പുതിയ കരസേനാ മേധാവിയെ നിയമിച്ചു, ഉപേന്ദ്ര ദ്വിവേദി വിരമിക്കുന്ന ഒഴിവിലേക്ക് ലഫ്റ്റനന്റ് ജനറൽ ധീരജ് സേത്ത്, ജൂൺ 30ന് ചുമതലയേൽക്കും

ലഫ്റ്റനന്റ് ജനറൽ ധീരജ് സേത്തിനെ പുതിയ കരസേന മേധാവിയായി നിയമിച്ചു. നിലവിലെ ഉപമേധാവിയായ അദ്ദേഹം, ജനറൽ ഉപേന്ദ്ര ദ്വിവേദി വിരമിക്കുന്നതോടെ 2026 ജൂൺ 30-ന് ചുമതലയേൽക്കും. നാല് പതിറ്റാണ്ടോളം നീണ്ട സേവനത്തിനിടയിൽ സൈന്യത്തിന്റെ ആധുനികവൽക്കരണത്തിലും തന്ത്രപരമായ ആസൂത്രണത്തിലും അദ്ദേഹം നിർണായക പങ്കുവഹിച്ചിട്ടുണ്ട്.

ന്യൂഡൽഹി: ലഫ്റ്റനന്റ് ജനറൽ ധീരജ് സേത്ത് പുതിയ കരസേന മേധാവിയായി നിയമിതനായി. നിലവിൽ കരസേന ഉപമേധാവിയായി സേവനമനുഷ്ഠിക്കുന്ന അദ്ദേഹം 2026 ജൂൺ 30-ന് ഉച്ചയ്ക്ക് ശേഷമാണ് പുതിയ ചുമതലയേൽക്കുന്നത്. ഇതേ ദിവസം തന്നെയാണ് നിലവിലെ കരസേന മേധാവി ജനറൽ ഉപേന്ദ്ര ദ്വിവേദി സർവീസിൽ നിന്ന് വിരമിക്കുന്നത്. നാഷണൽ ഡിഫൻസ് അക്കാദമിയിലെ പൂർവ്വവിദ്യാർത്ഥിയായ ധീരജ് സേത്ത് 1986 ഡിസംബറിലാണ് ആർമഡ് കോർപ്സിൽ സേവനം ആരംഭിച്ചത്. നാലു പതിറ്റാണ്ടോളം നീളുന്ന അദ്ദേഹത്തിന്റെ സേവന ജീവിതം ഇന്ത്യൻ സൈന്യത്തിന്റെ പ്രവർത്തനക്ഷമതയ്ക്കും ദീർഘകാല പരിവർത്തനങ്ങൾക്കും വലിയ സംഭാവനകൾ നൽകിയിട്ടുണ്ട്.

മരുഭൂമിയിലെ ആർമഡ് റെജിമെന്റ്, വെസ്റ്റേൺ തിയേറ്ററിലെ ആർമഡ് ബ്രിഗേഡ്, ജമ്മു കശ്മീരിലെ കൗണ്ടർ ഇൻസർജൻസി ഫോഴ്സ് എന്നിവ അദ്ദേഹം നയിച്ചിട്ടുണ്ട്. ലഫ്റ്റനന്റ് ജനറൽ എന്ന നിലയിൽ സുദർശൻ ചക്ര കോർപ്സിനും, ഡൽഹി ഏരിയ ജനറൽ ഓഫീസർ കമാൻഡിംഗായും പ്രവർത്തിച്ചു. സതേൺ കമാൻഡ്, സൗത്ത് വെസ്റ്റേൺ കമാൻഡ് എന്നീ രണ്ട് ഓപ്പറേഷണൽ ആർമി കമാൻഡുകൾ കമാൻഡ് ചെയ്യാനുള്ള അപൂർവ്വ നേട്ടവും രണ്ടര വർഷത്തോളം നിർണായക മേഖലകളിൽ തന്ത്രപരമായ മേൽനോട്ടം വഹിക്കാനും അദ്ദേഹത്തിന് സാധിച്ചിട്ടുണ്ട്.

സൈന്യത്തിന്റെ ആധുനികവൽക്കരണത്തിന് നൽകിയ സംഭാവനകളിലൂടെയും തന്ത്രപരമായ ആസൂത്രണങ്ങളിലൂടെയും അദ്ദേഹം ശ്രദ്ധേയനാണ്. കരസേനാ ആസ്ഥാനത്ത് സ്ട്രാറ്റജിക് പ്ലാനിങ്, കപ്പബിലിറ്റി ഡെവലപ്‌മെന്റ് വിഭാഗങ്ങളിൽ നിർണായക പദവികൾ വഹിച്ചിട്ടുള്ള അദ്ദേഹം നവീകരണ പ്രവർത്തനങ്ങൾക്ക് രൂപം നൽകിയിട്ടുണ്ട്. സൈന്യത്തിന്റെ പ്രവർത്തന ആവശ്യങ്ങളെ പുതിയ സാങ്കേതികവിദ്യകളുമായി യോജിപ്പിക്കുന്നതിൽ അദ്ദേഹത്തിന്റെ പങ്ക് വലുതാണ്. പാരീസിലെ കമാൻഡ് ആൻഡ് സ്റ്റാഫ് കോഴ്‌സ്, ഹയർ കമാൻഡ് കോഴ്‌സ്, നാഷണൽ ഡിഫൻസ് കോളേജ് എന്നിവ പൂർത്തിയാക്കിയ മികച്ച ഒരു സൈനിക പ്രൊഫഷണൺ കൂടിയാണ് അദ്ദേഹം.