മംഗളൂരുവില് മലയാളി മാധ്യമപ്രവര്ത്തകര് പൊലീസ് കസ്റ്റഡിയില്; റിപ്പോര്ട്ടിംഗ് തടഞ്ഞു
Synopsis
റിപ്പോര്ട്ടിംഗ് തടഞ്ഞുഇന്നലെ മംഗലാപുരത്ത് ഉണ്ടായ സംഘര്ഷത്തില് കൊല്ലപ്പെട്ടവരുടെ മൃതദേഹങ്ങള് സൂക്ഷിച്ചിരിക്കുന്ന വെന്ലോക്ക് ആശുപത്രിക്ക് സമീപത്ത് നിന്ന് റിപ്പോര്ട്ട് ചെയ്യുകയായിരുന്ന മാധ്യമപ്രവര്ത്തകരെയാണ് പൊലീസ് കസ്റ്റഡിയില് എടുത്തിയത്.
മംഗളൂരു: മംഗളൂരുവില് മലയാളി മാധ്യമപ്രവര്ത്തകരെ പൊലീസ് കസ്റ്റഡിയില് എടുത്തു. സിറ്റി പൊലീസ് കമ്മീഷണറുടെ നേതൃത്വത്തിലാണ് മാധ്യമപ്രവര്ത്തകരെ കസ്റ്റഡിയില് എടുത്തത്. മാധ്യമ സംഘത്തില് നിന്ന് ക്യാമറ അടക്കമുള്ള ഉപകരണങ്ങള് പൊലീസ് പിടിച്ചെടുത്തു. ഏഷ്യാനെറ്റ് ന്യൂസ് റിപ്പോര്ട്ടര് മുജീബ് റഹ്മാനും ക്യാറാമാൻ പ്രതീഷ് കപ്പോത്തും പൊലീസ് കസ്റ്റഡിയില് എടുത്ത സംഘത്തിലുണ്ട്. ഇന്നലെ മംഗലാപുരത്ത് ഉണ്ടായ സംഘര്ഷത്തില് കൊല്ലപ്പെട്ടവരുടെ മൃതദേഹങ്ങള് സൂക്ഷിച്ചിരിക്കുന്ന വെന്ലോക്ക് ആശുപത്രിക്ക് സമീപത്ത് നിന്ന് റിപ്പോര്ട്ട് ചെയ്യുകയായിരുന്ന മാധ്യമപ്രവര്ത്തകരെയാണ് പൊലീസ് കസ്റ്റഡിയില് എടുത്തിയത്.
പൊലീസ് എത്തി മാധ്യമപ്രവര്ത്തകരോട് ഇവിടെ നിന്ന് മാറാന് ആവശ്യപ്പെടുകയും തുടര്ന്ന് സംഘത്തെ കസ്റ്റഡിയില് എടുക്കുകയുമായിരുന്നു. ഇന്നലെ മംഗളൂരുവില് നടന്ന പ്രതിഷേധത്തിനിടെ രണ്ട് പേരാണ് കൊല്ലപ്പെട്ടത്. പ്രതിഷേധം സംഘര്ഷത്തിലേക്ക് വഴിമാറാനുള്ള സാധ്യത കണക്കിലെടുത്ത് മംഗളൂരുവില് നേരത്തേ തന്നെ നിരോധനാജ്ഞ പ്രഖ്യാപിച്ചിരുന്നു. എന്നാല് നിരോധനാജ്ഞ നിലനില്ക്കുമ്പോള് തന്നെ ആയിരക്കണക്കിന് ആളുകള് ഇന്നലെ പ്രതിഷേധ പ്രകടനത്തില് പങ്കെടുത്തിരുന്നു. കമ്മീഷണര് ഓഫീസിലേക്ക് നീങ്ങിയ പ്രതിഷേധമാര്ച്ച് പൊലീസ് തടഞ്ഞതോടെയാണ് സംഘര്ഷം ആരംഭിച്ചത്. പൊലീസ് ആദ്യം പ്രതിഷേധക്കാര്ക്ക് നേരെ ലാത്തി ചാര്ജ് നടത്തുകയും പിന്നീട് ഗ്രനേഡ് പ്രയോഗിക്കുകയും ചെയ്തു. തുടര്ന്ന് റബര് ബുള്ളറ്റിന് ഉപയോഗിച്ച് വെടിവെപ്പ് നടത്തുകയായിരുന്നു.
മംഗളൂരു സംഘര്ഷത്തിന്റെ പശ്ചാത്തലത്തില് മംഗളൂരൂ കമ്മീഷണറേറ്റ് പരിധിയില് മുഴുവന് കര്ഫ്യൂ പ്രഖ്യാപിച്ചിരിക്കുകയാണ്. നേരത്തെ അഞ്ച് പൊലീസ് സ്റ്റേഷന് പരിധിയില് മാത്രമായിരുന്നു കര്ഫ്യൂ. കർണാടകത്തിലെ മുഴുവൻ ജില്ലകളിലും ജാഗ്രതാ നിർദ്ദേശം നല്കിയിട്ടുണ്ട്. സമാധാനം പാലിക്കണമെന്ന് മുഖ്യമന്ത്രി ബി എസ് യെദിയൂരപ്പ അഭ്യർത്ഥിച്ചു. കലബുറഗി, മൈസൂരു, ഹാസൻ, ബെല്ലാരി, ഉത്തര കന്നഡ ജില്ലകളിൽ കൂടുതൽ പൊലീസിനെ വിന്യസിച്ചിട്ടുണ്ട്. എഡിജിപി ബി ദയാനന്ദ് മംഗളൂരുവിൽ എത്തി. അതേസമയം നിരോധനാജ്ഞ ലംഘിച്ചു ബെംഗളൂരുവിൽ സമരം ചെയ്യുമെന്ന് വിവിധ സംഘടനകൾ പ്രഖ്യാപിച്ചിട്ടുണ്ട്.
Read Also: മംഗളൂരുവില് സംഘര്ഷമുണ്ടാക്കിയത് കേരളത്തില് നിന്നുള്ളവരെന്ന് കര്ണാടക ആഭ്യന്തര മന്ത്രി...
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam