തെരഞ്ഞെടുപ്പ് പ്രചാരണ ചെലവ് മുൻ വർഷത്തെ 1,754.06 കോടിയിൽ നിന്ന് ഏകദേശം ഇരട്ടിയായി 3,335.36 കോടി രൂപയിലെത്തി. 2024-25 ൽ ബിജെപിയുടെ പണത്തിലും നിക്ഷേപത്തിലും 2,882.32 കോടി രൂപയുടെ അറ്റ ​​വർദ്ധനവുമുണ്ടായി. 2025 മാർച്ച് 31 ന് അവസാനിച്ച സാമ്പത്തിക വർഷത്തെ പാർട്ടിയുടെ അക്കൗണ്ടുകളിൽ ജനറൽ ഫണ്ട് ക്ലോസിംഗ് ബാലൻസ് 12,164 കോടി രൂപയാണെന്ന് കാണിക്കുന്ന. മുൻ വർഷം,9169 കോടി രൂപയായിരുന്നു. ജനറൽ ഫണ്ടിൽ 9,996 കോടി രൂപ പണമായും ബാങ്ക് നിക്ഷേപമായും പാർട്ടി നൽകിയ വായ്പകളായും മുൻകൂർ തുകയായും 234.11 കോടി രൂപയും ഉൾപ്പെടുന്നു. ചൊവ്വാഴ്ച ചുമതലയേറ്റ പുതുതായി നിയമിതനായ ബിജെപി പ്രസിഡന്റ് നിതിൻ നബിനായിരിക്കും കാര്യക്കാരന്‍. 

2024-25 കാലയളവിൽ ബിജെപിക്ക് സംഭാവനയായി 6,125 കോടി രൂപ ലഭിച്ചു. മുൻ വർഷം 3,967 കോടി രൂപയായിരുന്നു. 9,390 കോടി രൂപയുടെ സ്ഥിര നിക്ഷേപങ്ങളോടൊപ്പം, 2024-25 ൽ നിക്ഷേപങ്ങൾക്ക് ബാങ്കുകളിൽ നിന്ന് പലിശയായി 634 കോടി രൂപയും ബിജെപിക്ക് ലഭിച്ചു. 2024-25 ൽ ബിജെപി 65.92 കോടി രൂപയുടെ ആദായനികുതി റീഫണ്ട് ഫയൽ ചെയ്തു. അതിൽ 4.40 കോടി രൂപയുടെ പലിശ വരുമാനം ലഭിച്ചു. 2024-25 ലെ പാർട്ടിയുടെ മൊത്തം ചെലവിന്റെ 88.36 ശതമാനവും തെരഞ്ഞെടുപ്പ് ചെലവാണ്.

2024-25 ലെ തെരഞ്ഞെടുപ്പുകൾക്കായി ചെലവഴിച്ച 3,335.36 കോടി രൂപയിൽ, സ്ഥാനാർത്ഥികൾക്ക് സാമ്പത്തിക സഹായം നൽകുന്നതിനായി 312.9 കോടി രൂപയും വിമാനങ്ങളിലും ഹെലികോപ്റ്ററുകളിലും യാത്ര ചെയ്യുന്നതിനായി 583 കോടി രൂപയും ബിജെപി ചെലവഴിച്ചു. ഇലക്‌ട്രോണിക് മാധ്യമങ്ങളുടെ പരസ്യത്തിനും തെരഞ്ഞെടുപ്പ് പ്രചാരണത്തിനുമായി 1,125 കോടി രൂപയും കട്ടൗട്ടുകൾ, ഹോർഡിംഗുകൾ, ബാനറുകൾ എന്നിവയ്ക്കായി 107 കോടി രൂപയും അച്ചടിച്ച മെറ്റീരിയലുകൾക്കായി 123 കോടി രൂപയും ചെലവഴിച്ചു. പരസ്യങ്ങൾക്കായി 897 കോടി രൂപയും റാലികൾക്കും പ്രചാരണങ്ങൾക്കുമായി 90.93 കോടി രൂപയും യോഗ ചെലവുകൾക്കായി 51.72 കോടി രൂപയും ചെലവഴിച്ചതായി റിപ്പോർട്ടിൽ പറയുന്നു.