Covid in End Stage Says Yogi : കൊവിഡ് അന്തിമഘട്ടത്തിൽ, ഒമിക്രോണിലുണ്ടാവുന്നത് വെറും വൈറൽ പനി: യോ​ഗി

ഈ കൊവിഡ് വകഭേദം വളരെ ദുർബലമാണ്. ഇത് വൈറൽ പനി പോലെയാണ്, പക്ഷേ മുൻകരുതലുകൾ ആവശ്യമാണ്. എന്നിരുന്നാലും, പരിഭ്രാന്തരാകേണ്ട ആവശ്യമില്ല," - വാ‍ർത്ത ഏജൻസിയായ എഎൻഐയോട് യോ​ഗി ആദിത്യനാഥ് പറഞ്ഞു.   

ലഖ്‌നൗ: കൊവിഡിൻ്റെ ഒമിക്രോൺ വകഭേദം അതിവേ​ഗം പടരുമെങ്കിലും അതുമൂലം ഉണ്ടാവുന്നത് വൈറൽ പനി പോലെയുള്ള നേരിയ രോ​ഗങ്ങളാണെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് (Yogi Adithyanath about Omicron) . "ഒമിക്രോൺ വേഗത്തിൽ പടരുന്നു, പക്ഷേ വളരെ നിസാരമായ അനുബന്ധരോ​ഗങ്ങളേ അതുമൂലമുള്ളൂ. ഈ കൊവിഡ് വകഭേദം വളരെ ദുർബലമാണ്. ഇത് വൈറൽ പനി പോലെയാണ്, പക്ഷേ മുൻകരുതലുകൾ ആവശ്യമാണ്. എന്നിരുന്നാലും, പരിഭ്രാന്തരാകേണ്ട ആവശ്യമില്ല," - വാ‍ർത്ത ഏജൻസിയായ എഎൻഐയോട് യോ​ഗി ആദിത്യനാഥ് പറഞ്ഞു. 

കൊവിഡിൻ്റെ ഡെൽറ്റ വകഭേദത്തേക്കാൾ മാരകമല്ല ഒമിക്രോറെണെന്നും വൈറസ് ബാധിത‍ർക്ക് നാലോ അഞ്ചോ ദിവസത്തിൽ തന്നെ രോ​ഗമുക്തിയുണ്ടാവുന്നുണ്ടെന്നും യോ​ഗി പറഞ്ഞു. "മാർച്ച്-ഏപ്രിൽ കാലത്ത് വ്യാപിച്ച ഡെൽറ്റ വകഭേദത്തിൽ രോ​ഗബാധിത‍ർ സുഖം പ്രാപിക്കാൻ 15-25 ദിവസമെടുക്കുന്നതായിട്ടാണ് കണ്ടത്. സങ്കീർണമായ പല അനുബന്ധരോ​ഗങ്ങളും രോ​ഗികൾക്ക് അനുഭവപ്പെട്ടിരുന്നു. എന്നാൽ ഒമിക്രോണിൽ അത്തരം പ്രശ്നങ്ങളില്ല. കൊവിഡ്  അന്തിമഘട്ടത്തിലെന്നും, അധികം വൈകാതെ അവസാനിക്കുമെന്നും യോ​ഗി പറഞ്ഞു. 

നവംബർ അവസാനത്തോടെയാണ് ഇന്ത്യയിൽ ആ​​ദ്യമായി ഒമിക്രോൺ സ്ഥീരികരിച്ചത്. യുപിയിൽ ഇതുവരെ എട്ട് പേർക്കാണ് ഒമിക്രോൺ ബാധയുണ്ടായത്. ഇതിൽ നാല് പേർ രോ​ഗമുക്തി നേടി. ബാക്കിയുള്ളവർ നിലവിൽ ചികിത്സയിലാണ്. ഈ വർഷം ആദ്യം നിയമസഭാ തെരഞ്ഞെടുപ്പിലേക്ക് പോകുന്ന അഞ്ച് സംസ്ഥാനങ്ങളിൽ ഒന്നാണ് ഉത്തർപ്രദേശ്. 

ബിജെപി, കോൺഗ്രസ് തുടങ്ങിയ പാർട്ടികളും സമാജ്‌വാദി പാർട്ടി, ബിഎസ്പി തുടങ്ങിയ പ്രാദേശിക പാർട്ടികളും ദേശീയരാഷ്ട്രീയത്തിൽ തന്നെ ഏറെ നിർണായകമായ ഉത്തർപ്രദേശിൽ അധികാരം പിടിക്കാൻ രം​ഗത്തുണ്ട്. തെരഞ്ഞെടുപ്പ് പ്രഖ്യാപനം വന്നില്ലെങ്കിലും സംസ്ഥാനത്ത് തെരഞ്ഞെടുപ്പ് ചൂട് സജീവമാണ്. രാഷ്ട്രീയ പ്രചാരണങ്ങളിലും റാലികളിലും കൊവിഡ് നിയന്ത്രണങ്ങളുടെ വ്യാപകമായ ലംഘനങ്ങൾ റിപ്പോർട്ട് ചെയ്യപ്പെടുന്നുണ്ട്.

തെരഞ്ഞെടുപ്പിന് മുന്നോടിയായി തെരഞ്ഞെടുപ്പ് കമ്മീഷൻ വിളിച്ച യോ​ഗത്തിൽ കൊവിഡ് പ്രോട്ടോക്കോൾ പാലിച്ചു കൊണ്ട് കൃത്യസമയത്ത് തന്നെ തെരഞ്ഞെടുപ്പ് നടത്തണമെന്ന നിലപാടാണ് രാഷ്ട്രീയ പാർട്ടികൾ സ്വീകരിച്ചത്. കൊവിഡ് രണ്ടാം തംര​ഗത്തിൽ വലിയ പ്രതിസന്ധി നേരിട്ട സംസ്ഥാനമാണ് യുപി. രാജ്യത്തേറ്റവും ജനസംഖ്യയുള്ള സംസ്ഥാനത്തെ പകുതിയിലേറെ പേരും രണ്ട് ഡോസുകളും എടുത്തവരാണ്.