യുപി ബാര് കൗണ്സിലിലെ ആദ്യ വനിതാ പ്രസിഡന്റ് കോടതിവളപ്പില് വെടിയേറ്റ് മരിച്ചു
Synopsis
ഉത്തര്പ്രദേശ് ബാര് കൗണ്സിലിന്റെ ചെയര്മാന് പദവിയിലെത്തുന്ന ആദ്യ വനിതയായ ധര്വേശ് യാദവ് രണ്ട് ദിവസം മുമ്പാണ് തല്സ്ഥാനത്തേക്ക് തെരഞ്ഞെടുക്കപ്പെട്ടത്.
ലഖ്നൗ: ഉത്തര്പ്രദേശ് ബാര് കൗണ്സിലിന്റെ ആദ്യ വനിതാ പ്രസിഡന്റായി തെരഞ്ഞെടുക്കപ്പെട്ട ദര്വേശ് യാദവ് കോടതി വളപ്പില് അഭിഭാഷകന്റെ വെടിയേറ്റ് മരിച്ചു. ആഗ്രയിലെ സിവില് കോടതിയുടെ പരിസരത്ത് ഇന്ന് വൈകിട്ടോടെയാണ് ദര്വേശ് യാദവിന് വെടിയേറ്റതെന്ന് വാര്ത്താ ഏജന്സിയായ ഐഎഎന്എസ് റിപ്പോര്ട്ട് ചെയ്തു.
ഉത്തര്പ്രദേശ് ബാര് കൗണ്സിലിന്റെ ചെയര്മാന് പദവിയിലെത്തുന്ന ആദ്യ വനിതയായ ധര്വേശ് യാദവ് രണ്ട് ദിവസം മുമ്പാണ് തല്സ്ഥാനത്തേക്ക് തെരഞ്ഞെടുക്കപ്പെട്ടത്. അഭിഭാഷകനായ മനിഷ് ശര്മയാണ് ദര്വേശിന് നേര്ക്ക് വെടിയുതിര്ത്തത്.
അഭിഭാഷകനായ അരവിന്ദ് കുമാറിന്റെ ചേംബറിനുള്ളില് ഇരിക്കുകയായിരുന്ന ധര്വേശിന് നേര്ക്ക് പ്രതി മൂന്ന് റൗണ്ട് വെടിയുതിര്ത്തു. ദര്വേശിന്റെ മരണം ഉറപ്പാക്കിയ ഇയാള് പിന്നീട് സ്വയം വെടിവെച്ച് ആത്മഹത്യ ചെയ്യുകയായിരുന്നെന്ന് ദൃക്സാക്ഷികള് പറഞ്ഞു.
സംഭവത്തെ തുടര്ന്ന് യോഗം ചേര്ന്ന ഔദ ബാര് അസോസിയേഷന് ദര്വേശിന്റെ മരണത്തെ അപലപിച്ചു. പ്രതിഷേധ സൂചകമായി നാളെ മുതല് ജോലി നിര്ത്തി വയ്ക്കുമെന്നും അസോസിയേഷന് അറിയിച്ചു. കൊലപാതകത്തില് പ്രത്യേക അന്വേഷണം ആവശ്യപ്പെട്ട് അസോസിയേഷന് സംസ്ഥാന സര്ക്കാരിനെ സമീപിച്ചു.
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam