വനിതാ നേതാക്കളോടൊപ്പം എഎപിയിലേക്ക് കൂറുമാറി കോൺ​ഗ്രസ് നേതാവ്; മണിക്കൂറുകൾക്കകം തിരിച്ചെത്തി, ക്ഷമാപണം

മുസ്തഫാബാദിൽ നിന്ന് തെരഞ്ഞെടുക്കപ്പെട്ട കൗൺസിലർമാരായ സബീല ബീഗവും നാസിയ ഖാത്തൂൺ എന്നിവരും കോൺഗ്രസിൽ തിരിച്ചെത്തിയതായി അദ്ദേഹം പറഞ്ഞു.

ദില്ലി: ദില്ലിയിൽ എഎപിയിൽ ചേർന്നതിന് പിന്നാലെ പാർട്ടിയിലേക്ക് വീണ്ടും തിരിച്ചെത്തി കോൺ​ഗ്രസ് നേതാവ്. ദില്ലി കോൺഗ്രസ് വൈസ് പ്രസിഡന്റ് അലി മെഹ്ദിയാണ് ശനിയാഴ്ച പുലർച്ചെ ട്വിറ്ററിൽ മാപ്പുമായി എത്തിയത്. തന്റെ തെറ്റുകൾക്ക് മാപ്പ് പറയുന്നതായും അദ്ദേഹം പറഞ്ഞു. താൻ രാഹുൽ ​ഗാന്ധിയുടെ പ്രവർത്തകനാണെന്നും അദ്ദേഹം വ്യക്തമാക്കി. മുസ്തഫാബാദിൽ നിന്ന് തെരഞ്ഞെടുക്കപ്പെട്ട കൗൺസിലർമാരായ സബീല ബീഗവും നാസിയ ഖാത്തൂൺ എന്നിവരും കോൺഗ്രസിൽ തിരിച്ചെത്തിയതായി അദ്ദേഹം പറഞ്ഞു. നേരത്തെ വനിതാ നേതാക്കളും മെ​ഹ്ദിക്കൊപ്പം എഎപിയിൽ ചേർന്നിരുന്നു. 

ശനിയാഴ്ച പുലർച്ചെ ഒന്നരയോടെയാണ് അലി മെഹ്ദി കോൺ​ഗ്രസിലേക്ക് തിരിച്ചെത്തിയതായി അവകാശപ്പെട്ട് വീഡിയോ പുറത്തിറക്കിയത്. ഞാൻ ഒരു വലിയ തെറ്റ് ചെയ്തു. ഞാൻ ക്ഷമ പറയുന്നു. എന്റെ അച്ഛൻ 40 വർഷമായി കോൺഗ്രസിലാണ്. പാർട്ടി മാറിയ  മറ്റ് കൗൺസിലർമാരോട് വീഡിയോകൾ അപ്‌ലോഡ് ചെയ്യാൻ ആവശ്യപ്പെട്ടിട്ടു- അലി മെഹ്ദി പറഞ്ഞു. ബ്രിജ്പുരിയിൽ നിന്നുള്ള കൗൺസിലർ നാസിയ ഖാട്ടൂൻ, മുസ്തഫാബാദിൽ നിന്നുള്ള കൗൺസിലർ സബീല ബീഗം, ബ്ലോക്ക് പ്രസിഡന്റ് അലീം അൻസാരി എന്നിവരാണ് നേരത്തെ എഎപിയിൽ ചേർന്നത്. എഎപി നേതാക്കൾ പ്രലോഭിച്ചതുകൊണ്ടാണ് കോൺ​ഗ്രസ് വിട്ടതെന്ന് ഇവർ ആരോപിച്ചു. 

കോൺ​ഗ്രസ് വിട്ടതിന് പിന്നാലെ അലി മെഹ്ദിക്കെതിരെ രൂക്ഷവിമർശനമുയർന്നിരുന്നു. എഎപി നേതാക്കൾ കോൺ​ഗ്രസ് പ്രവർത്തകരെ വലവീശിപ്പിടിക്കുകയാണെന്ന് കോൺ​ഗ്രസ് ആരോപിച്ചു. മെഹ്ദി അലി പാമ്പിന്റെ സ്വഭാവം കാണിച്ചെന്ന് യൂത്ത് കോൺ​ഗ്രസ് വിമർശിച്ചു. ദില്ലി മുനിസിപ്പൽ കോർപ്പറേഷനിലേക്ക് (എംസിഡി) നടന്ന തെരഞ്ഞെടുപ്പിൽ ആം ആദ്മി പാർട്ടി (എഎപി) ബുധനാഴ്ച 134 സീറ്റുകൾ നേടി വിജയിച്ചിരുന്നു. ബിജെപി 104 സീറ്റുകൾ നേടിയപ്പോൾ കോൺഗ്രസിന് വെറും ഒമ്പത് വാർഡുകൾ മാത്രമാണ് നേടാനായത്.