പുനർജന്മത്തിനായി മൃതദേഹം 4 വർഷം സൂക്ഷിച്ചുവെച്ച് മക്കൾ, ദുർ​ഗന്ധം വന്നതോടെ പൊലീസിൽ പരാതി നൽകി നാട്ടുകാർ, സംഭവം മുംബൈ മലാഡിൽ

മൃതദേഹം ഫ്രീസറിൽ സൂക്ഷിക്കാൻ മാസം 1.6 ലക്ഷം രൂപ ചെലവാക്കി. സ്വാഭാവിക മരണമെന്നും ദീർഘകാലം മൃതദേഹം സൂക്ഷിച്ചതിൽ അസ്വഭാവികതയെന്നും പോലീസ് വ്യക്തമാക്കുന്നു.

മുംബൈ: മുംബൈ മലാഡിൽ പുനർജന്മത്തിനായി നാലുവർഷം സൂക്ഷിച്ച മൃതദേഹം കണ്ടെത്തി. 78 കാരന്റെ മൃതദേഹമാണ് പൂട്ടിയിട്ട കെട്ടിടത്തിൽ കണ്ടെത്തിയത്. കെട്ടിടത്തിൽ നിന്ന് ദുർഗന്ധം വമിച്ചതോടെ പ്രദേശവാസികൾ പരാതി നൽകുകയായിരിന്നു. പോലീസെത്തി പരിശോധന നടത്തിയതോടെ ഫ്രീസറിൽ നിന്നും മൃതദേഹം കണ്ടെത്തി. 2022 ൽ മരിച്ചയാളുടെ മൃതദേഹം മകനും മകളും ചേർന്ന് സൂക്ഷിക്കുകയായിരുന്നു. ഇതിനായി ഇവർ പ്രതിമാസം ഒന്നരലക്ഷം രൂപ ചെലവഴിച്ചതായി കണ്ടെത്തി. മരിച്ചയാളുടെ കുടുംബം മരണാനന്തര ജീവിതത്തിലും പുനർജന്മത്തിലും വിശ്വസിച്ചിരുന്നതായി പോലീസ് വ്യക്തമാക്കി. മകൾ യു എസിൽ നിന്നും മൃതദേഹം കൂടുതൽ നാൾ സൂക്ഷിക്കാനുളള വഴികൾ തേടിയതായും ഇവർ പറഞ്ഞു. സംഭവത്തിൽ പോലീസ് പ്രാഥമിക അന്വേഷണം തുടങ്ങി.