സ്വന്തം പെൺമക്കൾക്കായി സര്‍വ്വം മറന്ന് കര്‍ണാടക പിഎസ്സി ചെയര്‍മാൻ, നിർവാസിത പദ്ധതിയിൽ ഉൾപ്പെടുത്തി വഴിവിട്ട നിയമനം, സസ്പെൻഡ് ചെയ്ത് ഗവര്‍ണര്‍

മക്കളെ സർക്കാർ സർവീസിൽ നിയമവിരുദ്ധമായി നിയമിച്ചെന്ന ഗുരുതരമായ ആരോപണത്തെ തുടർന്ന് കർണാടക പബ്ലിക് സർവീസ് കമ്മീഷൻ (കെപിഎസ്‌സി) ചെയർമാൻ ശിവശങ്കരപ്പ എസ്. സാഹുക്കറിനെ ഗവർണർ താവർചന്ദ് ഗെലോട്ട് സസ്പെൻഡ് ചെയ്തു. പദ്ധതി നിർവാസിതർക്കുള്ള ക്വാട്ട ദുരുപയോഗം ചെയ്താണ് നിയമനം നടത്തിയതെന്നാണ് പ്രധാന ആരോപണം.

ബെംഗളൂരു: സ്വന്തം പെൺമക്കളെ സർക്കാർ സർവീസിൽ നിയമവിരുദ്ധമായി നിയമിച്ചെന്ന ഗുരുതരമായ ആരോപണത്തെ തുടർന്ന് കർണാടക പബ്ലിക് സർവീസ് കമ്മീഷൻ (കെപിഎസ്‌സി) ചെയർമാൻ ശിവശങ്കരപ്പ എസ്. സാഹുക്കറിനെ ഗവർണർ താവർചന്ദ് ഗെലോട്ട് സസ്പെൻഡ് ചെയ്തു. സാഹുക്കറിന്റെ മക്കളായ ചന്ദ്രകല, സുസ്മിത എന്നിവരുടെ നിയമനവുമായി ബന്ധപ്പെട്ടാണ് ഈ അസാധാരണ നടപടി. സാഹുക്കറിന്റെ മകൾ ചന്ദ്രകലയെ 2018ൽ അസിസ്റ്റന്റ് രജിസ്ട്രാറായും, മറ്റൊരു മകൾ സുസ്മിതയെ 2021-ൽ സ്റ്റേറ്റ് അക്കൗണ്ട്സ് ഡിപ്പാർട്ട്‌മെന്റിൽ അസിസ്റ്റന്റ് കൺട്രോളറായുമാണ് നിയമിച്ചത്. ഈ രണ്ട് നിയമനങ്ങളിലും ക്രമക്കേട് നടന്നതായാണ് പരാതി ഉയർന്നത്. ഇതേത്തുടർന്നാണ് ഗവർണറുടെ ഇടപെടൽ.

തട്ടിപ്പ് 'പദ്ധതി നിർവാസിത' ക്വാട്ടയിൽ 

സർക്കാർ പദ്ധതികൾക്കായി ഭൂമി ഏറ്റെടുക്കേണ്ടി വന്ന കുടുംബങ്ങളിലെ അംഗങ്ങൾക്ക് സംവരണം ചെയ്തിട്ടുള്ള ‘പദ്ധതി നിർവാസിത’ ക്വാട്ട ദുരുപയോഗം ചെയ്താണ് നിയമനങ്ങൾ നടത്തിയതെന്നാണ് പ്രധാന ആരോപണം. എന്നാൽ, സാഹുക്കറിന്റെ കുടുംബത്തിന് ഈ രീതിയിൽ ഭൂമി നഷ്ടമായിട്ടില്ലെന്ന് പരാതിയിൽ വ്യക്തമാക്കുന്നു. ഇത് സംവരണ തത്വങ്ങളുടെ നഗ്നമായ ലംഘനമായാണ് വിലയിരുത്തപ്പെടുന്നത്. ഇതിലെ കൗതുകകരമായ മറ്റൊരു കാര്യം, ജോലി നേടുന്നതിനായി ഒരു മകൾ ഹാജരാക്കിയ വരുമാന സർട്ടിഫിക്കറ്റാണ്. കുടുംബത്തിന്റെ വാർഷിക വരുമാനം വെറും 40,000 രൂപയാണെന്ന് കാണിക്കുന്ന ജാതി-വരുമാന സർട്ടിഫിക്കറ്റ് ഹാജരാക്കിയെന്നും ആരോപണമുണ്ട്. കെപിഎസ്‌സി ചെയർമാൻ പദവിയിലിരിക്കുന്ന ഒരാളുടെ കുടുംബ വരുമാനം ഇത്ര കുറച്ചു കാണിച്ചത് തന്നെ സംശയങ്ങൾക്ക് ആക്കം കൂട്ടി.

ഗവർണറുടെ അടിയന്തര നടപടി; അന്വേഷണം സുപ്രീം കോടതിക്ക്

ആരോപണങ്ങൾ അതീവ ഗൗരവമുള്ളതാണെന്ന് കണ്ടെത്തിയതോടെയാണ് ഗവർണർ സാഹുക്കറിനെ ഉടൻ പ്രാബല്യത്തിൽ സസ്പെൻഡ് ചെയ്തത്. ഇന്ത്യൻ ഭരണഘടനയുടെ 317(2) അനുച്ഛേദം പ്രകാരമാണ് ഗവർണർക്ക് ഇതിനുള്ള അധികാരമുള്ളത്. ഈ അധികാരം ഉപയോഗിച്ചാണ് ഗവർണർ അടിയന്തര നടപടി സ്വീകരിച്ചത്. വിഷയത്തിൽ വിശദമായ അന്വേഷണം നടത്താനായി ഗവർണർ വിഷയം സുപ്രീം കോടതിയുടെ പരിഗണനയ്ക്ക് വിട്ടിട്ടുണ്ട്. സുപ്രീം കോടതിയുടെ അന്വേഷണ റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികൾ. കെപിഎസ്‌സി അംഗമായിരുന്ന സാഹുക്കർ 2023 ഫെബ്രുവരിയിലാണ് ചെയർമാനായി ചുമതലയേറ്റത്.