നിയമങ്ങൾക്ക് കാറ്റിൽപറത്തി റോഡിലൂടെ റേസിങ്; തുരങ്കത്തിലൂടെ ചീറിപ്പാഞ്ഞത് ലംബോർഗിനിയും ബിഎംഡബ്ലുവും ഉൾപ്പെടെ, കേസ്

മുംബൈയിൽ തുരങ്കത്തിലൂടെ റേസിങ് നടത്തിയ സംഭവത്തിൽ കേസെടുത്ത് പൊലീസ്. വാഹനയാത്രികൻ ചിത്രീകരിച്ച ദൃശ്യങ്ങൾ പ്രചരിച്ചതിൻ്റെ അടിസ്ഥാനത്തിലാണ് പൊലീസ് നടപടി. സെപ്റ്റംബർ മൂന്നിന് രാത്രി 11:15 ഓടെ ആണ് സംഭവം.

മുംബൈ: മുംബൈയിൽ തുരങ്കത്തിലൂടെ ആഡംബര വാഹനങ്ങൾ റേസിങ് നടത്തിയ സംഭവത്തിൽ പൊലീസ് നടപടി. മുംബൈ സ്വദേശിയായ വാഹനയാത്രികൻ ചിത്രീകരിച്ച ദൃശ്യങ്ങൾ സോഷ്യൽ മീഡിയയിൽ വൈറലായതിന് പിന്നാലെ പൊലീസ് കേസെടുത്തു. വാഹനങ്ങളുടെ ഡ്രൈവർമാർക്കെതിരെ ആണ് കേസ് രജിസ്റ്റർ ചെയ്തത്. പൊലീസ് ഉദ്യോ​ഗസ്ഥൻ്റെ പരാതിയിലാണ് നടപടി. സംഭവത്തിൽ ഇതുവരെ ആരുടെയും അറസ്റ്റ് രേഖപ്പെടുത്തിയിട്ടില്ല. വാഹനങ്ങൾ തിരിച്ചറിഞ്ഞ പൊലീസ്, ഇവ ഉടൻതന്നെ കസ്റ്റഡിയിലെടുത്തേക്കും.

സെപ്റ്റംബർ മൂന്നിന് രാത്രി 11:15 ഓടെ മറൈൻ ഡ്രൈവിന് സമീപം കോസ്റ്റൽ റോഡിലെ തുരങ്കത്തിലൂടെ ആണ് അമിതവേഗതയിൽ ആഡംബര വാഹനങ്ങൾ ചീറിപ്പാഞ്ഞത്. ഏഴോളം ആഡംബര വാഹനങ്ങളാണ് തുരങ്കത്തിനുള്ളിലൂടെ നിയമങ്ങൾ ലംഘിച്ച് അമിതവേ​ഗതയിൽ പാഞ്ഞത്. ഇതിൽ ലംബോർഗിനി, ബിഎംഡബ്ലു എം2, ബിഎംഡബ്ലു സെഡ്4, വോക്ക്സ് വാ​ഗൺ വെർറ്റൂസ് എന്നീ കാറുകൾ ഉൾപ്പെടുന്നു.

മുംബൈയിൽ സ്ട്രീറ്റ് റേസിങ്ങിന് അനുമതിയില്ലെന്നിരിക്കെ ആണ് അപകടകരമായ സംഭവം അരങ്ങേറിയത്. അശ്രദ്ധമായി വാഹനമോടിച്ചതിനും (281) ജീവനോ വ്യക്തിസുരക്ഷയ്ക്കോ ഭീഷണിയുണ്ടാക്കിയതിനുമുള്ള (125) വകുപ്പുകൾ പ്രകാരമാണ് കേസ് രജിസ്റ്റർ ചെയ്തത്. ഈ വ‍ർഷം ആദ്യം ബെം​ഗളൂരുവിൽ ലംബോർഗിനി അശ്രദ്ധമായി ഓടിച്ചതിൽ പൊലീസ് സ്വമേധയാ കേസെടുത്തിരുന്നു.