'ബിജെപിയുടെ ലക്ഷ്യം വൺ ഇന്ത്യ': പാർട്ടി സ്ഥാപക ദിനത്തിൽ നരേന്ദ്രമോദി

ഇന്ത്യ മാറ്റത്തിന്റെ പാതയിലാണ് രാജ്യം അതിവേ​ഗം പുരോഗതിയിലേക്ക് കുതിക്കുകയാണ്. ബിജെപി ലക്ഷ്യങ്ങൾ തീരുമാനിക്കുകയും അത് നേടിയെടുക്കുകയും ചെയ്യുന്നുണ്ട്. 

ദില്ലി: പാർട്ടിയുടെ ലക്ഷ്യം വൺ ഇന്ത്യയാണെന്ന് ബിജെപി സ്ഥാപകദിനത്തിൽ പ്രധാനമന്ത്രി നരേന്ദ്രമോദി. ബിജെപി സ‍ർക്കാരുകളെ രാജ്യമാകമാനം വീണ്ടും ജനങ്ങൾ തെരഞ്ഞെടുക്കുകയാണ്. രാജ്യത്തിന്റെ ആവശ്യങ്ങൾ എപ്പോഴും തിരിച്ചറിയാനും നടപ്പാക്കാനും ബാധ്യതയും ജാ​ഗ്രതയും പുലർത്തണമെന്നും നരേന്ദ്രമോദി പ്രവർത്തകരോട് ആഹ്വാനം ചെയ്തു. ജനങ്ങൾക്ക് ബിജെപി സർക്കാരിൽ വിശ്വാസമുണ്ടെന്നും അദ്ദേഹം പറഞ്ഞു. 

ഇന്ത്യ മാറ്റത്തിന്റെ പാതയിലാണ് രാജ്യം അതിവേ​ഗം പുരോഗതിയിലേക്ക് കുതിക്കുകയാണ്. ബിജെപി ലക്ഷ്യങ്ങൾ തീരുമാനിക്കുകയും അത് നേടിയെടുക്കുകയും ചെയ്യുന്നുണ്ട്. വൺ ഇന്ത്യ എന്ന ലക്ഷ്യത്തിനായി ഇന്ത്യ പ്രയത്നിക്കുകയാണ്. അതേസമയം വോട്ടുബാങ്കിൻ്റെ രാഷ്ട്രീയമാണ് ഇപ്പോഴും ചിലർ കളിക്കുന്നതെന്ന് പ്രധാനമന്ത്രി കുറ്റപ്പെടുത്തി. ഈ വിവേചനം അവസാനിപ്പിക്കുമെന്ന് ബിജെപി പ്രതിജ്ഞ എടുത്തിട്ടുണ്ട്. കുടുംബ വാഴ്ച്ച ഇന്ത്യയെ തുലച്ചു. കുടുംബാധിപത്യം നിലനിൽക്കുന്ന പാർട്ടികൾ ഭരണഘടനയെ മാനിക്കുന്നില്ല. കുടുംബ വാഴ്ചയ്‌ക്കെതിരെ എല്ലാ സംസ്ഥാനങ്ങളിലും ബിജെപി പോരാടുമെന്നും മോദി പറഞ്ഞു.