ദില്ലിയിലെ സിആർപിഎഫ് ക്യാമ്പുകൾക്ക് തീവ്രവാദഭീഷണിയെന്ന് ഇന്റലിജൻസ് റിപ്പോർട്ട്

ജമ്മു കശ്മീരിൽ സുരക്ഷാഭടന്മാർക്ക് നേരെ തീവ്രവാദ ആക്രമണങ്ങൾ നിരന്തരം ഉണ്ടായിക്കൊണ്ടിരിക്കുന്ന സാഹചര്യത്തിലാണ് ദില്ലിയിലും ആക്രമണത്തിന് സാധ്യതയുണ്ടെന്ന് ഇന്റലിജൻസ് വിഭാ​ഗം മുന്നറിയിപ്പ് നൽകിയിരിക്കുന്നത്.

ദില്ലി: ദില്ലിയിലെ സിആർപിഎഫ് ക്യാമ്പുകൾക്ക് നേരെ തീവ്രവാദഭീഷണിയുണ്ടെന്ന് ഇന്റലിജൻസ് റിപ്പോർട്ട്. ഇതിന്റെ പശ്ചാത്തലത്തിൽ ജാ​ഗ്രത പുലർത്താൻ സൈനികർക്ക് ഉന്നത ഉദ്യോ​ഗസ്ഥർ നിർദ്ദേശം നൽകി.

ജമ്മു കശ്മീരിൽ സുരക്ഷാഭടന്മാർക്ക് നേരെ തീവ്രവാദ ആക്രമണങ്ങൾ നിരന്തരം ഉണ്ടായിക്കൊണ്ടിരിക്കുന്ന സാഹചര്യത്തിലാണ് ദില്ലിയിലും ആക്രമണത്തിന് സാധ്യതയുണ്ടെന്ന് ഇന്റലിജൻസ് വിഭാ​ഗം മുന്നറിയിപ്പ് നൽകിയിരിക്കുന്നത്. വിവിധ തീവ്രവാദി ​സംഘങ്ങൾ ദില്ലിയിൽ ആക്രമണം നടത്താൻ സാധ്യതയുണ്ട്, ജാ​ഗ്രതയോടെയിരിക്കുക എന്നാണ് മുന്നറിയിപ്പ്.  ഈ സാഹചര്യത്തിൽ ദില്ലിയിലെയും വടക്കേ ഇന്ത്യയിലെയും മുഴുവൻ സിആർപിഎഫ് യൂണിറ്റുകളോടും ജാ​ഗരൂകമാകാൻ അധികൃതർ നിർദ്ദേശിച്ചു. ആവശ്യമെങ്കിൽ വിവിധയിടങ്ങളിൽ കൂടുതൽ സേനാം​ഗങ്ങളെ വിന്യസിക്കാനും നിർദ്ദേശമുണ്ട്.