അപകീര്ത്തി കേസ്: രാഹുല്ഗാന്ധി ഇന്ന് അപ്പീല് നല്കും, സൂറത്ത് സെഷന്സ് കോടതിയില് നേരിട്ട് ഹാജരാകും
Synopsis
ശിക്ഷാ വിധിയില് പാളിച്ചയുണ്ടെന്നും, കുറ്റവും ശിക്ഷയും റദ്ദാക്കണമെന്നും രാഹുല് ഗാന്ധി ആവശ്യപ്പെടും.
ദില്ലി : അയോഗ്യതയിലേക്ക് നയിച്ച അപകീര്ത്തി കേസില് രാഹുല്ഗാന്ധി ഇന്ന് അപ്പീല് നല്കും. സൂറത്ത് സെഷന്സ് കോടതിയില് നേരിട്ട് ഹാജരാകും. ശിക്ഷാ വിധിയില് പാളിച്ചയുണ്ടെന്നും, കുറ്റവും ശിക്ഷയും റദ്ദാക്കണമെന്നും രാഹുല് ഗാന്ധി ആവശ്യപ്പെടും. രാഷ്ട്രീയ നേട്ടത്തിനായി അപ്പീല് വൈകിപ്പിക്കുന്നുവെന്ന ബിജെപിയുടെ വിമര്ശനത്തിനിടെ രാഹുല് ഗാന്ധി സെഷന്സ് കോടതിയിലേക്ക് നീങ്ങുന്നത്. മനു അഭിഷേക് സിംഗ്വി, പി ചിദംബരം, സല്മാന് ഖുര്ഷിദ് അടങ്ങുന്ന പാര്ട്ടിയുടെ തന്നെ അഞ്ചംഗ നിയമ വിദഗ്ധ സംഘമാണ് അപ്പീല് തയ്യാറാക്കിയത്.
കുറ്റവും, ശിക്ഷയും കോടതി സ്റ്റേ ചെയ്താല് രാഹുല് ഗാന്ധിക്ക് അത് വലിയ ആശ്വാസവും ആത്മവിശ്വാസവുമാകും. പാർലമെന്റ് അംഗത്വത്തിലെ അയോഗ്യതയും നീങ്ങും. എന്നാല് പാറ്റ്ന, ഹരിദ്വാർ എന്നിവിടങ്ങളിലടക്കം മറ്റ് കോടതികളിലും മാനനഷ്ടക്കേസുകള് നിലനില്ക്കുന്നുണ്ട്. കോലാര് പ്രസംഗത്തില് മോദിയെന്ന് പേരുള്ളവരെ അപമാനിച്ചുവെന്ന പരാതിയില് കഴിഞ്ഞ മാസം 23 നാണ് രാഹുല് ഗാന്ധിയെ സൂറത്ത് ചീഫ് ജുഡീഷ്യല് മജിസ്ട്രേറ്റ് കോടതി ശിക്ഷിച്ചത്. രണ്ട് വര്ഷം തടവും പതിനയ്യായിരം രൂപ പിഴയും ശിക്ഷ വിധിച്ച കോടതി അപ്പീല് നല്കാന് ഒരു മാസത്തെ സാവകാശം നല്കുകയും ചെയ്തിരുന്നു. കോടതി വിധിക്ക് പിന്നാലെ രാഹുലിന്റെ ലോക് സഭാംഗത്വവും റദ്ദായിരുന്നു.
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam