നീറ്റ് പരീക്ഷ ഇല്ലാതാക്കില്ല, രോഗം മാറാൻ പലതരം ചികിത്സ ചെയ്യുന്നതുപോലെ അപാകതകള്‍ പരിഹരിക്കും: ജെപി നദ്ദ

നിലവിലെ സംവിധാനത്തിലൂടെ ​സാധാരണ വിദ്യാർത്ഥികൾക്കുവരെ പഠനത്തിന് അവസരം ലഭിക്കുന്നുണ്ടെന്നും ജെപി നദ്ദ പറഞ്ഞു.

ദില്ലി: നീറ്റ് പരീക്ഷ റദ്ദാക്കില്ലെന്ന് കേന്ദ്ര ആരോ​ഗ്യമന്ത്രി ജെ പി നദ്ദ. ഒരു ശരീരത്തിന്‍റെ രോ​ഗങ്ങൾ മാറ്റാനായി പലതരം ചികിത്സകൾ ചെയ്യുന്നത് പോലെ അപാകതകൾ പരിഹരിക്കും. എന്നാൽ, നീറ്റ് ഇല്ലാതാക്കില്ലെന്നും ജെപി നദ്ദ പറഞ്ഞു. നീറ്റ് പരീക്ഷ ചിട്ടയായ രീതിയിൽ രൂപപ്പെടുത്തിയ സംവിധാനമാണ്. ഈ സംവിധാനത്തെ തുരങ്കം വയ്ക്കരുത്.

നീറ്റ് നടപ്പാക്കുന്നതിന് മുൻപ് പിജി സീറ്റുകൾ 13 കോടി രൂപയ്ക്ക് വരെ വിൽക്കുന്ന തരത്തിൽ മെഡിക്കൽ വിദ്യാഭ്യാസം കച്ചവടവൽക്കരിക്കപ്പെട്ടിരുന്നു. നിലവിലെ സംവിധാനത്തിലൂടെ ​സാധാരണ വിദ്യാർത്ഥികൾക്കുവരെ പഠനത്തിന് അവസരം ലഭിക്കുന്നുണ്ടെന്നും നദ്ദ പറഞ്ഞു. ഡിഎംകെ എംപി മുഹമ്മദ് അബ്ദുള്ള അവതരിപ്പിച്ച സ്വകാര്യ ബില്ലിലെ ചർച്ചയിൽ ഇടപെട്ട് സംസാരിക്കുകയായിരുന്നു ജെ പി നദ്ദ.