വിൽക്കാൻ കേന്ദ്രം, ഐഡിബിഐ ജീവനക്കാരുടെ സമരത്തിന് രാഹുലിന്‍റെ പിന്തുണ; കനേഡിയൻ കമ്പനിക്ക് വിൽക്കുന്നതിൽ പ്രതിഷേധം ശക്തം

ഐഡിബിഐ ബാങ്ക് സ്വകാര്യവൽക്കരിക്കാനുള്ള കേന്ദ്ര സർക്കാർ നീക്കത്തിനെതിരെ ജീവനക്കാർ നടത്തുന്ന സമരത്തിന് പ്രതിപക്ഷ നേതാവ് രാഹുൽ ഗാന്ധി പിന്തുണ പ്രഖ്യാപിച്ചു. പൊതുജനങ്ങളുടെ പണം ഉപയോഗിച്ച് നിർമ്മിച്ച ലാഭകരമായ സ്ഥാപനം വിൽക്കുന്നതിൻ്റെ യുക്തിയെ ചോദ്യം ചെയ്ത അദ്ദേഹം, ഇത് ജീവനക്കാരെയും നിക്ഷേപകരെയും ബാധിക്കുമെന്ന ആശങ്ക പങ്കുവെച്ചു.

ന്യൂഡൽഹി: കാനഡ ആസ്ഥാനമായുള്ള ഫെയർഫാക്സ് ഫിനാൻഷ്യൽ ഹോൾഡിങ്സിന് ഐഡിബിഐ ബാങ്കിലെ ഭൂരിപക്ഷ ഓഹരികൾ വിൽക്കാനുള്ള കേന്ദ്ര സർക്കാരിന്‍റെ നീക്കത്തിനെതിരെ ജീവനക്കാർ നടത്തുന്ന സമരത്തിന് പിന്തുണയുമായി ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. പൊതുജനങ്ങളുടെ പണം ഉപയോഗിച്ച് നിർമ്മിച്ച ലാഭകരമായ ഒരു പൊതുമേഖലാ സ്ഥാപനം സർക്കാർ വിൽക്കുകയാണെന്ന് അദ്ദേഹം കുറ്റപ്പെടുത്തി. ബാങ്ക് ജീവനക്കാർക്ക് അയച്ച തുറന്ന കത്തിലാണ് രാഹുൽ ഗാന്ധി സർക്കാരിന്‍റെ നടപടിക്കെതിരെ രംഗത്തുവന്നത്.

ഐഡിബിഐ ബാങ്ക് സ്വകാര്യവൽക്കരിക്കുന്നതിന്‍റെ യുക്തിയെ ചോദ്യം ചെയ്ത അദ്ദേഹം, ഈ ഇടപാട് ജീവനക്കാരെയും നിക്ഷേപകരെയും സംവരണ നയങ്ങളെയും എങ്ങനെ ബാധിക്കുമെന്ന ആശങ്കയും പങ്കുവെച്ചു. കഴിഞ്ഞ വർഷം മാർച്ചിൽ പാർലമെന്‍റ് മന്ദിരത്തിൽ വെച്ച് ഐഡിബിഐ ബാങ്ക് ജീവനക്കാരുമായി നടത്തിയ കൂടിക്കാഴ്ച രാഹുൽ ഗാന്ധി കത്തിൽ ഓർമ്മപ്പെടുത്തി. ജീവനക്കാരുടെ കഠിനാധ്വാനം കൊണ്ട് ലാഭത്തിലാക്കിയ ഒരു ബാങ്ക് എന്തിനാണ് സർക്കാർ വിൽക്കുന്നതെന്ന് അവർ തന്നോട് ചോദിച്ചിരുന്നുവെന്നും, ഈ ചോദ്യം താൻ ലോക്സഭയിൽ ഉന്നയിച്ചിട്ടും സർക്കാർ വ്യക്തമായ കാരണങ്ങളൊന്നും നൽകിയില്ലെന്നും അദ്ദേഹം ചൂണ്ടിക്കാണിച്ചു. നിലവിൽ കനേഡിയൻ കമ്പനിയായ ഫെയർഫാക്സിന് ബാങ്ക് വിൽക്കാനാണ് സർക്കാർ തീരുമാനിച്ചിരിക്കുന്നത്.

ഐഡിബിഐ ബാങ്കിൽ കുറഞ്ഞത് 51 ശതമാനം ഓഹരി ഉടമസ്ഥതയെങ്കിലും സർക്കാർ എക്കാലത്തും നിലനിർത്തുമെന്ന് 2003-ൽ പാർലമെന്‍റിന് നൽകിയ ഉറപ്പും രാഹുൽ ഗാന്ധി ഓർമ്മിപ്പിച്ചു. പൊതുജനങ്ങളുടെ പണം കൊണ്ട് നിർമ്മിച്ച ഒരു സ്ഥാപനം ജനങ്ങൾക്ക് അവകാശപ്പെട്ടതാണെന്നും, നിയമപരമായി ഇത് ബാധകമല്ലെങ്കിലും ജനങ്ങൾക്ക് നൽകിയ വാഗ്ദാനമാണിതെന്നും അദ്ദേഹം കത്തിൽ വ്യക്തമാക്കി. ഇതിനിടയിൽ, ഓഹരി വിൽപനയുമായി ബന്ധപ്പെട്ട മൂല്യനിർണ്ണയ പ്രക്രിയയിലെ കാലതാമസവും രീതികളിലെ മാറ്റങ്ങളും ചൂണ്ടിക്കാട്ടി വിവിധ കോണുകളിൽ നിന്ന് ചോദ്യങ്ങൾ ഉയരുന്നുണ്ട്. കോൺഗ്രസ് ബാങ്കുകൾ നിർമ്മിച്ചുവെന്നും ബിജെപി അവ വിറ്റു നശിപ്പിക്കുകയാണെന്നുമാണ് രാഹുലിന്‍റെ ആക്ഷേപം.