മുഖ്യമന്ത്രി വിജയ് നേരിട്ടിറങ്ങി, ജനങ്ങൾക്ക് ഏറ്റവും വേണ്ട പദ്ധതികളിലൊന്ന് ഉഷാർ; കുറഞ്ഞ നിരക്കിൽ ഭക്ഷണം, അമ്മ കാന്‍റീനുകളിൽ വൻ ജനത്തിരക്ക്

തമിഴ്‌നാട് സർക്കാരിന്‍റെ പ്രത്യേക നവീകരണ പദ്ധതിയെ തുടർന്ന് ചെന്നൈയിലെ അമ്മ കാന്‍റീനുകളിൽ സന്ദർശകരുടെ എണ്ണത്തിൽ 55% വർദ്ധനവുണ്ടായി. ഭക്ഷണത്തിന്‍റെ ഗുണനിലവാരവും കാന്‍റീനുകളുടെ അടിസ്ഥാന സൗകര്യങ്ങളും മെച്ചപ്പെടുത്തിയതോടെ, പ്രതിദിനം എത്തുന്നവരുടെ എണ്ണം ഏപ്രിലിലെ 67,164-ൽ നിന്ന് 1.04 ലക്ഷത്തിലധികമായി ഉയർന്നു.

ചെന്നൈ: തമിഴ്‌നാട് സർക്കാരിന്‍റെ പ്രത്യേക നവീകരണ പദ്ധതിക്ക് പിന്നാലെ ചെന്നൈയിലെ 'അമ്മ കാന്‍റീനുകളിൽ' സന്ദർശകരുടെ എണ്ണത്തിൽ വൻ വർദ്ധനവ്. സബ്‌സിഡി നിരക്കിൽ ഭക്ഷണം നൽകുന്ന ഈ പദ്ധതി പരിഷ്‌കരിക്കാനുള്ള സംസ്ഥാന സർക്കാരിന്‍റെ തീരുമാനത്തിന് ശേഷമുള്ള മാസങ്ങളിൽ ദിനംപ്രതിയുള്ള ജനപങ്കാളിത്തത്തിൽ 55 ശതമാനത്തിന്‍റെ വർദ്ധനവാണ് രേഖപ്പെടുത്തിയത്. സാധാരണക്കാരായ തൊഴിലാളികൾ, നഗരത്തിലെ ജീവനക്കാർ, സാമ്പത്തികമായി പിന്നാക്കം നിൽക്കുന്നവർ എന്നിവർക്ക് കുറഞ്ഞ ചെലവിൽ ഭക്ഷണം ലഭ്യമാക്കുക എന്ന ലക്ഷ്യത്തോടെ 2013-ൽ മുൻ മുഖ്യമന്ത്രി ജെ ജയലളിതയാണ് അമ്മ കാന്‍റീനുകൾ ആരംഭിച്ചത്.

തമിഴ്‌നാടിന്‍റെ ഏറ്റവും ജനപ്രിയമായ ഈ സാമൂഹിക ക്ഷേമ പദ്ധതിയിൽ, മുഖ്യമന്ത്രി വിജയ് കഴിഞ്ഞ മെയ് മാസത്തിൽ പ്രഖ്യാപിച്ച സമഗ്രമായ നവീകരണ ഉത്തരവുകൾക്ക് ശേഷമാണ് സന്ദർശകരുടെ എണ്ണം കുതിച്ചുയർന്നത്. ഔദ്യോഗിക കണക്കുകൾ പ്രകാരം, ചെന്നൈ നഗരത്തിലെ 383 അമ്മ കാന്‍റീനുകളെ ആശ്രയിക്കുന്നവരുടെ ശരാശരി എണ്ണം ഏപ്രിൽ മാസത്തിലെ 67,164-ൽ നിന്നും നിലവിൽ 1.04 ലക്ഷത്തിലധികമായി ഉയർന്നു കഴിഞ്ഞു. ഭക്ഷണത്തിന്‍റെ ഗുണനിലവാരം, രുചി, കാന്‍റീനുകളുടെ മോശം അവസ്ഥ എന്നിവ ചൂണ്ടിക്കാണിച്ചുള്ള നിരവധി റിപ്പോർട്ടുകൾ പുറത്തുവന്നതിന് പിന്നാലെയാണ് 'തമിഴക വെട്രി കഴകം' സർക്കാർ ഈ നവീകരണ നടപടികൾക്ക് തുടക്കമിട്ടത്.

കാന്‍റീനുകളുടെ പ്രവർത്തനം നേരിട്ട് വിലയിരുത്തിയ മുഖ്യമന്ത്രി, ആവശ്യമായ ഇടങ്ങളിലെല്ലാം അടിയന്തരമായി അറ്റകുറ്റപ്പണികളും നവീകരണ പ്രവർത്തനങ്ങളും നടത്താൻ തദ്ദേശ സ്വയംഭരണ വകുപ്പിന് നിർദ്ദേശം നൽകുകയായിരുന്നു. മികച്ച സേവനം ഉറപ്പാക്കാൻ പല കേന്ദ്രങ്ങളിലെയും അടിസ്ഥാന സൗകര്യങ്ങൾ അടിയന്തരമായി പരിഷ്‌കരിക്കേണ്ടതുണ്ടെന്ന് സർക്കാർ വ്യക്തമാക്കിയിരുന്നു. ഇതിന്‍റെ ഭാഗമായി കേടുപാടുകൾ സംഭവിച്ച പാത്രങ്ങളും പഴകിയ അടുക്കള ഉപകരണങ്ങളും മാറ്റുന്നതിനും, പാചക സൗകര്യങ്ങൾ ആധുനികവൽക്കരിക്കുന്നതിനും, അറ്റകുറ്റപ്പണികളുടെ നിലവാരം വർദ്ധിപ്പിക്കുന്നതിനും ഉദ്യോഗസ്ഥർക്ക് കർശന നിർദ്ദേശം നൽകിയിട്ടുണ്ട്.

ഓരോ കേന്ദ്രത്തിന്‍റെയും അടിയന്തര ആവശ്യങ്ങൾ വിലയിരുത്തി സാധനങ്ങൾ വാങ്ങുന്നതും പണികൾ തീർക്കുന്നതും വേഗത്തിലാക്കാൻ പ്രാദേശിക ഭരണകൂടങ്ങളോട് ആവശ്യപ്പെട്ടിട്ടുണ്ട്. ഭക്ഷണത്തിന്‍റെ ഗുണനിലവാരവും ശുചിത്വവും കർശനമായി പാലിക്കാനും, കൃത്യമായ ഇടവേളകളിൽ പരിശോധനകൾ നടത്താനും, പൊതുജനങ്ങളുടെ പരാതികൾക്ക് ഉടനടി പരിഹാരം കാണാനും സർക്കാർ നിർദ്ദേശിച്ചിട്ടുണ്ട്. അടുക്കളകളുടെയും ഡൈനിംഗ് ഏരിയകളുടെയും വൃത്തിക്കാണ് നവീകരണ പരിപാടിയിൽ മുൻഗണന നൽകുന്നത്.

നിലവിൽ ഗ്രേറ്റർ ചെന്നൈ കോർപ്പറേഷന് കീഴിൽ 383 അമ്മ കാന്‍റീനുകളും, സംസ്ഥാനത്തെ മറ്റ് കോർപ്പറേഷനുകളിലും മുനിസിപ്പാലിറ്റികളിലുമായി 237 കാന്‍റീനുകളും പ്രവർത്തിക്കുന്നുണ്ട്. അടിസ്ഥാന സൗകര്യങ്ങളും പ്രവർത്തന നിലവാരവും മെച്ചപ്പെടുത്തിക്കൊണ്ട്, താങ്ങാനാവുന്ന വിലയിലുള്ള പോഷകസമൃദ്ധമായ ഭക്ഷണം അർഹരായവരിലേക്ക് തടസമില്ലാതെ എത്തിക്കുക എന്നതാണ് ഈ ആധുനികവൽക്കരണ ക്യാമ്പയിനിലൂടെ സർക്കാർ ലക്ഷ്യമിടുന്നത്.