ജി20 ലോ​ഗോയിലെ താമര; ട്വിറ്ററിൽ പോരടിച്ച് കോൺ​​ഗ്രസും ബിജെപിയും

ബിജെപി തെരഞ്ഞെടുപ്പ് ചിഹ്നം ജി20 ചിഹ്നമായി ഉപയോ​ഗിക്കുന്നത് ഞെട്ടലുണ്ടാക്കിയെന്ന് കോൺ​ഗ്രസ് നേതാവ് ജയറാം രമേശ് ട്വീറ്റ് ചെയ്തു. നെഹ്റുവിന്റെ കാലത്ത് താമര ദേശീയ ചിഹ്നമായി തെരഞ്ഞെടുത്തപ്പോൾ കോൺ​ഗ്രസിന് ഞെട്ടലുണ്ടായിരുന്നില്ലേ എന്ന് ബിജെപി മറുപടി ട്വീറ്റ് ചെയ്തു. 

ദില്ലി: ജി20 അധ്യക്ഷസ്ഥാനം ഏറ്റെടുക്കുന്നതിന്റെ ഭാ​ഗമായി ഇന്ത്യ പുറത്തിറക്കിയ പുതിയ ലോ​ഗോയിൽ താമരച്ചിഹ്നം ഉള്ളതിനെച്ചൊല്ലി കോൺ​ഗ്രസ്- ബി ജെ പി പോര്. ബിജെപി തെരഞ്ഞെടുപ്പ് ചിഹ്നം ജി20 ചിഹ്നമായി ഉപയോ​ഗിക്കുന്നത് ഞെട്ടലുണ്ടാക്കിയെന്ന് കോൺ​ഗ്രസ് നേതാവ് ജയറാം രമേശ് ട്വീറ്റ് ചെയ്തു. നെഹ്റുവിന്റെ കാലത്ത് താമര ദേശീയ ചിഹ്നമായി തെരഞ്ഞെടുത്തപ്പോൾ കോൺ​ഗ്രസിന് ഞെട്ടലുണ്ടായിരുന്നില്ലേ എന്ന് ബിജെപി മറുപടി ട്വീറ്റ് ചെയ്തു. 

70 വർഷം മുമ്പ് കോൺ​ഗ്രസ് പതാക ദേശീയ പതാകയാക്കാനുള്ള ശുപാർശ ജവഹർലാൽ നെഹ്റു നിരസിച്ചതാണ്. ബിജെപി ഇപ്പോൾ അവരുടെ തെരഞ്ഞെടുപ്പ് ചിഹ്നം ജി20 പ്രസിഡൻസിയിൽ ഇന്ത്യയുടെ ഔദ്യോ​ഗിക ചിഹ്നമാക്കിയിരിക്കുകയാണ്. ഞെട്ടിപ്പിക്കുന്ന കാര്യമാണ്. പാർട്ടി പ്രചാരണത്തിനുള്ള ഒരവസരവും മോദിയും ബിജെപിയും വിട്ടുകളയില്ലെന്ന് മനസിലായല്ലോ. ജയറാം രമേശ് ട്വീറ്റ് ചെയ്തു. 

ഇൻഫർമേഷൻ & ബ്രോഡ്കാസ്റ്റിംഗ് മന്ത്രാലയം സീനിയർ അഡ്വൈസർ കാഞ്ചൻ ​ഗുപ്ത മറുപടി ട്വീറ്റിൽ കോൺ​ഗ്രസിനെതിരെ ആഞ്ഞടിച്ചു. 60 വർഷം മുമ്പ് ജവഹർലാൽ നെഹ്റു പ്രധാനമന്ത്രിയായിരുന്നപ്പോഴാണ് താമര ദേശീയ ചിഹ്നമാക്കിയത്. അന്ന് താങ്കൾക്ക് ഞെട്ടലില്ലായിരുന്നോ. അതുമാത്രമല്ല കോൺ​ഗ്രസ് സർക്കാരുകൾ താമര ചിഹ്നം നാണയങ്ങളിൽ അച്ചടിച്ചിട്ടുമുണ്ടല്ലോ, അദ്ദേഹം ട്വീറ്റ് ചെയ്തു. 

ചൊവ്വാഴ്ചയാണ് ജി20 അധ്യക്ഷതയ്ക്കുള്ള ഇന്ത്യയുടെ ലോ​ഗോ പ്രധാനമന്ത്രി നരേന്ദ്രമോദി പ്രകാശനം ചെയ്തത്. താമരപ്പൂവിലെ ഏഴിതളുകൾ ഏഴ് ഭൂഖണ്ഡങ്ങളുടെയും സം​ഗീതത്തിലെ ഏഴ് സ്വരങ്ങളുടെയും പ്രതികമാണെന്നും ലോകം ഐക്യത്തിലാണെന്ന സന്ദേശം പകരുന്നതാണെന്നും മോദി പറഞ്ഞിരുന്നു.  വസുധൈവ കുടുംബകം എന്നതാണ് ഇന്ത്യ ലോകത്തിന് നൽകുന്ന സ്നേഹസമ്മാനം. താമര ഇന്ത്യയുടെ സാംസ്കാരിക പൈതൃകത്തെയും ലോകത്തെ ഒന്നിപ്പിക്കാനുള്ള പ്രതീക്ഷയെയും സൂചിപ്പിക്കുന്നതാണെന്നും അദ്ദേഹം അഭിപ്രായപ്പെട്ടു.