'മഞ്ഞുമ്മൽ ബോയ്സ്' സാമ്പത്തിക തട്ടിപ്പ് കേസ്: സൗബിന് ആശ്വാസം, മുൻകൂർ ജാമ്യത്തിൽ തുടരാം, ഹൈക്കോടതി ഉത്തരവിൽ ഇടപെടാതെ സുപ്രീംകോടതി
Synopsis
ഹൈക്കോടതി മുൻകൂർ ജാമ്യം നൽകിയതിനെതിരായ ഹർജിയിൽ ഇടപെടാതെ സുപ്രീംകോടതി
ദില്ലി: മഞ്ഞുമ്മൽ ബോയ്സ് സിനിമയുമായി ബന്ധപ്പെട്ട സാമ്പത്തിക തട്ടിപ്പ് കേസില് നടൻ സൗബിൻ ഷാഹിറിന് ആശ്വാസം. ഹൈക്കോടതി മുൻകൂർ ജാമ്യം നൽകിയതിനെതിരായ ഹർജിയിൽ ഇടപെടാതെ സുപ്രീംകോടതി. ഇതോടെ സൗബിന് മുൻകൂർ ജാമ്യത്തിൽ തുടരാം. കേസിലെ പരാതിക്കാരൻ സിറാജാണ് സുപ്രീം കോടതിയിൽ ഹർജി നൽകിയത്. സൗബിൻ ഉള്പ്പെടെയുള്ളവര്ക്ക് ഹൈക്കോടതി നൽകിയ മുൻകൂർ ജാമ്യം റദ്ദാക്കണമെന്നായിരുന്നു ഹർജിയിലെ ആവശ്യം.
സൗബിന് ഷാഹിര്, ബാബു ഷാഹിര്, ഷോണ് ആന്റണി എന്നിവര്ക്കാണ് ഹൈക്കോടതി നേരത്തെ മുന്കൂര് ജാമ്യം അനുവദിച്ചത്. മഞ്ഞുമ്മല് ബോയ്സ് സിനിമയുടെ ലാഭവിഹിതത്തിന്റെ 40 ശതമാനം നല്കാമെന്ന് വാഗ്ദാനം ചെയ്ത് തന്റെ പക്കല് നിന്ന് ഏഴു കോടി രൂപ വാങ്ങിയെന്നും സിനിമ ലാഭത്തിലായിട്ടും തനിക്ക് പണം നല്കിയില്ലെന്നും കാട്ടി അരൂര് സ്വദേശി സിറാജ് നല്കിയ പരാതിയിലാണ് മൂവര്ക്കുമെതിരെ പൊലീസ് കേസെടുത്തിരുന്നത്. മരട് പൊലീസ് രജിസ്റ്റര് ചെയ്ത കേസിലാണ് ഹൈക്കോടതി മുന്കൂര് ജാമ്യം നല്കിയത്.