പ്രധാനമന്ത്രിയുടെ വീഡിയോ നീക്കം ചെയ്തതിൽ സക്കർബർഗ് മാപ്പ് പറയണമെന്ന് പാർലമെന്ററി സമിതി, ഐടി നിയമപരിരക്ഷ നീക്കുമെന്ന് മുന്നറിയിപ്പ്

പ്രധാനമന്ത്രിയുടെ ഫേസ്ബുക്ക് വീഡിയോ നീക്കം ചെയ്തതിൽ മെറ്റാ സിഇഒ മാർക്ക് സക്കർബർഗ് മാപ്പ് പറയണമെന്ന് പാർലമെന്ററി സമിതി ആവശ്യപ്പെട്ടു. മൂന്ന് ദിവസത്തിനകം മാപ്പ് പറഞ്ഞില്ലെങ്കിൽ ഐടി നിയമപ്രകാരമുള്ള നിയമപരിരക്ഷ നീക്കുമെന്ന് സമിതി മുന്നറിയിപ്പ് നൽകി

ദില്ലി: പ്രധാനമന്ത്രി നരേന്ദ്ര മോദിയുടെ ഔദ്യോഗിക ഫേസ്ബുക്ക് വീഡിയോ താത്കാലികമായി നീക്കം ചെയ്ത സംഭവത്തിൽ മെറ്റാ സി ഇ ഓ മാർക്ക് സക്കർബർഗ് വ്യക്തിപരമായി നിബന്ധനകളില്ലാതെ മാപ്പ് പറയണമെന്ന് കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി പാർലമെന്ററി സ്റ്റാൻഡിംഗ് കമ്മിറ്റി ആവശ്യപ്പെട്ടു. സംഭവത്തിന് ഉത്തരവാദികളായവർക്കെതിരെ കർശന നടപടി സ്വീകരിക്കണമെന്നും, മൂന്ന് ദിവസത്തിനുള്ളിൽ മാപ്പ് പറയാൻ സക്കർബർഗ് തയ്യാറായില്ലെങ്കിൽ ഐ ടി നിയമം ഉറപ്പുനൽകുന്ന നിയമപരിരക്ഷ നീക്കം ചെയ്യുമെന്നുമെന്നും സമിതി മുന്നറിയിപ്പ് നൽകി. ഈ സുരക്ഷ നീക്കിയാൽ ഉപയോക്താക്കൾ പങ്കുവെക്കുന്ന ഉള്ളടക്കങ്ങളിൽ മെറ്റയെ ഒരു പബ്ലിഷറായി കണക്കാക്കി നേരിട്ട് നിയമനടപടികൾ സ്വീകരിക്കാൻ സാധിക്കും.

വിവാദം കടുത്തതോടെ മെറ്റയുടെ പബ്ലിക് പോളിസി ആൻഡ് ഗ്ലോബൽ അഫയേഴ്‌സ് മേധാവി ജോയൽ കപ്ലാന്റെ നേതൃത്വത്തിലുള്ള ഉന്നതതല സംഘം കേന്ദ്ര ഐ ടി മന്ത്രാലയ സെക്രട്ടറി എസ് കൃഷ്ണനുമായി കൂടിക്കാഴ്ച നടത്തി. ദില്ലിയിലെ ഐ ടി മന്ത്രാലയ ഓഫീസിൽ വെച്ച് നടന്ന കൂടിക്കാഴ്ച ഏകദേശം 45 മിനിറ്റോളം നീണ്ടുനിന്നു. ആൽഗരിതത്തിലുണ്ടായ സാങ്കേതിക പിഴവ് മൂലമാണ് വീഡിയോ നീക്കം ചെയ്യപ്പെട്ടതെന്നും, വി വി ഐ പി അക്കൗണ്ടുകൾക്ക് ഭാവിയിൽ കൂടുതൽ സുരക്ഷാ മാനദണ്ഡങ്ങൾ ഉറപ്പാക്കുമെന്നും മെറ്റ പ്രതിനിധികൾ കൂടിക്കാഴ്ചയിൽ വിശദീകരിച്ചു.