കോടികൾ കൊയ്യാൻ ട്രംപിന്‍റെ കുടുംബം, ഓഹരി മൂല്യം 5 ബില്യൺ ഡോളറിലധികം വർധിച്ചു; 'ക്രിപ്റ്റോ രാജാവായി 'ട്രംപ് ഫാമിലി'

അവശ്യവസ്തുക്കളുടെ വിലക്കയറ്റം രൂക്ഷമാകുമ്പോൾ, പുതിയ ക്രിപ്‌റ്റോകറൻസി സംരംഭത്തിലൂടെ ട്രംപ് കുടുംബത്തിന്‍റെ ഓഹരി മൂല്യം 5 ബില്യൺ ഡോളറിലധികം വർധിച്ചു. 

വാഷിംഗ്ടൺ: രാജ്യത്ത് അവശ്യവസ്തുക്കൾക്ക് വില വർധിക്കുകയും സാധാരണ ജനജീവിതം ദുരിതത്തിലാവുകയും ചെയ്യുമ്പോൾ, പുതിയ ക്രിപ്‌റ്റോകറൻസി സംരംഭത്തിലൂടെ കോടികൾ കൊയ്യാനൊരുങ്ങി ട്രംപ് കുടുംബം. വേൾഡ് ലിബർട്ടി ഫിനാൻഷ്യൽ (WLF) എന്ന പേരിലുള്ള പുതിയ ക്രിപ്‌റ്റോകറൻസിയിലൂടെ ട്രംപ് കുടുംബത്തിന്‍റെ ഓഹരി മൂല്യം 5 ബില്യൺ ഡോളറിലധികം വർധിച്ചതായാണ് റിപ്പോർട്ട്. ഈ പദ്ധതിയിൽ ട്രംപിനെ "കോ-ഫൗണ്ടർ എമറിറ്റസ്" എന്ന് വിശേഷിപ്പിക്കുന്നു.

​ദശലക്ഷക്കണക്കിന് അമേരിക്കക്കാർ ഭക്ഷണം, ഇന്ധനം, ദൈനംദിന സാധനങ്ങൾ എന്നിവയുടെ വിലക്കയറ്റം മൂലം ബുദ്ധിമുട്ടുന്ന സമയത്താണ് ഈ വാർത്ത പുറത്തുവരുന്നത്. ട്രംപിന്‍റെ നയങ്ങൾ ജനങ്ങൾക്ക് വലിയ സാമ്പത്തിക ഭാരമുണ്ടാക്കുന്നുണ്ടെന്ന് വിമർശകർ ചൂണ്ടിക്കാട്ടുന്നു. "ട്രംപിന്റെ നയം കാരണം, അമേരിക്കക്കാർ 1933-ന് ശേഷമുള്ള ഏറ്റവും ഉയർന്ന താരിഫ് നിരക്കാണ് നൽകുന്നത്. ട്രംപിന്റെ താരിഫുകൾ കാരണം ഒരു ശരാശരി കുടുംബത്തിന് 2,400 ഡോളർ നഷ്ടപ്പെടുന്നു," വാഷിംഗ്ടൺ സെനറ്റർ പാറ്റി മുറെ എക്സിൽ കുറിച്ചു.

​യുഎസ്ഡിഎയുടെ സാമ്പത്തിക ഗവേഷണ സേവനത്തിന്‍റെ ഏറ്റവും പുതിയ റിപ്പോർട്ടും ഈ വാദത്തെ പിന്തുണയ്ക്കുന്നു. ജൂൺ മുതൽ ജൂലൈ വരെയുള്ള കാലയളവിൽ എല്ലാ ഭക്ഷണ സാധനങ്ങളുടെയും ഉപഭോക്തൃ വില സൂചിക (CPI) 0.2 ശതമാനം വർധിച്ചു. ഈ വർഷം അവസാനത്തോടെ ഭക്ഷ്യവസ്തുക്കളുടെ വില 3.4 ശതമാനം വർധിക്കുമെന്നാണ് കണക്കാക്കുന്നത്. ഇത് കഴിഞ്ഞ 20 വർഷത്തെ ശരാശരിയായ 2.9 ശതമാനത്തേക്കാൾ കൂടുതലാണ്.

ആഗോള ധനകാര്യരംഗത്തെ ഒരു പുതിയ ശക്തിയായി സ്വയം അവതരിപ്പിക്കുകയാണ് വേൾഡ് ലിബർട്ടി ഫിനാൻഷ്യൽ (WLF) എന്ന ക്രിപ്‌റ്റോകറൻസി കമ്പനി. ഇതിനകം തന്നെ നൂറുകണക്കിന് ദശലക്ഷം ഡോളർ സമാഹരിക്കുകയും ഒരു ഡോളറുമായി ബന്ധിപ്പിച്ച സ്റ്റേബിൾകോയിൻ സൃഷ്ടിക്കുകയും ചെയ്തിട്ടുണ്ട്. കൂടാതെ, ക്രിപ്‌റ്റോ ഇടപാടുകൾക്കായി ഒരു മൊബൈൽ ആപ്പ് പുറത്തിറക്കാനും കമ്പനി പദ്ധതിയിടുന്നു.

റിപ്പോർട്ടുകൾ പ്രകാരം, ഡോണൾഡ് ട്രംപിന്‍റെ മക്കളായ എറിക്, ഡോണൾഡ് ട്രംപ് ജൂനിയർ, മരുമകൻ ജാറെഡ് കുഷ്നർ എന്നിവരുൾപ്പെടെയുള്ള ട്രംപിന്‍റെ കുടുംബത്തിന് ഈ കമ്പനിയിൽ 60 ശതമാനം ഓഹരിയുണ്ട്. ഡബ്ല്യുഎൽഎഫിന്‍റെ ഹോംപേജിൽ "ഡോണൾഡ് ജെ ട്രംപിൽ നിന്ന് പ്രചോദനം ഉൾക്കൊണ്ടത്" എന്ന് യുഎസ് പ്രസിഡന്‍റിന്‍റെ ഒരു വലിയ ചിത്രത്തോടൊപ്പം പ്രദർശിപ്പിച്ചിട്ടുണ്ട്.

തെരഞ്ഞെടുപ്പ് പ്രചാരണ വേളയിൽ യുഎസിനെ ലോകത്തിന്‍റെ ക്രിപ്‌റ്റോ ഹബ്ബാക്കുമെന്ന് അദ്ദേഹം വാഗ്ദാനം ചെയ്തിരുന്നു. അധികാരത്തിൽ വന്നതിന് ശേഷം, സ്വന്തം സംരംഭങ്ങൾക്ക് പ്രയോജനപ്പെടുന്ന തരത്തിൽ അദ്ദേഹം നിയമങ്ങൾ ലളിതമാക്കി. ഈ വർഷം ആദ്യം സ്റ്റേബിൾകോയിനുകളെ സംബന്ധിച്ച ഒരു സുപ്രധാന നിയമത്തിൽ അദ്ദേഹം ഒപ്പുവെക്കുകയും ചെയ്തു.