ടാറ്റാ സൺസിന്റെ ഓഹരിവിപണിയിലെ ലിസ്റ്റിങ് ഒഴിവാക്കാൻ ടാറ്റാ ട്രസ്റ്റിന്റെ വമ്പൻ നീക്കം; രണ്ട് കമ്പനികൾ ലയിപ്പിക്കും

ടാറ്റാ സൺസിൽ ടാറ്റാ ട്രസ്റ്റിന് 66 ശതമാനം ഓഹരിയാണുള്ളത്. ടാറ്റാ സൺസിന്റെ ലിസ്റ്റിങ് ഒഴിവാക്കാനായി ടാറ്റാ ഇലക്ട്രോണിക്സ് സിസ്റ്റംസ് സൊല്യൂഷൻസ് പ്രൈവറ്റ് ലിമിറ്റഡ്(TESS) ടാറ്റാ കൺസൾട്ടിങ് എൻജിനീയർസ്(TCE) എന്നീ കമ്പനികളെ ടാറ്റാ സൺസുമായി ലയിപ്പിക്കാനാണ് ടാറ്റാ സൺസ് ബോർഡിനോട് ടാറ്റാ ട്രസ്റ്റ്സ് ആവശ്യപ്പെട്ടിരിക്കുന്നത്.

മുംബൈ: ടാറ്റാ ​ഗ്രൂപ്പിന്റെ മാതൃകമ്പനിയായ ടാറ്റാ സൺസിനെ ഓഹരി വിപണിയിൽ ലിസ്റ്റ് ചെയ്യുന്നത് ഒഴിവാക്കാനായി പുതിയ നീക്കങ്ങളുമായി ടാറ്റാ ട്രസ്റ്റ്. ടാറ്റാ സൺസിന്റെ ലിസ്റ്റിങ് ഒഴിവാക്കാനും റിസർവ് ബാങ്കിന്റെ എൻബിഎഫ്സി, സിഐസി ചട്ടക്കൂട്ടിൽനിന്ന് ഒഴിവാകാനുമായി രണ്ട് കമ്പനികൾ ലയിപ്പിക്കാനുള്ള പുനഃസംഘടനാ നിർദേശമാണ് ടാറ്റാ ട്രസ്റ്റ് മുന്നോട്ടുവെച്ചിരിക്കുന്നതെന്ന് വിവിധ ദേശീയ മാധ്യമങ്ങൾ റിപ്പോർട്ട് ചെയ്തു.

ടാറ്റാ സൺസിൽ ടാറ്റാ ട്രസ്റ്റിന് 66 ശതമാനം ഓഹരിയാണുള്ളത്. ടാറ്റാ സൺസിന്റെ ലിസ്റ്റിങ് ഒഴിവാക്കാനായി ടാറ്റാ ഇലക്ട്രോണിക്സ് സിസ്റ്റംസ് സൊല്യൂഷൻസ് പ്രൈവറ്റ് ലിമിറ്റഡ്(TESS) ടാറ്റാ കൺസൾട്ടിങ് എൻജിനീയർസ്(TCE) എന്നീ കമ്പനികളെ ടാറ്റാ സൺസുമായി ലയിപ്പിക്കാനാണ് ടാറ്റാ സൺസ് ബോർഡിനോട് ടാറ്റാ ട്രസ്റ്റ്സ് ആവശ്യപ്പെട്ടിരിക്കുന്നത്. ഈ പുനഃസംഘടനയ്ക്കായി റിസർവ് ബാങ്കിൽനിന്ന് എൻഒസി തേടാനും നിർദേശിച്ചിട്ടുണ്ട്.

ലയനം പൂർത്തിയാകുന്നതോടെ ടാറ്റാ സൺസിനെ എൻബിഎഫ്സിയോ സിഐസിയോ ആയി കണക്കാക്കാൻ കഴിയില്ലെന്നാണ് ടാറ്റാ ട്രസ്റ്റ്സ് വിലയിരുത്തുന്നത്. ലയനം പൂർത്തിയായാൽ ഈ വർ​ഗീകരണത്തിൽനിന്ന് ഒഴിവാകും. വെറും ഹോൾഡിങ് കമ്പനിയായി തുടരുന്നതിന് പകരം, ലയനത്തോടെ സ്വന്തമായി പ്രവർത്തന വരുമാനമുള്ള കമ്പനിയായി ടാറ്റാ സൺസ് മാറും.

2022-ലാണ് ആർബിഐ ടാറ്റാ സൺസിനെ അപ്പർ ലെയർ എൻബിഎഫ്സിയാക്കിയത്. ഇതോടെ ടാറ്റാ സൺസ് ഓഹരി വിപണിയിൽ ലിസ്റ്റ് ചെയ്യേണ്ടത് നിർബന്ധമായിരുന്നു. ഇതിൽനിന്ന് ഇളവ് തേടി ടാറ്റാ സൺസ് അപേക്ഷ നൽകിയിരുന്നെങ്കിലും ആർബിഐ ഇത് തള്ളിയിരുന്നു. തുടർന്നാണ് ഓഹരി വിപണിയിൽ ലിസ്റ്റ് ചെയ്യാത്ത കമ്പനിയായി തുടരാനുള്ള നീക്കങ്ങൾ ആരംഭിച്ചത്. ടാറ്റാ സൺസ് 80 വർഷത്തോളം സ്വന്തമായി പ്രവർത്തന വരുമാനമുള്ള കമ്പനിയായാണ് പ്രവർത്തിച്ചിരുന്നത്. 2004-ൽ പ്രത്യേക കമ്പനിയായി രൂപീകരിക്കുന്നത് വരെ ടിസിഎസും ടാറ്റാ സൺസിന്റെ ഭാ​ഗമായിരുന്നു.