അമേരിക്കൻ പ്രസിഡൻ്റ് ഡോണൾഡ് ട്രംപിൻ്റെ അവകാശവാദം തള്ളി പെൻ്റഗൺ റിപ്പോർട്ട്: 'യുഎസ് ആയുധശേഖരത്തിൽ വൻ കുറവ്'

ഇറാനുമായുള്ള യുദ്ധത്തെത്തുടർന്ന് അമേരിക്കൻ സൈന്യത്തിന്റെ ആയുധശേഖരത്തിൽ വലിയ ക്ഷാമം നേരിടുന്നതായി പെൻ്റഗൺ റിപ്പോർട്ട്. പേട്രിയറ്റ്, താഡ് തുടങ്ങിയ വ്യോമപ്രതിരോധ സംവിധാനങ്ങൾ പകുതിയിലധികമായി കുറഞ്ഞത് ട്രംപിന്റെ വാദങ്ങൾക്ക് തിരിച്ചടിയായി. ആയുധങ്ങൾ പുനഃസ്ഥാപിക്കുന്നതിന് 3,800 കോടി ഡോളറിലധികം സാമ്പത്തിക ബാധ്യത വരുമെന്നും റിപ്പോർട്ട് വ്യക്തമാക്കുന്നു.

വാഷിങ്ടൺ: ഇറാനുമായുള്ള യുദ്ധത്തെത്തുടർന്ന് അമേരിക്കൻ സൈന്യത്തിൻ്റെ പ്രധാന ആയുധശേഖരത്തിൽ വലിയ തോതിൽ ക്ഷാമം നേരിടുന്നതായി പെൻ്റഗൺ ഇൻസ്പെക്ടർ ജനറലിൻ്റെ റിപ്പോർട്ട്. യു.എസിൻ്റെ പക്കൽ അളവറ്റ ആയുധശേഖരമുണ്ടെന്ന പ്രസിഡൻ്റ് ഡൊണാൾഡ് ട്രംപിൻ്റെ വാദങ്ങൾക്ക് തിരിച്ചടിയാകുന്നതാണ് പ്രതിരോധ മന്ത്രാലയത്തിൻ്റെ ഈ പുതിയ വിലയിരുത്തൽ. ആക്രമണങ്ങൾക്ക് ഉപയോഗിച്ച ദീർഘദൂര മിസൈലുകളും വ്യോമപ്രതിരോധ സംവിധാനങ്ങളും തീർന്നുപോയതാണ് പ്രധാന പ്രതിസന്ധിയായി റിപ്പോർട്ടിൽ ചൂണ്ടിക്കാണിക്കുന്നത്.

പേട്രിയറ്റ്, താഡ് തുടങ്ങിയ പ്രമുഖ വ്യോമപ്രതിരോധ സംവിധാനങ്ങളുടെ ശേഖരം മുൻപുണ്ടായിരുന്നതിനേക്കാൾ പകുതിയിലധികമായി കുറഞ്ഞതായി വിലയിരുത്തപ്പെടുന്നു. ആയുധശേഖരം പുനഃസ്ഥാപിക്കുന്നതിനും മാറ്റിസ്ഥാപിക്കുന്നതിനുമുള്ള നടപടികൾ സാങ്കേതികവും ഉൽപ്പാദനപരവുമായ പ്രതിസന്ധികൾ കാരണം മന്ദഗതിയിലാണ് നീങ്ങുന്നതെന്ന് റിപ്പോർട്ട് വ്യക്തമാക്കുന്നു. ഉപയോഗിച്ചുതീർത്ത ആയുധങ്ങളും ഉപകരണങ്ങളും പുനർനിർമ്മിക്കുന്നതും ഉയർന്ന ഇന്ധനച്ചെലവുകളും ഉൾപ്പെടെ ആകെ 3,800 കോടി ഡോളറിലധികം സാമ്പത്തിക ബാധ്യത വരുമെന്ന് കോൺഗ്രഷണൽ ബജറ്റ് ഓഫീസ് വ്യക്തമാക്കുന്നു.

അമേരിക്കൻ ഭരണകൂടം നൽകുന്ന പരസ്യ പ്രസ്താവനകളും പ്രതിരോധ വകുപ്പിൻ്റെ യഥാർത്ഥ ആയുധശേഖരവും തമ്മിലുള്ള വലിയ വ്യത്യാസമാണ് ഈ റിപ്പോർട്ടിലൂടെ പുറത്തുവന്നിരിക്കുന്നത്. യുദ്ധം നീണ്ടുപോകുന്നത് ആയുധലഭ്യതയെയും രാജ്യത്തിൻ്റെ സാമ്പത്തിക സ്ഥിതിയെയും കൂടുതൽ ദോഷകരമായി ബാധിക്കുമെന്നാണ് വിലയിരുത്തൽ.