മോദിക്കോ, രാഹുലിനോ? ആര്‍ക്കാണ് സ്വീകാര്യത കൂടുതല്‍? കണക്കുകള്‍ പറയുന്നത് ഇങ്ങനെ

മോദിയുടെയും രാഹുലിന്റെയും യുട്യൂബ്, ഫേസ്ബുക്ക്, എക്‌സ്, ഇന്‍സ്റ്റാഗ്രാം അക്കൗണ്ടുകളുടെ എന്‍ഗേജ്‌മെന്റ് കണക്കുകള്‍ നിരത്തിയാണ് തങ്ങളുടെ നേതാവിനാണ് കൂടുതല്‍ സ്വീകാര്യതയെന്ന് ബിജെപിയും കോണ്‍ഗ്രസും വാദിക്കുന്നത്. 

സോഷ്യല്‍മീഡിയയില്‍ 'പുതിയ പോരി'ന് തുടക്കമിട്ട് കോണ്‍ഗ്രസും ബിജെപിയും. സോഷ്യല്‍മീഡിയ പ്ലാറ്റ്‌ഫോമുകളില്‍ പ്രധാനമന്ത്രി നരേന്ദ്രമോദിക്കാണോ രാഹുല്‍ ഗാന്ധിക്കാണോ സ്വീകാര്യത കൂടുതലെന്ന വിഷയത്തിലാണ് ഇരുപാര്‍ട്ടികളും 'തര്‍ക്കം' ആരംഭിച്ചത്. മോദിയുടെയും രാഹുലിന്റെയും യുട്യൂബ്, ഫേസ്ബുക്ക്, എക്‌സ്, ഇന്‍സ്റ്റാഗ്രാം അക്കൗണ്ടുകളുടെ എന്‍ഗേജ്‌മെന്റ് കണക്കുകള്‍ നിരത്തിയാണ് തങ്ങളുടെ നേതാവിനാണ് കൂടുതല്‍ സ്വീകാര്യതയെന്ന് ബിജെപിയും കോണ്‍ഗ്രസും വാദിക്കുന്നത്. 

പാര്‍ലമെന്റില്‍ പ്രധാനമന്ത്രിയുടെ പ്രസംഗത്തേക്കാള്‍ കൂടുതല്‍ കാഴ്ചകള്‍ രാഹുലിന്റെ പ്രസംഗത്തിനാണെന്ന് സന്‍സാദ് ടിവിയുടെ യുട്യൂബ് ചാനലിന്റെ കണക്കുകള്‍ വച്ച് കോണ്‍ഗ്രസ് പറയുന്നു. രാഹുലിന്റെ പ്രസംഗത്തിന് 341 കെ വ്യൂസുണ്ടെന്നും നരേന്ദ്രമോദിയുടേതിന് 228 കെ വ്യൂസാണുള്ളതെന്ന് കോണ്‍ഗ്രസ് പറയുന്നു. ഇരുവരുടെയും ട്വീറ്റുകളുടെ വിവരങ്ങളും കോണ്‍ഗ്രസ് പുറത്തുവിട്ടു. രാഹുല്‍ ഗാന്ധിയുടെ അവസാന 30 ട്വീറ്റുകള്‍ക്ക് 48.13 മില്യണ്‍ ഇംപ്രഷന്‍സുണ്ടെന്നും നരേന്ദ്രമോദിയുടെ അവസാന 30 ട്വീറ്റുകള്‍ക്ക് 21.59 മില്യണ്‍ ഇംപ്രഷന്‍സാണെന്ന് കോണ്‍ഗ്രസ് സോഷ്യല്‍മീഡിയ ടീം പറയുന്നു. 

കോണ്‍ഗ്രസ് പുറത്തുവിട്ട വിവരങ്ങള്‍ക്ക് മറുപടിയുമായി ബിജെപി സോഷ്യല്‍മീഡിയ സംഘവും പിന്നാലെയെത്തി. മോദിയുടെ ട്വിറ്റര്‍ അക്കൗണ്ടിന് കഴിഞ്ഞ ഒരു മാസം 79.9 ലക്ഷം എന്‍ഗേജ്‌മെന്റുണ്ടെന്നും എന്നാല്‍ രാഹുലിന്റേതിന് 23.43 ലക്ഷം എന്‍ഗേജ്‌മെന്റ് മാത്രമാണെന്ന് ബിജെപി പറഞ്ഞു. മോദിയുടെ ഫേസ്ബുക്ക് അക്കൗണ്ടിന് കഴിഞ്ഞ മാസം 57.89 ലക്ഷം എന്‍ഗേജ്‌മെന്റുണ്ടെന്നും രാഹുലിന്റെ അക്കൗണ്ടിന് 28.38 ലക്ഷം എന്‍ഗേജ്‌മെന്റ് മാത്രമാണെന്ന് ബിജെപി സംഘം പറഞ്ഞു. ഫേസ്ബുക്ക് എന്‍ഗേജ്‌മെന്റില്‍, ഈ വര്‍ഷത്തെ ഇതുവരെയുള്ള കണക്കുകള്‍പ്രകാരം പ്രധാനമന്ത്രി മോദിയാണ് മുന്‍പന്തിയിലെന്നും ബിജെപി പറഞ്ഞു. മോദിയുടെ അക്കൗണ്ടിന് 3.25 കോടി എന്‍ഗേജ്‌മെന്റാണെന്നും രാഹുലിന്റേതിന് 1.88 കോടി എന്‍ഗേജ്‌മെന്റാണെന്ന് ബിജെപി പറഞ്ഞു. 

ഇരുവരുടെയും യുട്യൂബ് ചാനലുകളിലെ കാഴ്ച്ചക്കാരുടെ വിവരങ്ങളും ബിജെപി പുറത്തുവിട്ടു. കഴിഞ്ഞ ഒരുമാസത്തില്‍ പ്രധാനമന്ത്രിയുടെ ചാനലിന് 25.46 കോടി വ്യൂസ് ലഭിച്ചു. എന്നാല്‍ രാഹുലിന്റേതിന് 4.82 കോടി വ്യൂസാണെന്ന് ബിജെപി പറയുന്നു. ഈ വര്‍ഷത്തില്‍ മോദിയുടെ ചാനലിന് ലഭിച്ചത് 75.79 കോടി വ്യൂസ്. രാഹുലിന്റേതിന് 25.38 കോടി വ്യൂസാണെന്നും ബിജെപി പറഞ്ഞു. മോദിയുടെയും രാഹുലിന്റെയും ഇന്‍സ്റ്റാഗ്രാം അക്കൗണ്ട് വ്യൂസുകള്‍ വ്യക്തമാക്കുന്ന സ്‌ക്രീന്‍ഷോട്ടുകളും ബിജെപി പുറത്തുവിട്ടിട്ടുണ്ട്.