'സിനിമാരം​ഗത്തെ ഒരേയൊരു ടൈ​ഗർ സൽമാൻ തന്നെ'; ലോറൻസ് ബിഷ്ണോയി ​ഗ്യാങ്ങിനെ ചൊടിപ്പിച്ചത് ടൈ​ഗർ ഷ്റോഫിന്റെ ആ പ്രശംസ

അറസ്റ്റിലായ പ്രതികളിലൊരാളാണ് ചോദ്യംചെയ്യലിൽ ഇക്കാര്യം വെളിപ്പെടുത്തിയത്. ടൈ​​ഗർ ഷ്റോഫ് 2022-ൽ സൽമാൻ ഖാനെ പുകഴ്ത്തി സംസാരിച്ചതും അദ്ദേഹവുമായുള്ള അടുത്തബന്ധവുമാണ് ടൈ​ഗർ ഷ്റോഫിനെ ലക്ഷ്യമിടാൻ കാരണമായതെന്നും പ്രതി പൊലീസിനോട് പറഞ്ഞു.

മുംബൈ: നടൻ ടൈ​ഗർ ഷ്റോഫിനെ ലോറൻസ് ബിഷ്ണോയിയുടെ സംഘം വധിക്കാൻ ശ്രമിച്ചതിന് പിന്നിൽ സൽമാൻ ഖാനുമായുള്ള അടുപ്പം തന്നെയെന്ന് വെളിപ്പെടുത്തൽ. അറസ്റ്റിലായ പ്രതികളിലൊരാളാണ് ചോദ്യംചെയ്യലിൽ ഇക്കാര്യം വെളിപ്പെടുത്തിയത്. ടൈ​​ഗർ ഷ്റോഫ് 2022-ൽ സൽമാൻ ഖാനെ പുകഴ്ത്തി സംസാരിച്ചതും അദ്ദേഹവുമായുള്ള അടുത്തബന്ധവുമാണ് ടൈ​ഗർ ഷ്റോഫിനെ ലക്ഷ്യമിടാൻ കാരണമായതെന്നും പ്രതി പൊലീസിനോട് പറഞ്ഞു.

2022-ൽ ബജ്റങി ഭൈജാൻ സിനിമയുടെ പ്രൊമോഷൻ പരിപാടിക്കിടെ സൽമാൻ ഖാനെ പുകഴ്ത്തി സംസാരിച്ചതാണ് ലോറൻസ് ബിഷ്ണോയി സം​ഘത്തിന്റെ ഹിറ്റ്ലിസ്റ്റിൽ ടൈ​ഗർ ഷ്റോഫും ഇടംപിടിക്കാൻ കാരണമായത്. സിനിമാരം​ഗത്തെ ഒരോയൊരു ടൈ​ഗർ സൽമാൻ ഖാൻ ആണെന്നായിരുന്നു ടൈ​ഗർ ഷ്റോഫ് 2022-ൽ നടന്ന പരിപാടിയിൽ പ്രസം​ഗിച്ചത്. ഇതോടെ സൽമാൻ ഖാനുമായി അടുപ്പമുള്ളവരെ ഭീഷണിപ്പെടുത്തിയിരുന്ന ലോറൻസ് ബിഷ്ണോയി സംഘത്തിന്റെ പട്ടികയിൽ ടൈ​ഗർ ഷ്റോഫിന്റെ പേരും ഇടംപിടിച്ചു. തുടർന്നാണ് മുംബൈയിൽ സൽമാൻ ഖാനെ ലക്ഷ്യമിട്ടെത്തിയ അക്രമികൾ ഇത് നടക്കാതായതോടെ ടൈ​ഗർ ഷ്റോഫിന് നേരേ വെടിവെപ്പ് നടത്തിയതെന്നും റിപ്പോർട്ടുകളിൽ പറയുന്നു.

1998-ൽ കൃഷ്ണമൃ​ഗത്തെ വേട്ടയാടിയ കേസിൽ സൽമാൻ ഖാൻ ഉൾപ്പെട്ടതിന് പിന്നാലെയാണ് ലോറൻസ് ബിഷ്ണോയി ​ഗ്യാങ്ങിന് നടനുമായുള്ള ശത്രുത ഉടലെടുത്തത്. ബിഷ്ണോയി സമൂഹം പവിത്രമായി കരുതുന്ന മൃ​ഗമാണ് കൃഷ്ണമൃ​ഗം. കൃഷ്ണമൃ​ഗത്തെ സംരക്ഷിക്കാനും ബിഷ്ണോയി സമൂഹം അതിയായ ജാ​ഗ്രത പുലർത്താറുണ്ട്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

ടൈ​ഗർ ഷ്റോഫിന് നേരേ വെടിയുതിർത്ത മൂന്നം​ഗസംഘത്തെ രാജസ്ഥാനിലെ കോട്ടയിൽവെച്ചാണ് പൊലീസ് സംഘം പിടികൂടിയത്. ഇതിനുപിന്നാലെ ഇവർക്ക് ആയുധം എത്തിച്ചുനൽകിയ രണ്ട് സ്ത്രീകളടക്കം കൂടുതൽ പ്രതികളും പിടിയിലായി. അതേസമയം, കേസിൽ ഇതുവരെ ടൈ​ഗർ ഷ്റോഫിന്റെ മൊഴി രേഖപ്പെടുത്തിയിട്ടില്ലെന്നാണ് റിപ്പോർട്ട്. ആരോടും ശത്രുതയില്ലാത്ത തനിക്ക് നേരേ ഇത്തരമൊരു ആക്രമണം നടന്നതിന്റെ ഞെട്ടലിലാണ് നടൻ. സംഭവത്തിന് ശേഷം നടൻ മാനസികമായി തളർന്നിരിക്കുകയാണെന്നും അതിനാലാണ് മൊഴിയെടുക്കൽ വൈകുന്നതെന്നും റിപ്പോർട്ടുകളിൽ പറയുന്നു.