ഈ ട്രാഫിക്കിൽ റോഡിൽ കൂടെ നടക്കില്ല, മെട്രോയിൽ ഹൃദയവുമായി മെഡിക്കൽ സംഘത്തിന്‍റെ യാത്ര; 25 മിനിറ്റിൽ 20 കി.മീ താണ്ടി ലക്ഷ്യത്തിലെത്തി

ബംഗളൂരുവിലെ കനത്ത ഗതാഗതക്കുരുക്ക് മറികടന്ന്, ദാതാവിന്‍റെ ഹൃദയം 25 മിനിറ്റിനുള്ളിൽ മെട്രോ വഴി ആശുപത്രിയിലെത്തിച്ചു. റാഗിഗുഡ്ഡയിൽ നിന്ന് നാരായണ ഹെൽത്ത് സിറ്റിയിലേക്കുള്ള ഈ യാത്ര, അവയവമാറ്റ ശസ്ത്രക്രിയയുടെ നിർണായക സമയം പാലിക്കാൻ ഡോക്ടർമാരെ സഹായിച്ചു. 

ബംഗളൂരു: നഗരത്തിലെ തിരക്കിനിടയിൽ 25 മിനിറ്റിനുള്ളിൽ ഒരു ദാതാവിന്‍റെ ഹൃദയം ലക്ഷ്യസ്ഥാനത്തെത്തിച്ച് ബംഗളരു മെട്രോ. യെല്ലോ ലൈനിലെ റാഗിഗുഡ്ഡ സ്റ്റേഷനിൽ നിന്ന് ബൊമ്മസാന്ദ്രയിലെ നാരായണ ഹെൽത്ത് സിറ്റിയിലേക്ക് 20 കിലോമീറ്റർ ദൂരമാണ് മെഡിക്കൽ സംഘം ഈ ചുരുങ്ങിയ സമയത്തിനുള്ളിൽ പിന്നിട്ടത്. സാധാരണ ഗതിയിൽ വൈകുന്നേരങ്ങളിൽ വലിയ ഗതാഗതക്കുരുക്ക് അനുഭവപ്പെടുന്ന സമയത്താണ് മെട്രോ വഴി ഹൃദയം അതിവേഗം ആശുപത്രിയിൽ എത്തിച്ചത്. ഇത് അവയവം സംരക്ഷിക്കാൻ ലഭിക്കുന്ന നിർണായക സമയത്തിനുള്ളിൽ തന്നെ ശസ്ത്രക്രിയ നടത്താൻ ഡോക്ടർമാരെ സഹായിച്ചു.

സമയം അതിപ്രധാനം

അവയവ മാറ്റിവയ്ക്കൽ ശസ്ത്രക്രിയയുടെ വിജയത്തിൽ സമയത്തിന് വലിയ പ്രാധാന്യമുണ്ട്. ലോകാരോഗ്യ സംഘടനയുടെ കണക്കനുസരിച്ച്, ഹൃദയം നീക്കം ചെയ്ത് നാല് മണിക്കൂറിനുള്ളിൽ തന്നെ മാറ്റിവയ്ക്കൽ ശസ്ത്രക്രിയ നടത്തുന്നതാണ് ഉചിതം. ഇതിനെ 'കോൾഡ് ഇസ്കെമിയ സമയം' (cold ischemia time) എന്ന് വിളിക്കുന്നു. ഗതാഗതക്കുരുക്കോ മറ്റ് തടസങ്ങളോ കാരണം സമയം വൈകുന്നത് അവയവത്തിന്‍റെ പ്രവർത്തനത്തെയും സ്വീകർത്താവിന്‍റെ അതിജീവനത്തെയും സാരമായി ബാധിക്കും. ബംഗളൂരു പോലുള്ള മെട്രോ നഗരങ്ങളിൽ ഗതാഗതക്കുരുക്ക് പതിവായതിനാൽ, മെട്രോകൾ, ഗ്രീൻ കോറിഡോറുകൾ, എയർ ആംബുലൻസുകൾ എന്നിവ ഇന്ത്യയുടെ അടിയന്തര അവയവ ഗതാഗത സംവിധാനത്തിന്‍റെ ഭാഗമായി മാറുകയാണ്.

25 മിനിറ്റ് നീണ്ട മെട്രോ യാത്ര

നാരായണ ഹെൽത്ത് പുറത്തുവിട്ട വിവരങ്ങൾ അനുസരിച്ച്, വൈകുന്നേരം 7:32-ന് റാഗിഗുഡ്ഡ സ്റ്റേഷനിൽ നിന്ന് കയറിയ സംഘം 7:55-ന് ബൊമ്മസാന്ദ്രയിൽ എത്തി. റോഡ് മാർഗം മണിക്കൂറുകൾ വേണ്ടിവരുന്ന യാത്രയാണ് മെട്രോ വഴി നിമിഷങ്ങൾക്കുള്ളിൽ പൂർത്തിയാക്കിയത്. ബംഗളൂരു മെട്രോ റെയിൽ കോർപ്പറേഷൻ ലിമിറ്റഡ് (BMRCL) ജീവനക്കാരും സുരക്ഷാ ഉദ്യോഗസ്ഥരും ട്രെയിൻ ഓപ്പറേറ്റർമാരും ചേർന്ന് തടസങ്ങളില്ലാത്ത യാത്ര ഉറപ്പാക്കി. റോഡിലെ തിരക്ക് പൂർണ്ണമായും ഒഴിവാക്കി ഹൃദയം കൃത്യസമയത്ത് ആശുപത്രിയിൽ എത്തിക്കാൻ ഇത് സഹായിച്ചു.

ഇന്ത്യയിലെ മാറ്റങ്ങൾ

അവയവങ്ങൾ വേഗത്തിൽ എത്തിക്കുന്നതിനായി ഇന്ത്യയിൽ 'ഗ്രീൻ കോറിഡോറുകൾ' എന്ന പ്രത്യേക ട്രാഫിക് നിയന്ത്രിത പാതകൾ ഉപയോഗിക്കാറുണ്ട്. എന്നാൽ ട്രാഫിക് പ്രവചിക്കാൻ കഴിയാത്ത നഗരങ്ങളിൽ മെട്രോകൾ വിശ്വസനീയമായ ഒരു ബദലായി മാറുകയാണ്. കഴിഞ്ഞ പത്ത് വർഷത്തിനിടെ ചെന്നൈ, മുംബൈ, ഹൈദരാബാദ്, ദില്ലി എന്നിവിടങ്ങളിലെ മെട്രോകളും സമാനമായ ദൗത്യങ്ങൾ ഏറ്റെടുത്തിട്ടുണ്ട്. നാഷണൽ ഓർഗൻ ആൻഡ് ടിഷ്യൂ ട്രാൻസ്‌പ്ലാന്‍റ് ഓർഗനൈസേഷന്‍റെ നിർദ്ദേശങ്ങൾക്കനുസൃതമായാണ് ഇത്തരം ഏകോപനങ്ങൾ നടക്കുന്നത്.

കുടുംബത്തിന് നന്ദി

കടുത്ത ദുഃഖത്തിനിടയിലും അവയവങ്ങൾ ദാനം ചെയ്യാൻ തീരുമാനിച്ച ദാതാവിന്‍റെ കുടുംബത്തോടുള്ള നന്ദിയും ആശുപത്രി രേഖപ്പെടുത്തി. "അവരുടെ കാരുണ്യം മറ്റൊരു വ്യക്തിക്ക് ജീവിതത്തിലേക്ക് തിരികെ വരാനുള്ള അവസരം നൽകി," ആശുപത്രി അധികൃതർ കുറിച്ചു.