വഖഫ് ബില്ലിനെ ചൊല്ലി ജെപിസി യോഗത്തിൽ തർക്കം; തൃണമൂൽ എംപി ഗ്ലാസ് പൊട്ടിച്ചെന്ന് ആരോപണം, കൈക്ക് പരിക്ക്

വഖഫ് നിയമ ഭേദ​ഗതി ബില്ലിലെ സംയുക്ത പാർലമെന്ററി സമിതി യോ​ഗത്തിനിടെ ബിജെപി - തൃണമൂൽ എംപിമാർ തമ്മിൽ രൂക്ഷമായ വാക്പോര്

ദില്ലി: വഖഫ് നിയമ ഭേദ​ഗതി ബില്ലിലെ സംയുക്ത പാർലമെന്ററി സമിതി യോ​ഗത്തിൽ വാക്കേറ്റം. ബിജെപി എംപി അഭിജിത് ​ഗംഗോപാധ്യായയും തൃണമൂൽ കോൺ​ഗ്രസ് എംപി കല്യാൺ ബാനർജിയും തമ്മിലാണ് രൂക്ഷമായ വാക്കേറ്റമുണ്ടായത്. തർക്കത്തിനിടെ കല്യാൺ ബാനർജി കൈയിലുണ്ടായിരുന്ന ഗ്ലാസ് മേശയിൽ എറിഞ്ഞ് പൊട്ടിച്ചെന്നും, കല്യാൺ ബാനർജിയുടെ വിരലിന് മുറിവേറ്റെന്നും യോ​ഗത്തിൽ പങ്കെടുത്തവർ പറഞ്ഞു. പിന്നാലെ ജെപിസി യോഗത്തിൽ അപമര്യാദയായി പെരുമാറിയതിന് കല്യാൺ ബാനർജിയെ ഒരു ദിവസത്തേക്ക് സസ്പെൻ്റ് ചെയ്തു.

ജെപിസി ചെയർമാൻ ജ​ഗദംബികാ പാലിന് നേരെയാണ് ​ടിഎംസി എംപി ​ഗ്ലാസ് എറിഞ്ഞതെന്ന് ബിജെപി ആരോപിച്ചു. ഇത്തരത്തിൽ പെരുമാറുമെന്ന് സങ്കൽപിച്ചില്ലെന്ന് ജ​ഗദംബിക പാൽ എംപി പ്രതികരിച്ചു. ഇത്തരത്തിൽ മുന്നോട്ട് പോകണോയെന്ന് ടിഎംസി ആലോചിക്കണമെന്നും അദ്ദേഹം പറഞ്ഞു. കല്യാൺ ബാനർജിയെ സസ്പെൻഡ് ചെയ്യാൻ ബിജെപി എംപി നിഷികാന്ത് ദുബേ പ്രമേയം അവതരിപ്പിച്ചു. 8 നെതിരെ പത്ത് വാട്ടിന് പ്രമേയം പാസായി.

പരിക്കേറ്റ തൃണമൂൽ എംപിയെ പ്രതിപക്ഷ എംപിമാർ ചേർന്ന് ആശുപത്രിയിലെത്തിച്ച് ചികിത്സ നൽകി. വാക്കേറ്റത്തെ തുടർന്ന് യോ​ഗം നിർത്തിവച്ചു. ഇന്നത്തെ യോ​ഗത്തിൽ മുൻ ജഡ്ജിമാരും അഭിഭാഷകരും പങ്കെടുത്ത് നിയമ ഭേദ​ഗതിയിൽ വാദങ്ങൾ അവതരിപ്പിച്ചിരുന്നു. എന്നാൽ പ്രതിപക്ഷം ഇതിനെ ശക്തമായി എതിർത്തു. നിയമഭേദ​ഗതിയിൽ ഇവരുടെ അഭിപ്രായം പരി​ഗണിക്കേണ്ടതില്ലെന്ന് പ്രതിപക്ഷ അംഗങ്ങൾ വാദിച്ചതിനെ തുടർന്നാണ് തർക്കമുണ്ടായത്. ഇന്നലെ ചേർന്ന ജെപിസി യോ​ഗത്തിൽ നിന്നും പ്രതിപക്ഷം പ്രതിഷേധിച്ച് ഇറങ്ങി പോയിരുന്നു.