​ഗതിമാറിയൊഴുകി നദി; ഭയന്നോടി ആളുകള്‍; ഷിരൂരിൽ മണ്ണിടിച്ചിലിന് തൊട്ടുപിന്നാലെയുള്ള ഞെട്ടിക്കുന്ന ദൃശ്യങ്ങൾ

മണ്ണിടിച്ചിലിൽ ഏറ്റവും കൂടുതൽ നാശനഷ്ടമുണ്ടായത് ഉളുവരെ ​ഗ്രാമത്തിലാണ് ഇവിടെ നിരവധി വീടുകൾ തകർന്നു. ആ ഭാ​ഗത്തുണ്ടായിരുന്ന ജനങ്ങളാണ് ഓടിരക്ഷപ്പെടുന്നത്. നാട്ടുകാരിലൊരാൾ പകർത്തിയ ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്. 

ബെം​ഗളൂരു: ഷിരൂർ മണ്ണിടിച്ചിലിൽ ദുരന്തത്തിന് തൊട്ടുപിന്നാലെയുള്ള ഞെട്ടിക്കുന്ന ദൃശ്യങ്ങൾ ഏഷ്യാനെറ്റ് ന്യൂസിന് ലഭിച്ചു. മണ്ണിടിഞ്ഞതിന് പിന്നാലെ നദിയുടെ മറുകരയിലുള്ളവർ ഭയന്നോടുന്നതാണ് ദൃശ്യങ്ങളിൽ കാണുന്നത്. നാട്ടുകാർ ഓടിക്ഷപ്പെടുന്നതാണ് കാണാൻ സാധിക്കും. ​ഗം​ഗാവലി പുഴയുടെ മറുകരയിൽ നിന്നുള്ള ഉളുവരെ എന്ന ​ഗ്രാമത്തിൽ നിന്നുള്ള ദൃശ്യങ്ങളാണിത്.

മണ്ണിടിച്ചിൽ ഉണ്ടായ പ്രദേശത്ത് താഴ്ഭാ​ഗത്തായി ഒരു റെയിൽവേ പാലമുണ്ട്. ആ പാലത്തിന് സമീപത്തുണ്ടായിരുന്നവരാണ് പുഴയിൽ പെട്ടെന്ന് വെള്ളം കൂടുന്നതായി കണ്ടത്. മണ്ണിടിഞ്ഞ് പുഴയിലേക്കാണ് വീണത്. അതോടെ പുഴ ​ഗതി മാറിയൊഴുകുന്ന അവസ്ഥ ഉണ്ടായി. മണ്ണിടിച്ചിലിൽ ഏറ്റവും കൂടുതൽ നാശനഷ്ടമുണ്ടായത് ഉളുവരെ ​ഗ്രാമത്തിലാണ് ഇവിടെ നിരവധി വീടുകൾ തകർന്നു. ആ ഭാ​ഗത്തുണ്ടായിരുന്ന ജനങ്ങളാണ് ഓടിരക്ഷപ്പെടുന്നത്. നാട്ടുകാരിലൊരാൾ പകർത്തിയ ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്. 

അതേ സമയം മണ്ണിടിച്ചിലിൽ കാണാതായ കോഴിക്കോട് സ്വദേശി അർജുനായുള്ള തെരച്ചിൽ നാളെയും തുടരും. ചില നിർണായക സൂചനകൾ ഇന്ന് പുഴയിൽ നിന്ന് ലഭിച്ചിട്ടുണ്ട്. കഴിഞ്ഞ ദിവസം റഡാർ സി​ഗ്നൽ ലഭിച്ച അതേ സ്ഥലത്ത് നിന്നും സോണാർ സി​ഗ്നലും ലഭിച്ചിട്ടുണ്ട്. ഇത് രക്ഷാദൗത്യത്തിൽ നിർണായകമായേക്കുമെന്ന് സൈന്യം അറിയിക്കുന്നു. വലിയ ലോഹഭാഗത്തിന്‍റെതെന്ന സിഗ്നല്‍ ലഭിച്ചതില്‍ രണ്ട് സാധ്യതകളാണ് സൈന്യം മുന്നോട്ട് വെക്കുന്നത്. അതിലൊന്ന് ചിലപ്പോള്‍ ഈ സിഗ്നല്‍ മണ്ണിടിച്ചിലിനിടെ മറിഞ്ഞു വീണ ടവറാകാം. അതല്ലെങ്കിൽ അർജുന്റെ ലോറിയാകാം എന്നാണ്. നാളെ ഐബോഡ് ഉപയോ​ഗിച്ച് പരിശോധന നടത്താനാണ് നീക്കം.