CRPF Women Commandos : അമിത്ഷായ്ക്കും സോണിയാ ​ഗാന്ധിക്കും സുരക്ഷയൊരുക്കാൻ സിആ‍ർപിഎഫ് വനിതാ ഉദ്യോ​ഗസ്ഥ‍ർ

ജനുവരി രണ്ടാം വാരം മുതൽ 32 പേരെ കൂടി സിആർപിഎഫിന്റെ സുരക്ഷാ വിഭാ​ഗത്തിലേക്ക് നിയോ​ഗിക്കും.

ദില്ലി: കേന്ദ്ര ആഭ്യന്തരമന്ത്രി അമിത് ഷാ (Amit Shah) , കോൺഗ്രസ് നേതാക്കളായ സോണിയാ ഗാന്ധി(Sonia Gandhi), പ്രിയങ്കാ ഗാന്ധി (Priyanka Gandhi) എന്നിവരുടെ സുരക്ഷാ സേനയിൽ ഇനി വനിതാ സിആ‍ർപിഎഫുകാരും (CRPF Women Commandos). ആദ്യമായാണ് ഇവരുടെ സുരക്ഷാ ചുമതലയിലേക്ക് വനിതാ ഉദ്യോ​ഗസ്ഥരെ നിയോ​ഗിക്കുന്നത്. 

ജനുവരി രണ്ടാം വാരം മുതൽ 32 പേരെ കൂടി സിആർപിഎഫിന്റെ സുരക്ഷാ വിഭാ​ഗത്തിലേക്ക് നിയോ​ഗിക്കും. തുടർന്ന് ഇവരെ സുരക്ഷ നൽകേണ്ടവരുടെ വസതികളിലേക്ക് വിന്യസിക്കും - സിആ‍പിഎഫ് ഉന്നത ഉദ്യോ​ഗസ്ഥനെ ഉദ്ധരിച്ച് എൻഡിടിവി റിപ്പോ‍ർട്ട് ചെയ്യുന്നു. 

അദ്ദേഹം പറഞ്ഞതുപ്രകാരം മുൻ പ്രധാനമന്ത്രി മൻമോഹൻ സിം​ഗിന്റെ വസതിയിലേക്കും കുറച്ചുപേരെ വിന്യസിക്കും. മൻ മോഹൻ സിം​ഗിന്റെ ഭാര്യ ​ഗുരുചരൺ കൗറും സുരക്ഷ നൽകേണ്ടവരുടെ പട്ടികയിലാണുള്ളത്. അതിനാലാണ് സുരക്ഷാ പരിശോധനകൾക്കായി വനിതാ ഉദ്യോ​ഗസ്ഥരെ നിയോ​ഗിക്കുന്നത്. 

വിഐപി സുരക്ഷാ ഡ്യൂട്ടിക്കായുള്ള 10 ആഴ്ചത്തെ പരിശീശലനം ഇവ‍ർ പൂർത്തിയാക്കി കഴിഞ്ഞു. ജനുവരിയൽ ഇവരെ നിയോ​ഗിച്ചേക്കും. അതേസമയം വരാനിരിക്കുന്ന ഉത്ത‍ർപ്രദേശ് തെരഞ്ഞെടുപ്പിലും ആവശ്യമെങ്കിൽ വനിതാ സിആ‍ർപിഎഫ് ജീവനക്കാരെ നിയോ​ഗിക്കും.