എല്ലാ കണ്ണുകളും ഈറോഡിലേക്ക്, കോയമ്പത്തൂരിൽ വിമാനമിറങ്ങി വിജയ് ഈറോഡിലേക്ക് കാറിലെത്തി, കരൂർ സംഭവത്തിന് ശേഷം സജീവമാകാൻ താരം

കരൂരിലെ ദുരന്തത്തിന് ശേഷം നടൻ വിജയ് തൻ്റെ രാഷ്ട്രീയ പാർട്ടിയായ ടിവികെയുടെ ആദ്യ പൊതുപരിപാടി ഈറോഡിൽ സംഘടിപ്പിക്കുന്നു. കോയമ്പത്തൂരിൽ നിന്ന് റോഡ് മാർഗം എത്തുന്ന താരം, സെങ്കോട്ടയ്യൻ്റെ നേതൃത്വത്തിൽ നടക്കുന്ന റാലിയിൽ പതിനായിരങ്ങളെ അഭിസംബോധന ചെയ്യും. 

ചെന്നൈ: കരൂരിൽ പ്രചാരണ റാലിക്കിടെ തിക്കിലും തിരക്കിലും പെട്ട് 41 പേർ മരിച്ച് മാസങ്ങൾക്ക് ശേഷം, നടനും രാഷ്ട്രീയ നേതാവുമായ വിജയ് തമിഴ്‌നാട്ടിൽ തൻ്റെ ആദ്യ പൊതുപരിപാടി സംഘടിപ്പിക്കുന്നു. വ്യാഴാഴ്ച ഈറോഡിൽ നടക്കുന്ന തമിഴക വെട്രി കഴകം (ടിവികെ) റാലിയോടെയാണ് വിജയ് വീണ്ടും പൊതുരം​ഗത്ത് സജീവമാകുന്നത്. മുൻ അഖിലേന്ത്യ അണ്ണാ ദ്രാവിഡ മുന്നേറ്റ കഴകം (എഐഎഡിഎംകെ) ശക്തനായ കെ എ സെങ്കോട്ടയ്യൻ നേതൃത്വം നൽകുന്ന പരിപാടിക്ക് പെരുന്തുറയിലെ വിജയമംഗലം ടോൾ പ്ലാസയ്ക്ക് സമീപമുള്ള വേദിയിൽ വിപുലമായ ക്രമീകരണങ്ങൾ ഒരുക്കി. 

എ.ഐ.എ.ഡി.എം.കെ നേതൃത്വവുമായി ഇടഞ്ഞ് ടിവികെയിൽ ചേർന്ന സെങ്കോട്ടയ്യന്റെ നിർദ്ദേശപ്രകാരമാണ് ഈറോഡ് ടിവികെയുടെ റാലി. പൊലീസ് പുറപ്പെടുവിച്ച നിബന്ധനകൾ പാലിച്ചുകൊണ്ട് ഞങ്ങൾ എല്ലാ ക്രമീകരണങ്ങളും ചെയ്തിട്ടുണ്ട്. നേതാവ് വിജയ് പ്രസംഗിക്കുന്നത് കാണാൻ വരുന്നവർക്ക് ക്യുആർ കോഡുകളോ പാസുകളോ നൽകിയിട്ടില്ലെന്നും സെങ്കോട്ടയ്യൻ മാധ്യമങ്ങളോട് പറഞ്ഞു.

ചെന്നൈയിൽ നിന്ന് ചാർട്ടേഡ് വിമാനത്തിൽ കോയമ്പത്തൂരിലേക്ക് പറന്ന ശേഷം റോഡ് മാർഗം ഈറോഡിലെ വേദിയിലേക്ക് താരം എത്തി. അദ്ദേഹം റാലിയെ അഭിസംബോധന ചെയ്തു. നടനെ കാണാനും അദ്ദേഹത്തിന്റെ രാഷ്ട്രീയ പ്രസംഗം കേൾക്കാനും 35,000 പേർ എത്തി. റാലിക്ക് പിന്നീട് വിജയ് കോയമ്പത്തൂരിൽ നിന്ന് ചെന്നൈയിലേക്ക് വിമാനത്തിൽ മടങ്ങും. പൊലീസ് നിർദ്ദേശങ്ങൾ പാലിച്ചുകൊണ്ട്, കോയമ്പത്തൂർ വിമാനത്താവളം മുതൽ ഈറോഡിലെ റാലി വേദി വരെയുള്ള 68 കിലോമീറ്റർ ദൂരത്തിൽ വിജയ്‌യുടെ വാഹനത്തെ പിന്തുടരരുതെന്ന് പാർട്ടി പ്രവർത്തകരോട് ആവശ്യപ്പെട്ടു.

വിഐപികൾ, സ്ത്രീകൾ, പാർട്ടി ഭാരവാഹികൾ, പാർട്ടി കേഡർമാർ എന്നിവർക്കായി പ്രത്യേക ലോഞ്ചുകൾ നിർമ്മിക്കുന്നത് മുതൽ വിപുലമായ ക്രമീകരണങ്ങൾ വേദിയിൽ ഒരുക്കിയിട്ടുണ്ടെന്ന് പാർട്ടി അറിയിച്ചു. ഗർഭിണികൾ, കുട്ടികൾ, പ്രായമായവർ എന്നിവർ യോഗത്തിൽ പങ്കെടുക്കരുതെന്ന് പാർട്ടി നേതൃത്വം കർശനമായി അഭ്യർത്ഥിച്ചു. വേദിയിൽ 60 ലധികം സിസിടിവി ക്യാമറകൾ സ്ഥാപിച്ചിട്ടുണ്ട്.

ആംബുലൻസുകളും മെഡിക്കൽ സംഘങ്ങളും വേദിയിൽ വിന്യസിച്ചിട്ടുണ്ട്. മതിയായ കുടിവെള്ള സൗകര്യങ്ങളും ടോയ്‌ലറ്റുകളും ഒരുക്കിയിട്ടുണ്ടെന്ന് സംഘാടകർ അറിയിച്ചു. സുരക്ഷയ്ക്കും ഗതാഗത മാനേജ്‌മെന്റിനുമായി ആയിരത്തിലധികം പോലീസ് ഉദ്യോഗസ്ഥരെ ഡ്യൂട്ടിയിലുണ്ടാകുമെന്ന് പ്രതീക്ഷിക്കുന്നു. വിജയ്‌ക്കായി പാർട്ടി ഒരുക്കിയ സ്വകാര്യ സുരക്ഷാ ഉദ്യോഗസ്ഥർക്കും ബൗൺസർമാർക്കും പുറമേയാണിത്. പ്രത്യേകം രൂപകൽപ്പന ചെയ്ത പ്രചാരണ ബസിൽ വിജയ് പൊതുജനങ്ങളെ അഭിസംബോധന ചെയ്യും.