National Commission for Women : ദേശീയ വനിതാ കമ്മീഷന്റെ സ്ഥാപക ദിന പരിപാടിയെ പ്രധാനമന്ത്രി അഭിസംബോധന ചെയ്യും

വിവിധ മേഖലകളിലെ വനിതകളുടെ നേട്ടങ്ങൾ ആഘോഷിക്കാൻ ലക്ഷ്യമിട്ടുള്ള ‘ഷീ ദി ചേഞ്ച് മേക്കർ’ എന്നതാണ് പരിപാടിയുടെ പ്രമേയം.

ദില്ലി: നാളെ നടക്കാനിരിക്കുന്ന ദേശീയ വനിതാ കമ്മീഷന്റെ ( National Commission for Women) സ്ഥാപക ദിന പരിപാടിയെ പ്രധാനമന്ത്രി നരേന്ദ്രമോദി (Narendra Modi) അഭിസംബോധന ചെയ്യും.  വൈകുന്നേരം 4:30 ന് വീഡിയോ കോൺഫറൻസിംഗിലൂടെയാണ് 30-ാമത് ദേശീയ വനിതാ കമ്മീഷൻ സ്ഥാപക ദിന പരിപാടിയെ പ്രധാനമന്ത്രി അഭിസംബോധന ചെയ്യുക. വിവിധ മേഖലകളിലെ വനിതകളുടെ നേട്ടങ്ങൾ ആഘോഷിക്കാൻ ലക്ഷ്യമിട്ടുള്ള ‘ഷീ ദി ചേഞ്ച് മേക്കർ’ എന്നതാണ് പരിപാടിയുടെ പ്രമേയം.

സംസ്ഥാന വനിതാ കമ്മീഷനുകൾ, സംസ്ഥാന ഗവണ്മെന്റുകളിലെ വനിതാ-ശിശു വികസന വകുപ്പ്, സർവകലാശാലകൾ , കോളേജ് അധ്യാപിക അധ്യാപകർ, വിദ്യാർഥികൾ, സന്നദ്ധ സംഘടനകൾ, വനിതാ സംരംഭകർ, ബിസിനസ് സംഘടനകൾ എന്നിവർ പരിപാടിയുടെ ഭാഗമാകും. കേന്ദ്ര വനിതാ ശിശു വികസന മന്ത്രിയും ചടങ്ങിൽ പങ്കെടുക്കും.