പട്ടികയിൽ നിര്‍ണായക കൂടിക്കാഴ്ചകൾ, 4 പതിറ്റാണ്ടിന് ശേഷം ഇതാദ്യം ഇന്ത്യൻ പ്രധാനമന്ത്രി ന്യൂസിലാൻഡിലേക്ക്, ത്രിരാഷ്ട്ര സന്ദർശനത്തിന് ഇന്ന് തുടക്കം

പ്രധാനമന്ത്രി നരേന്ദ്ര മോദി ആറ് ദിവസത്തെ ത്രിരാഷ്ട്ര സന്ദർശനത്തിന് തുടക്കമിട്ടു. ഇന്തോനേഷ്യ, ഓസ്ട്രേലിയ, ന്യൂസിലാൻഡ് എന്നിവിടങ്ങളിലേക്കുള്ള ഈ യാത്രയുടെ ലക്ഷ്യം ഏഷ്യാ-പസഫിക് മേഖലയിലെ വ്യാപാര, പ്രതിരോധ ബന്ധങ്ങൾ ശക്തിപ്പെടുത്തലാണ്. സന്ദർശന വേളയിൽ, അദ്ദേഹം ഉഭയകക്ഷി ചർച്ചകളും ഇന്ത്യൻ സമൂഹവുമായുള്ള കൂടിക്കാഴ്ചകളും നടത്തും.

ദില്ലി: പ്രധാനമന്ത്രിയുടെ ത്രിരാഷ്ട്ര സന്ദർശനത്തിന് ഇന്ന് തുടക്കമാകും. ആറ് ദിവസത്തെ പര്യടനത്തിൽ ഇന്തോനേഷ്യ, ഓസ്ട്രേലിയ, ന്യൂസിലാൻഡ് എന്നീ രാജ്യങ്ങളാണ് അദ്ദേഹം സന്ദർശിക്കുന്നത്. ഏഷ്യാ-പസഫിക് മേഖലയിലെ സാന്നിധ്യം ശക്തമാക്കലും വ്യാപാര ബന്ധം ഊട്ടിയുറപ്പിക്കലുമാണ് ഈ നയതന്ത്ര നീക്കത്തിലൂടെ ലക്ഷ്യമിടുന്നത്. പ്രധാനമന്ത്രിയായ ശേഷം നരേന്ദ്ര മോദി ന്യൂസിലാൻഡിൽ എത്തുന്നത് ഇതാദ്യമായാണ്. പ്രതിരോധം, വ്യാപാരം, സാങ്കേതികവിദ്യകൾ, നിക്ഷേപം, സമുദ്ര സുരക്ഷ എന്നിവയിലെ സഹകരണത്തിലൂടെ തെക്കുകിഴക്കൻ ഏഷ്യയിലെയും പസഫിക്കിലെയും പ്രധാന രാജ്യങ്ങളുമായുള്ള ബന്ധം ദൃഢമാക്കാനാണ് ഈ സന്ദർശനം. മൂന്ന് രാജ്യങ്ങളിലെയും നേതാക്കളുമായി ഉഭയകക്ഷി ചർച്ചകൾ നടത്തുന്ന പ്രധാനമന്ത്രി, അവിടുത്തെ ബിസിനസ്സ് സമൂഹവുമായും ഇന്ത്യൻ വംശജരുമായും ആശയവിനിമയം നടത്തും. നരേന്ദ്ര മോദിയുടെ നാലാമത്തെ ഇന്തോനേഷ്യ സന്ദർശനവും, ഓസ്ട്രേലിയയിലേക്കുള്ള മൂന്നാമത്തെ ഉഭയകക്ഷി സന്ദർശനവുമാണിത്.

സന്ദർശനത്തിന്റെ ആദ്യ ഘട്ടത്തിൽ ഇന്തോനേഷ്യയിലെത്തുന്ന പ്രധാനമന്ത്രി അവിടെ പ്രസിഡന്റ് പ്രബൊവോ സുബിയാന്തോയുമായി ഉഭയകക്ഷി ചർച്ചകൾ നടത്തും. ഇന്ത്യയും ഇന്തോനേഷ്യയും തമ്മിലുള്ള നയതന്ത്ര ബന്ധം സ്ഥാപിച്ചതിന്റെ 75ാം വർഷത്തിലാണ് ഈ സന്ദർശനം നടക്കുന്നത്. സമുദ്ര സുരക്ഷ, പ്രതിരോധം, ഡിജിറ്റൽ സാങ്കേതികവിദ്യകൾ, ആരോഗ്യം, വിദ്യാഭ്യാസം, ബഹിരാകാശം, കണക്റ്റിവിറ്റി, വ്യാപാരം, നിക്ഷേപം എന്നിവയുൾപ്പെടെയുള്ള മേഖലകളിലെ സഹകരണം ആഴത്തിലാക്കുന്നതിനെക്കുറിച്ച് ഇരു നേതാക്കളും ചർച്ച ചെയ്യും. ജക്കാർത്തയിലേക്കുള്ള പ്രധാനമന്ത്രിയുടെ അവസാന സന്ദർശനം 2023-ലായിരുന്നു.

പര്യടനത്തിന്റെ രണ്ടാം ഘട്ടത്തിൽ ഓസ്ട്രേലിയ സന്ദർശിക്കുന്ന പ്രധാനമന്ത്രി, ഓസ്ട്രേലിയൻ പ്രധാനമന്ത്രി ആന്റണി അൽബനീസിനൊപ്പം വാർഷിക ലീഡേഴ്‌സ് സമ്മിറ്റിൽ പങ്കെടുക്കും. പ്രതിരോധ സഹകരണം, സമുദ്ര സുരക്ഷ, നിർണായക ധാതുക്കൾ, ശുദ്ധമായ ഊർജ്ജം, വളർന്നുവരുന്ന സാങ്കേതികവിദ്യകൾ, വിദ്യാഭ്യാസം, വിദഗ്ധരുടെ ചലനാത്മകത എന്നിവയ്ക്ക് ഉച്ചകോടിയിൽ പ്രത്യേക ശ്രദ്ധ നൽകും. ഇന്ത്യയും ഓസ്‌ട്രേലിയയും തമ്മിലുള്ള വ്യാപാര-നിക്ഷേപ ബന്ധങ്ങൾ കൂടുതൽ ആഴത്തിലാക്കുന്നതിനുള്ള കോംപ്രിഹെൻസീവ് ഇക്കണോമിക് കോഓപ്പറേഷൻ അഗ്രിമെന്റ് (CECA) സംബന്ധിച്ച ചർച്ചകളും അജണ്ടയിൽ ഉൾപ്പെടും. ഓസ്‌ട്രേലിയൻ ബിസിനസ്സ് കമ്മ്യൂണിറ്റിയുമായും അവിടെ താമസിക്കുന്ന ഇന്ത്യൻ കമ്മ്യൂണിറ്റിയുമായും പ്രധാനമന്ത്രി കൂടിക്കാഴ്ച നടത്തും.

പര്യടനത്തിന്റെ മൂന്നാം ഘട്ടം ന്യൂസിലാൻഡിലേക്കാണ്. നാല് പതിറ്റാണ്ടിലേറെക്കാലത്തിന് ശേഷം ആദ്യമായാണ് ഒരു ഇന്ത്യൻ പ്രധാനമന്ത്രി ന്യൂസിലാൻഡ് സന്ദർശിക്കുന്നത്. ന്യൂസിലാൻഡ് പ്രധാനമന്ത്രി ക്രിസ്റ്റഫർ ലക്സനുമായുള്ള ചർച്ചകളിൽ വ്യാപാരം, കൃഷി, വിദ്യാഭ്യാസം, സാങ്കേതികവിദ്യ, പുനരുപയോഗ ഊർജം, കായികം എന്നീ മേഖലകളിലെ സഹകരണവും നിക്ഷേപ ബന്ധങ്ങൾ ശക്തിപ്പെടുത്തുന്നതിനുള്ള സാധ്യതകളും ഇരു നേതാക്കളും ചർച്ച ചെയ്യും. ന്യൂസിലാൻഡിലെ അതിവേഗം വളരുന്ന വംശീയ വിഭാഗങ്ങളിലൊന്നായ പ്രവാസി ഇന്ത്യക്കാരുടെ വർദ്ധിച്ചുവരുന്ന പ്രാധാന്യവും ഈ സന്ദർശനം പ്രകടമാക്കും.