ബിജെപിയെ തൂത്തെറിയും; കോൺഗ്രസിനേ രാജ്യത്തെ രക്ഷിക്കാനാകൂ എന്നും ജി​ഗ്നേഷ് മേവാനി

കനയ്യകുമാറിന്റെയും തന്റെയും കോൺഗ്രസ് പ്രവേശം അതിന് സഹായിക്കും. ബിജെപിയെ തൂത്തെറിയും. കോൺഗ്രസിനേ രാജ്യത്തെ രക്ഷിക്കാനാകൂ. അതുകൊണ്ടാണ് കോൺഗ്രസിൽ ചേർന്നതെന്നും മേവാനി പറഞ്ഞു.

ദില്ലി: അടുത്ത തെരഞ്ഞെടുപ്പിൽ കോൺഗ്രസ് (Congress) വൻ മുന്നേറ്റമുണ്ടാക്കുമെന്ന് ജി​ഗ്നേഷ് മേവാനി (JIgnesh Mevani). കനയ്യകുമാറിന്റെയും (Kanhaiya Kumar)  തന്റെയും കോൺഗ്രസ് പ്രവേശം അതിന് സഹായിക്കും. ബിജെപിയെ (BJP)  തൂത്തെറിയും. കോൺഗ്രസിനേ രാജ്യത്തെ രക്ഷിക്കാനാകൂ. അതുകൊണ്ടാണ് കോൺഗ്രസിൽ ചേർന്നതെന്നും മേവാനി പറഞ്ഞു.

കനയ്യകുമാറിനൊപ്പമാണ് ​ജി​ഗ്നേഷ് മേവാനി എഐസിസി ആസ്ഥാനത്തെത്തി കോൺ​ഗ്രസിനോട് കൂറ് പ്രഖ്യാപിച്ചത്. ​ഗുജറാത്ത് നിയമസഭയിലെ സ്വതന്ത്ര എംഎൽഎയായ ജി​ഗ്നേഷ് മേവാനിക്ക് പാ‍ർട്ടി അം​ഗത്വം സ്വീകരിക്കാൻ കൂറുമാറ്റ നിരോധനനിയമം തടസ്സമായതിനാൽ അടുത്ത നിയമസഭാ തെരഞ്ഞെടുപ്പ് വരെ അദ്ദേഹം കോൺ​ഗ്രസ് സഹയാത്രികനായി പ്രവർത്തിക്കും. 

കനയ്യകുമാറിനേയും ജി​ഗ്നേഷ് മേവാനിയേയും സ്വാഗതം ചെയ്തുള്ള ഫ്ലക്സ് ബോര്‍ഡുകള്‍ നിറഞ്ഞ എഐസിസി ആസ്ഥാനത്തേക്ക് വൈകിട്ട് അഞ്ച് മണിയോടെ കനയ്യകുമാറും, ജിഗ്നേഷ് മേവാനിയും എത്തി. ഇതിന് മുൻപായി ഇരുവരും രാഹുൽ ​ഗാന്ധിക്കൊപ്പം ഭ​ഗത് സിം​ഗ് സമാധിയിലെത്തി പുഷ്പാര്‍ച്ചന നടത്തി.  പിന്നീട് എഐസിസി ജനറൽ സെക്രട്ടറിമാരായ രൺദീപ് സു‍ർജെവാല, കെ സി വേണു​ഗോപാൽ എന്നിവ‍ർക്കൊപ്പം ഇരുവരും മാധ്യമങ്ങളെ കാണാനെത്തി. 

മുതി‍ർന്ന നേതാക്കളുടേയും യുവനേതാക്കളുടേയും ബിജെപിയിലേക്കുള്ള തുട‍ർച്ചയായ പലായനത്തിൽ വലഞ്ഞ കോൺ​ഗ്രസ് ക്യാംപിന് വലിയ ആവേശവും ആത്മവിശ്വാസവും നൽകുന്നതാണ് കനയ്യകുമാറിൻ്റേയും ജി​ഗ്നേഷ് മേവാനിയുടേയും വരവ്. പ്രതിപക്ഷത്തെ നയിക്കാനാവുക കോണ്‍​ഗ്രസിന് മാത്രമെന്നാണ് വാർത്താ സമ്മേളനത്തിൽ കനയ്യ കുമാര്‍ അഭിപ്രായപ്പെട്ടത്. ഭഗത്‍ സിംഗിൻ്റെ ധൈര്യവും ഗാന്ധിജിയുടെ സ്വപ്നവും അംബേദ്കറിൻ്റെ മൂല്യങ്ങളും ഉയർത്തിപ്പിടിക്കുന്ന പാർട്ടിയാണ് കോൺഗ്രസ്. ജനാധിപത്യ പാർട്ടിയാണ് കോൺഗ്രസ്, താന്‍ ജനാധിപത്യത്തില്‍ വിശ്വസിക്കുന്ന ആളും. കോൺഗ്രസില്ലാതെ രാജ്യത്തിന് പിടിച്ച് നിൽക്കാനാവില്ലെന്നും കനയ്യ പറഞ്ഞു.