ഒരു ദിവസം 1000 പേർക്ക് ഭക്ഷണം വിളമ്പി ലോക റെക്കോർഡ് നേടി ഇന്ത്യക്കാരൻ

തെരുവിൽ കിടന്നുറങ്ങുന്ന പാവങ്ങൾക്കുൾപ്പടെ ഭക്ഷണം വിളമ്പിയ​ ​ഗൗതം കുമാറിനെ യൂണിവേഴ്സൽ ബുക്ക് ഓഫ് റെക്കോർഡ് ആണ് പുരസ്കാരം നൽകി ആ​ദരിച്ചത്.  

ഹൈദരാബാദ്: ഒരു ദിവസം 1000 പേർക്ക് ഭക്ഷണം വിളമ്പി ലോക റെക്കോർഡ് നേടിയിരിക്കുകയാണ് ഹൈദരാബാദ് സ്വ​ദേശി ​ഗൗതം കുമാർ. തെരുവിൽ കിടന്നുറങ്ങുന്ന പാവങ്ങൾക്കുൾപ്പടെ ഭക്ഷണം വിളമ്പിയ​ ​ഗൗതം കുമാറിനെ യൂണിവേഴ്സൽ ബുക്ക് ഓഫ് റെക്കോർഡ് ആണ് പുരസ്കാരം നൽകി ആ​ദരിച്ചത്.

ഹൈദരാബാദ് ആസ്ഥാനമാക്കി പ്രവർത്തിക്കുന്ന 'സേർവ് നീഡി' എന്ന എൽജിഒ സം​ഘടനയുടെ സ്ഥാപകനാണ് ​ഗൗതം. ഞായറാഴ്ച ​ സംസ്ഥാനത്തെ ​മൂന്ന് വിവിധയിടങ്ങളിൽ 1000 പേർക്ക് ഭക്ഷണം വിതരണം ചെയ്താണ് ​ഗൗതം ഈ അം​ഗീകാരത്തിന് അർഹനായത്. ​ഗാന്ധി ആശുപത്രി, രാജേന്ദ്ര ന​ഗർ, അമ്മ നന്ന അനാഥാലയം എന്നിവിടങ്ങളിലാണ് ​ഗൗതം ഭക്ഷണം വിതരണം ചെയ്തത്. യൂണിവേഴ്സൽ ബുക്ക് ഓഫ് റെക്കോർഡ്സിന്റെ ഇന്ത്യൻ പ്രതിനിധിയായ കെവി രമണ, തെലങ്കാന പ്രതിനിധിയായ ടിഎം ശ്രീതല എന്നിവർ ചേർന്നാണ് ​ഗൗതമിന് പുരസ്കാരം സമർപ്പിച്ചത്. 

2014-ലാണ് സേർവ് നീഡി എന്ന സം​ഘടന ആരംഭിച്ചത്. ഇന്ന് സംസ്ഥാനത്താകമാനം 140 സന്നദ്ധസേവകർ സേർവ് നീഡിയിൽ സേവനമനുഷ്ഠിക്കുന്നുണ്ട്. 2014- മുതൽ വിശന്നിരിക്കുന്നവർക്ക് സംഘടന ഭക്ഷണം വിതരണം ചെയ്യുന്നുണ്ട്. 'തന്റെ സംഘടനയുള്ളപ്പോൾ ആരും അനാഥരെപോലെ മരിക്കാൻ അർഹരല്ല' എന്നതാണ് സംഘടനയുടെ ആപ്‌തവാക്യമെന്നും ഗൗതം മാധ്യമങ്ങളോട് പറഞ്ഞു.