പിഴ ആവശ്യപ്പെട്ട പൊലീസുകാരനെ കാറിന്റെ ബോണറ്റിൽ വെച്ച് 4 കിലോമീറ്റർ ഓടിച്ച് ഡ്രൈവർ; അറസ്റ്റ്, വീഡിയോ

പിഴ അടക്കാൻ പൊലീസുകാരൻ ആവശ്യപ്പെട്ടത് ഡ്രൈവർ വിസമ്മതിക്കുകയും സംഭവ സ്ഥലത്ത് നിന്ന് രക്ഷപ്പെടാൻ ശ്രമിക്കുകയും ചെയ്തു. 

ഇൻഡോർ: ഡ്രൈവിം​ഗിനിടെ മൊബൈൽ ഫോണിൽ സംസാരിച്ചത് തടഞ്ഞതിന്റെ പേരിൽ ട്രാഫിക് പൊലീസുകാരനെ കാറിന്റെ ബോണറ്റിൽ വെച്ച് 4 കിലോമീറ്റർ ദൂരം വണ്ടിയോടിച്ചു. ഇൻഡോറിൽ നിന്നാണ് ഞെട്ടിപ്പിക്കുന്ന ഈ വാർത്ത പുറത്തുവന്നിരിക്കുന്നത്. ഡ്രൈവർ ഫോണിൽ സംസാരിക്കുന്നത് കണ്ടാണ് ട്രാഫിക് ഹെഡ് കോൺസ്റ്റബിൾ ആയ ശിവ്സിം​ഗ് ചൗഹാൻ വണ്ടി നിർത്താൻ കൈ കാണിച്ചത്. പിഴ അടക്കാൻ പൊലീസുകാരൻ ആവശ്യപ്പെട്ടത് ഡ്രൈവർ വിസമ്മതിക്കുകയും സംഭവ സ്ഥലത്ത് നിന്ന് രക്ഷപ്പെടാൻ ശ്രമിക്കുകയും ചെയ്തു. 

മാത്രമല്ല, ഇയാൾ വാഹനം അതിവേ​ഗം മുന്നോട്ടെടുത്തു. പൊലീസ് ഓഫീസറെ ബോണറ്റിൽ വെച്ച് നാല് കിലോമീറ്റർ ദൂരം ഇയാൾ  വണ്ടിയോടിച്ചു. പൊലീസ് ഓഫീസറെ താഴെ വീഴ്ത്താൻ ഇയാൾ ശ്രമിച്ചെങ്കിലും ശിവ്സിം​ഗ് ചൗഹാൻ ബോണറ്റിൽ മുറുകെ പിടിച്ചു കിടന്നു. ഒടുവിൽ അമിത വേ​ഗതയിൽ ഓടിക്കൊണ്ടിരുന്ന വാഹനം പൊലീസ് പിടികൂടി. ഒരു റിവോൾവറും പിസ്റ്റളും വാഹനത്തിൽ നിന്ന് കണ്ടെടുത്തതായി പൊലീസ് വെളിപ്പെടുത്തി.  ​

ഗ്വാളിയോർ സ്വദേശിയായ കേശവ് ഉപാധ്യായ എന്നയാളാണ് സംഭവത്തിലെ പ്രതി എന്ന് പൊലീസ് പറഞ്ഞു. അശ്രദ്ധമായ ഡ്രൈവിംഗ്, ഡ്യൂട്ടിയിലുള്ള ഉദ്യോഗസ്ഥനെ പരിക്കേൽപ്പിക്കുക തുടങ്ങിയ വകുപ്പുകൾ പ്രകാരമാണ് പ്രതിയെ അറസ്റ്റ് ചെയ്തത്. തിരക്കേറിയ നിരത്തിലൂടെ കാറിന്റെ ബോണറ്റിലെ പൊലീസ് ഉദ്യോ​ഗസ്ഥനുമായി ഇയാൾ വേ​ഗത്തിൽ വാഹനമോടിക്കുന്നത് വീഡിയോയിൽ ദൃശ്യമാണ്. വാഹനം നിർത്താൻ ശ്രമിച്ച് ഒരാൾ കൂടെ ഓടുന്നുണ്ട്.