രാജധാനി എക്സ്പ്രസിൽ തീപിടുത്തം, അപകടം രാജസ്ഥാനിലെ കോട്ടയ്ക്ക് സമീപം, ആളപായമില്ലെന്ന് പ്രാഥമിക വിവരം

കഴിഞ്ഞ വെള്ളിയാഴ്ചയാണ് ട്രെയിൻ തിരുവനന്തപുരത്ത് നിന്ന് പുറപ്പെട്ടത്. ബോ​ഗികൾ പൂർണമായി കത്തിയമർന്നു. 

ദില്ലി: തിരുവനന്തപുരം-ദില്ലി രാജധാനി എക്സ്പ്രസിൽ തീപിടുത്തം. രാജസ്ഥാനിലെ കോട്ടയ്ക്ക് സമീപെ വെച്ചാണ് അപകടമുണ്ടായത്. ബി വൺ എസി കോച്ച്, എൻജിൻ കംപാർട്ട്മെന്റുകളിലാണ് തീ പിടുത്തമുണ്ടായത്. കഴിഞ്ഞ വെള്ളിയാഴ്ചയാണ് ട്രെയിൻ തിരുവനന്തപുരത്ത് നിന്ന് പുറപ്പെട്ടത്. ബോ​ഗികൾ പൂർണമായി കത്തിയമർന്നു. പുലർച്ചെ അഞ്ചേകാലോടെയാണ് അപകടം. യാത്രക്കാരെ എല്ലാവരെയും ഒഴിപ്പിച്ചു. ആളപായമില്ലെന്നാണ് പ്രാഥമിക വിവരം. ബോഗിയും എഞ്ചിനും വേർപെടുത്തി. നിരവധി മലയാളിയാത്രക്കാരും ട്രെയിനിൽ ഉണ്ട്. മിനിയാന്ന് തിരുവനന്തപുരത്ത് നിന്ന് പുറപ്പെട്ട് ഇന്ന് ഉച്ചയോടെ ദില്ലിയിലെത്തേണ്ട ട്രെയിനായിരുന്നു. 2 ഫയർ എഞ്ചിനുകൾ സ്ഥലത്തെത്തി തീയണക്കാൻ ശ്രമം നടന്നുകൊണ്ടിരിക്കുകയാണ്. അപകടത്തെക്കുറിച്ച് അന്വേഷണം ആരംഭിച്ചതായി റെയിൽവേ അറിയിച്ചു.