സഹോദരിയുടെ ഫ്ലാറ്റിലെത്തിയ എംബിബിഎസ് വിദ്യാർത്ഥി 21ാം നിലയിൽ നിന്ന് താഴേക്ക് ചാടി; ആത്മഹത്യയെന്ന് സംശയം
Synopsis
ഗ്രേറ്റർ നോയിഡയിൽ 21-ാം നിലയിലെ ഫ്ലാറ്റിൽ നിന്ന് ചാടി എംബിബിഎസ് വിദ്യാർത്ഥി മരിച്ചു. മഥുര സ്വദേശിയായ ശിവയാണ് (29) മരിച്ചത്. കൊറോണ കാലത്ത് പഠനം മുടങ്ങിയതിനെ തുടർന്ന് കടുത്ത വിഷാദത്തിലായിരുന്നു. ആത്മഹത്യയാണെന്ന് പോലീസ് സംശയിക്കുന്നു
ദില്ലി: ഇരുപത്തിയൊന്നാം നിലയിലെ ഫ്ലാറ്റിൻ്റെ ബാൽക്കണിയിൽ നിന്നും താഴേക്ക് ചാടിയ എംബിബിഎസ് വിദ്യാർത്ഥി മരിച്ചു. ഉത്തർപ്രദേശിലെ ഗ്രേറ്റർ നോയിഡയിലാണ് സംഭവം. ഉത്തർപ്രദേശിലെ മഥുര സ്വദേശി ശിവ (29) ആണ് മരിച്ചത്. യുവാവ് ആത്മഹത്യ ചെയ്തെന്നാണ് സംശയമെന്ന് പൊലീസ് പറയുന്നു. എങ്കിലും ആത്മഹത്യാ കുറിപ്പൊന്നും ലഭിച്ചിട്ടില്ല. വിവരമറിഞ്ഞ് സ്ഥലത്തെത്തിയ പൊലീസുകാരാണ് യുവാവിൻ്റെ മൃതദേഹം ആശുപത്രിയിലേക്ക് കൊണ്ടുപോയത്.
ദില്ലിയിലെ സ്വകാര്യ മെഡിക്കൽ കോളേജിൽ 2015 ബാച്ച് എംബിബിഎസ് വിദ്യാർത്ഥിയായിരുന്നു ശിവ. എന്നാൽ കൊറോണ കാലത്ത് മാനസിക പ്രയാസങ്ങൾ നേരിട്ടതിനെ തുടർന്ന് അധ്യയനം മുടങ്ങി. ഇതേ തുടർന്ന് കടുത്ത വിഷാദത്തിന് യുവാവ് അടിമപ്പെട്ടുവെന്നാണ് വീട്ടുകാർ പറയുന്നത്.
ഗ്രേറ്റർ നോയിഡയിലെ ഗൗർ സിറ്റി പ്രദേശത്ത് സഹോദരിയുടെ ഫ്ലാറ്റിലെത്തിയതായിരുന്നു ശിവ. മാതാപിതാക്കളും ഒപ്പമുണ്ടായിരുന്നു. ഈ ഫ്ലാറ്റിൽ മാതാപിതാക്കൾ വീടിനകത്ത് മറ്റൊരു മുറിയിൽ നിൽക്കെ യുവാവ് ബാൽക്കണിയിലേക്ക് നടന്നുപോവുകയും ഇവിടെ നിന്ന് താഴേക്ക് ചാടുകയും ചെയ്തുവെന്നാണ് പുറത്തുവരുന്ന വിവരം. മൃതദേഹം പോസ്റ്റ്മോർട്ടം പരിശോധനയ്ക്കായി മാറ്റിയിരിക്കുകയാണ്. സംഭവത്തിൽ വിശദമായ അന്വേഷണം നടത്തുമെന്ന് പൊലീസ് അറിയിച്ചു.
(ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക. അത്തരം ചിന്തകളുളളപ്പോള് 'ദിശ' ഹെല്പ് ലൈനില് വിളിക്കുക. ടോള് ഫ്രീ നമ്പര്: Toll free helpline number: 1056, 0471-2552056)
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam