'9 സര്വ്വകലാശാല വിസി മാര് നാളെതന്നെ രാജി വയ്ക്കണം' അസാധാരണ നടപടിയുമായി ഗവര്ണര് ആരിഫ് മുഹമ്മദ് ഖാന്
Synopsis
യുജിസി ചട്ടം പാലിക്കാത്തതിന്റെ പേരില് സാങ്കേതിക സര്വ്വകലാശാല വിസി നിയമനം റദ്ദാക്കിയ സുപ്രീംകോടതി ഉത്തരവിന്റെ അടിസ്ഥാനത്തിലാണ് നടപടി
തിരുവനനതപുരം: സര്ക്കാരുമായുള്ള പോര് കടുപ്പിച്ച് ഗവര്ണര് ആരിഫ് മുഹമ്മദ് ഖാന്. 9 സര്വ്വകലാശാലകളിലെ വിസിമാരോട് നാളെതന്നെ രാജി സമര്പ്പിക്കാന് നിര്ദ്ദേശം നല്കി.യുജിസി ചട്ടം പാലിക്കാത്തതിന്റെ പേരില് സാങ്കേതിക സര്വ്വകലാശാല വിസി നിയമനം റദ്ദാക്കിയ സുപ്രീംകോടതി ഉത്തരവിന്റെ അടിസ്ഥാനത്തിലാണ് ഗവര്ണറുടെ അസാധാരണ നടപടി.കേരള സര്വ്വകലാശാല, എംജി സര്വ്വകലാശാല, കൊച്ചി സര്വ്വകലാശാല,ഫിഷറീസ് സര്വ്വകലാശാല, കണ്ണൂര് സര്വ്വകലാശാല,സാങ്കേതിക സര്വ്വകലാശാല,ശ്രീശങ്കരാചാര്യ സംസ്കൃത സര്വ്വകലാശാല,കാലിക്കറ്റ് സര്വ്വകലാശാല,മലയാളം സര്വ്വകലാശാല എന്നിവടങ്ങളിലെ വിസിമാരോടാണ് രാജി ആവശ്യപ്പെട്ടിരിക്കുന്നത്.
നാളെ 11.30 രാജിക്കത്തു രാജ് ഭവനിൽ എത്തിക്കണം.യുജിസി മാനദണ്ഡം ലംഘിച്ചുള്ള നിയമനം എന്ന നിലക്കാണ് നടപടി എന്ന് രാജ്ഭവൻ വ്യക്തമാക്കി.
5 വി സി മാർ ഒറ്റപേരിലുള്ള ശുപാര്ശയില് നിയമിച്ചവരാണ്.4 പേരുടെ നിയമനത്തിനുള്ള സെർച് കമ്മിറ്റിയിൽ അക്കാദമിക് വിദഗ്ധർ ഇല്ലെന്നും രാജ്ഭവന് വിശദീകരിച്ചു
'വിസി നിയമനം നടത്താന് അര്ഹതയാര്ക്ക്', സുപ്രീംകോടതി വ്യക്തമാക്കിയിട്ടുണ്ടെന്ന് ഗവര്ണര്
ഗവർണർ ആരിഫ് മുഹമ്മദ് ഖാനെതിരെ ഇടതുമുന്നണി പ്രക്ഷോഭത്തിലേക്ക്. ഇന്ന് ചേർന്ന മുന്നണി നേതാക്കളുടെ യോഗത്തിലാണ് തീരുമാനം. നവംബർ 15 ന് രാജ്ഭവന് മുന്നിൽ പ്രതിഷേധ കൂട്ടായ്മ സംഘടിപ്പിക്കും. ഇതിൽ മുഖ്യമന്ത്രി പിണറായി വിജയനും പങ്കെടുക്കും. ജില്ലാ കേന്ദ്രങ്ങളിലും പ്രതിഷേധ പരിപാടികൾ നടത്തും.