2-3 കി.മീ കാർ ഓടിച്ചപ്പോൾ ടയറിൽ കയറിയത് 3 ആണികൾ; ഫ്ലൈഓവറിൽ മനഃപൂർവം വിതറിയ നിലയിൽ, സ്ഥിരം ടയർ പഞ്ചറാകുമെന്ന് കമന്റുകൾ
Synopsis
ബെംഗളൂരുവിലെ മന്ദാരഗിരി കുന്നിന് സമീപമുള്ള ഫ്ലൈഓവറിൽ മനഃപൂർവം ആണികൾ വിതറി അപകടമുണ്ടാക്കുന്നതിന്റെ വീഡിയോ വൈറലാകുന്നു. ടയർ പഞ്ചറാക്കി അടുത്തുള്ള റിപ്പയർ കടകളിലേക്ക് ആളുകളെ എത്തിച്ച് പണം തട്ടുന്ന സംഘമാണ് ഇതിന് പിന്നിലെന്നാണ് സംശയം.
ബെംഗളൂരു: ബെംഗളൂരുവിലെ മന്ദാരഗിരി കുന്നിന് സമീപമുള്ള ഒരു ഫ്ലൈഓവറിൽ മനഃപൂർവം ആണികൾ വിതറി അപകടകരമായ സാഹചര്യം സൃഷ്ടിക്കുന്നുവെന്ന് കാണിക്കുന്ന വീഡിയോ വൈറലാകുന്നു. ടൂവീലർ യാത്രികർ ഉൾപ്പെടെയുള്ളവർക്ക് ഗുരുതരമായ ഭീഷണിയുയർത്തുന്ന ഈ സംഭവത്തിൽ ആശങ്കയറിയിച്ച് നിരവധി പേർ രംഗത്തെത്തി. യാത്ര കഴിഞ്ഞ് മടങ്ങുകയായിരുന്ന ഒരു സംഘം റെക്കോർഡ് ചെയ്ത ദൃശ്യങ്ങളാണ് പുറത്ത് വന്നത്. ഐക്കിയ ഷോറൂമിന് (IKEA showroom) സമീപമുള്ള റോഡിൽ ആണി തറച്ച് ടയർ പഞ്ചറായതാണ് സംഭവങ്ങളുടെ തുടക്കം. ഭാഗ്യവശാൽ, ഈ സംഘത്തിന്റെ പക്കൽ സ്പെയർ ട്യൂബ് ഉണ്ടായിരുന്നതിനാൽ അവർക്ക് ടയർ മാറ്റി യാത്ര തുടരാൻ സാധിച്ചു.
എന്നാൽ, യാത്ര തുടരുന്നതിനിടെ റോഡിന്റെ പല ഭാഗത്തും ആണികൾ വിതറിയിരിക്കുന്നതായി അവർ കണ്ടു. തുടർന്ന് മറ്റൊരു ഫ്ലൈഓവറിൽ വണ്ടി നിർത്തി അവർ ഈ ആണികളുടെ ദൃശ്യങ്ങൾ പകർത്തി, മറ്റ് യാത്രക്കാർക്ക് മുന്നറിയിപ്പ് നൽകി. ഡസൻ കണക്കിന് ആണികൾ മനഃപൂർവം സ്ഥാപിച്ചിരിക്കുകയാണെന്നും ഇത് യാത്രക്കാർക്ക് വലിയ അപകടമുണ്ടാക്കുമെന്നും അവർ ആരോപിച്ചു.
തട്ടിപ്പ് സംഘത്തെ സംശയിച്ച് യാത്രക്കാർ
ഇതേ സ്ഥലത്ത് മറ്റൊരു സൈക്കിൾ യാത്രികൻ ടയർ പഞ്ചറായ നിലയിൽ നിൽക്കുന്നത് വീഡിയോയിൽ കാണാം. ഇത് സംശയാസ്പദമായ ഒരു തട്ടിപ്പിന്റെ സൂചനയാണ് നൽകുന്നത്. ടയർ പഞ്ചറായ ആളുകളെ അടുത്തുള്ള റിപ്പയറിങ് കടകളിലേക്ക് നിർബന്ധിച്ച് അയക്കുകയും, നിർബന്ധിത സേവനത്തിലൂടെ ഇവർ ലാഭം നേടുകയും ചെയ്യുന്ന ഒരു തട്ടിപ്പ് ശൃംഖലയുടെ ഭാഗമായിരിക്കാം ഇതെന്നും പോസ്റ്റ് ചെയ്തവർ സംശയം പ്രകടിപ്പിച്ചു. സഹയാത്രികർ പങ്കുവെച്ച സമാന അനുഭവങ്ങൾ ഈ തട്ടിപ്പ് ബെംഗളൂരുവിലെ പല ഭാഗത്തും നടക്കുന്നുണ്ടെന്ന സംശയത്തിന് ബലം നൽകുന്നു.
പൊലീസ് നടപടിയില്ല, ആശങ്കയിൽ ജനം
വീഡിയോ പോസ്റ്റ് ചെയ്തവർ ബെംഗളൂരു സിറ്റി പൊലീസിനെ ടാഗ് ചെയ്ത് അടിയന്തര ഇടപെടൽ ആവശ്യപ്പെട്ടിട്ടുണ്ട്. എന്നാൽ ഇതുവരെ അധികൃതർ പ്രതികരണമൊന്നും നൽകുകയോ നടപടിയെടുക്കുകയോ ചെയ്തിട്ടില്ല. ഈ വീഡിയോയ്ക്ക് 60,000-ത്തിലധികം കാഴ്ചക്കാരെയും നിരവധി കമന്റുകളും ലഭിച്ചു. "ഇതൊരു വിരുതുള്ള തട്ടിപ്പാണ്! ജനങ്ങൾ ഇതേക്കുറിച്ച് അറിയേണ്ടത് നിർണായകമാണ്. അധികൃതർ വേഗത്തിൽ നടപടിയെടുക്കുമെന്ന് ഞാൻ പ്രതീക്ഷിക്കുന്നു," എന്ന് ഒരു ഉപയോക്താവ് കുറിച്ചു. "ഞാൻ 2-3 കിലോമീറ്റർ ദൂരം മെയിൻ റോഡിലൂടെ ഓടിച്ചപ്പോൾ തന്നെ ടയറിൽ 3 ആണികളാണ് തറച്ചത്. 10 ദിവസത്തിനിടെ ഇത് രണ്ടാം തവണയാണ്. എന്താണ് ഇവിടെ നടക്കുന്നത്?" എന്ന് മറ്റൊരു ഉപയോക്താവ് ആശങ്ക പങ്കുവെച്ചു.