പനിക്ക് വിതരണം ചെയ്ത ഗുളികയില്‍നിന്ന് യുവതിക്ക് ലഭിച്ചത് ഇരുമ്പ് കമ്പികൾ

ഏർവാടി സർക്കാർ ആശുപത്രിയിൽ എത്തിയ ശക്തി എന്ന യുവതിക്കാണ് ​ആൻ്റിബയോട്ടിക് ​ഗുളികകളിൽനിന്ന് പിന്നിന്റെ വലുപ്പത്തിലുള്ള ഇരുമ്പ് കമ്പികൾ ലഭിച്ചത്

ചെന്നൈ: പനിയ്ക്കും അതിസാരത്തിനും ചികിത്സ തേടിയെത്തിയ യുവതിക്ക് വിതരണം ചെയ്ത ഗുളികയില്‍ ഇരുമ്പ് കമ്പികൾ. ഏർവാടി സർക്കാർ ആശുപത്രിയിൽ എത്തിയ ശക്തി എന്ന യുവതിക്കാണ് ​ആൻ്റിബയോട്ടിക് ​ഗുളികകളിൽനിന്ന് പിന്നിന്റെ വലുപ്പത്തിലുള്ള ഇരുമ്പ് കമ്പികൾ ലഭിച്ചത്. 

ഏര്‍വാടിക്കടുത്തുള്ള എരന്തൂര്‍ നിവാസിയായ ശക്തി വെള്ളിയാഴ്ച്ചയാണ് അതികഠിനമായ ഛർദ്ദിയും പനിയുമായതിനെ തുടർന്ന് ചികിത്സയ്ക്കായി ആശുപത്രിയിൽ എത്തിയത്. തുടർന്ന് ഡോക്ടറുടെ നിർദ്ദേശപ്രകാരമുള്ള മരുന്നുകൾ വാങ്ങി ശക്തി വീട്ടിലേക്ക് മടങ്ങി. മരുന്ന് കഴിക്കാൻ തുടങ്ങി കുറച്ച് ദിവസങ്ങൾക്ക് ശേഷം തൊണ്ട വേദന അനുഭവപ്പെട്ട ശക്തി ​സംശയം തോന്നി ​ഗുളികകൾ പരിശോധിച്ചപ്പോഴാണ് ഇരുമ്പ് കമ്പികൾ കണ്ടെത്തിയത്.

സംഭവത്തിൽ ശക്തിയുടെ പരാതി പ്രകാരം ഡെപ്യൂട്ടി ഡയറക്ടർ ഡോ. ബി കുമാര​ഗുരുബാൻ ​ഗുളികൾ ശേഖരിക്കുകയും പരിശോധനയ്ക്ക് അയക്കുകയും ചെയ്തു.